INDIA SAWRKAR HIAN MIZO MIPUITE HNENAH NGAIHDAM DIL RAWH SE - MZP

Aizawl | March 5, 2019: awiin March ni 5, 2019 (Thawhlehni) chawhma dar 11:00 khan MZP buatsaihin Dawrpui Multipurpose Centre-ah ZORAM NI hman a ni a. He hun hi MZP Vice President Pu B. Vanlaltana'n a kaihruaia, Pu Lalnunmawia Pautu, General Secretary chuan ZORAM NI hman tawh dan leh hman anih chhan report a pe bawk. Pu  Lalchamliana, Hon'ble Home Minister chu Khuallian a ni a, Khuallian leh MZP President Tv L. Ramdinliana Renthlei ten thu an sawi a ni.

MZP President  L. Ramdinliana Renthlei chuan, "Mizoramin hun khirh ber a tawn lai chu, India sawrkar-in Jet fighter hmanga dimdawina tel miah lova a bomb kha a ni." a ti. MZP President chuan, "Mizoramin Zalenna kan suala, India sawrkar-in rambuaiah min puang a, vai sipai ten an duh duh danin kut min thlaka, khua min hal saka, kan buhzem thlengin min hal sak a ni. Chu mai chu duhtawk loin kan farnute min pawngsual saka, chu mai duhtawk lovin nu leh tar thlengin pawngsual sak a ni. Khang te avanga kan rilruna kha tun thlengin a la dam lova, thangthar te nunah ser a la nung  reng a ni. Chuvangin INDIA SAWRKAR HIAN MIZO MIPUITE  LAKAH NGAIHDAM a dil tur a ni, tih hi MZP duh dan a la ni reng a ni." a ti.

MZP President chuan, " Thangthar zingah tam takin, Mizoram hi India ram emaw kan ti a, Mizoram hi India ram a ni ngai lo a ni tih hi i hre thar leh ang u. Kan pi leh pu te hun atangin Ramdang thuhnuaiah kan kun ngai lo. Mahnia ro inrelin, mahni kea ding thin hnam kan ni a, 'chuvangin Pathianin engtikah emaw chuan Zofate hi min hruai khawm leh ang a, rorelna pakhat hnuaiah kan awm leh ngei ang, Pathian hian hnamdangte thuhnuaia kan kun reng hi a phal lo ang, tih hi ka ring tlat a ni,' a ti a. Tin, March ni 5, ZORAM NI hi ram hmangaih tharna hunah hmang ila, hma kan sawn theih nan tan lak thar nan i hmang ang u" a ti bawk.

Khuallian Pu Lalchamliana chuan, " Hmasang a ta Tu thuhnuaiah mah kan kun ngai lova, mahnia ro inrel hnam kan ni. British-in sipai chakna hmangin min awpbeta, min chhuahsan dawnah India-in fing vervek takin kan hruaitu hmasate an thlem thlu a, India danpui an siam dawn pawhin Mizo aiawh tumah an tel lova, a tawpah inthiam chawp nan kan hruaitu te mi pahnih (2) an ruat ve chauh a ni. Chuvangin India Danpui hi Mizote tan chuan Barhlui Danpui a ni." a ti.

Khuallian chuan, "kan ramah Indian Nationalism leh Mizo Nationalism a insual mek a,  Thangthar te thinlungah Mizo Nationalism a piang thar leh hi ka lawm hle a ni." a ti bawk.

He hunah hian Pu Lalnuntawma Fanai, MZP Adviser ni bawk chuan Zo-nationalism chungchang inzirtirna thu  tha tak a sawi a, he hun hmangtu ten hlawk thlak tak an ti hle.