ZOFATE INSUIHKHAWM LEHNA LEH INNER LINE RESERVED FOREST CHUNGCHANG

- PS Haokip

B Vengnuom,

Churachandpur

Sir George Abraham Grierson, Superintendent of the Linguistic Survey of India chuan kum 1904-ah khan kan ram-leilung neitu nihna chu ‘KUKI COUNTRY’ tiin alo record a ni. Keini Zo Hnahthlak hnam peng hrang hrangte hi tunhma atang tawh khan KUKI tia chhinchhiah thlap kan ni. MEITEI POOYAS an tih Meitei ho pi leh pute chanchin ziaka dahkhawmna archive-ah pawh heng thute hi him taka vawn a la ni bawk. ( www.exploremizoram.com )

Ram leilung neitu nihna leh humhalhna chungchang ah hian chhinchhiah tlak em em pakhat chu 1777 kuma Britist sipai hovin Kuki ram hnehlak tuma an run kha a ni, chu chu Lord Warren Hasting, Governor General of India a hunlai kha a ni. Ram-leilung chhanna avangin British sipai nen 1845, 1847-1848, 1849-1851 thleng kan indo a, chung kum ruk helna chuan mang thak khawpa rapthlak indona “The Great Kuki Invasion of 1860” a hring chhuak ta a nih kha. British mi, Shakespear a lehkhabu ‘The Lushai Kuki Clans’ ah pawh ram leh hnam humhalh leh chhanna kawnga huaisen taka ke kan pen dan te record (Chhinchhiah) a ni. Ram leh hnam hmangaih tur chuan a leilung hausakna leh a Ecological balance ngaipawimawh hmasak a ngai fo thin. ( www.exploremizoram.com )

Lawm awm deuh mai chu, hnam inpumkhatna tura kawng min lo sialsak tu, hotu hmasa te hmalakna, tihtakna leh thawhrimna kha a ni, tu te nge an nih tih hre lo khawpa kan bangbo erawh chu a lungchhiatthlak hlein ka hria. Tun huna kan thiltum leh kalpui mek te hi hun kal ta a kan hotu ten chil lem meuha an lo ‘suangtuahna ram’ kha a ni tih hi i hre nawn leh ang u. Hnam ze nghet chuan historical facts and figures ziakin a dah thin. Kum 1960-a Kuki National Assembly Conference, Thingkangphai, Churachandpur hmuna hotu hmasa te’Political Resolution’ kha Pu Thongkhopao Singsit, President KNA leh Pu Haojakam Chongloi, Gen. Secy. KNA kaihhruaina hnuaiah ‘Kuki State’ din tur tih a ni. Ka hriat chinah chuan Pu Thangkhopao Kipgen, Pu Thongkhopao Singsit, Pu SL Lunneh leh Pu Vungkham Naulak te chuan Aizawla kan hotute hmuin ‘Kuki State’ din dan tur pawimawh tak chu Bengali Theatre, Zarkawt, Aizawl hmunah beng-sik in an lo ngaihtuah ho tawh a ni. March 1965 khan Thingkangphai, Churachandpurah ni hnih awh ‘Political Consultation’ neih leh a ni a, chuan, chu meeting chu chunzawmin 12 March, 1965-ah khan Presbyterian Church compound Kawnpui (NKT) Churachandpur hmunah thutlukna siamin Kuki leh Lushai-ho chenna hmun zawng zawngte chu chhanhima Mizo Independent Country din tur tih a ni. Chu Political Consultation-a hotu lawk deuh te chu:

1. Pu Laldenga, MNF President

2. Pu SL. Lunneh

3. Pu Paolen Haokip, President KNA

4. Pu Boisok (Bawichhuaka)

 5. Pu PK. Singson, Jt. Secy. KNA

6. Pu Haukholal Thangzom Gangte, Meeting Secretary

7. Pu Haokholet Ngailut, Secy. KNA

8. Pu Khaijang Haokip, President KNA Churachandpur

9. Pu Darkhum, President, Hmar People Council te an ni.

Hemi Political Consultative Resolution thutlukna chu a tak ngeia alo chan theihna turin Kuki Area atangin hnam pasaltha, tamtawk tak ten Mizo National Front (MNF) chu ram leh hnam tan mahni in lum leh hmangaihte kalsanin an lo vahvaih pui ta. Man-power chauh ni lovin sum leh pai, eitur buhfai leh chawhmeh leh a tul dangte Kuki Area-a chhungkaw tin ten an theih ang angin MNF chu an lo pui thin a nih kha. Mizo unauten Mizorama Indian Army nunrawnna in tawrh ang tho kha Manipur-ah pawh in Kuki unauten kan lo tuar ve tho a ni.
( www.exploremizoram.com )

Vawiin niah hian MNF sipaia lo tang Kuki unaute hming zawng zawng hrekim tawh lo mah ila theihtawpa ka zawn hnuah sipai hming 300 ka chhui chhuak thei hram a, chu chu ka rawn thiltel bawk a ni. Heng hnam pasaltha ho hming list hi kan MNF hotu ten an la kawl tha a, an la vawng nung reng a nih chuan tuna Kuki areaa mi sipai 300 hming te nen belhkhawmin Kan in-UNAUNA leh kan tanrualzia tichiang tur leh hnam pasaltha te hming zawng zawng lungpui liantawka kera khawpui lunlaia tarchhuahsak hi thinlung taka kan mitthla leh kan duh vek ka ring nghet tlat a ni.

Ram leh hnam tana mahni nun thapa rammu ten political party affiliation an nei ngai lo. An party hming chu ‘HNAM ZALENNA’ tih a ni zawk.

Hun a lo kal zel a, eng eng emaw political boruak avangte pawh a ni maithei a, mak angreng tak in, Pu Laldenga, MNF President chhuan Kuki chenna leh Kuki te identity hlamchhiahin MIZORAM ACCORD chu India Government nen an lo sign ta... ? Chu chu Lushai Hills tia kan hriat, Zo hnam chi hrang hrang te in, kan Jerusalem a kan ngaih, tuna Mizoram State lo pianchhuahna lungphum diktak chu a ni. MNF President, Pu Laldenga kaihhruaina hnuaiah khan lungrual takin ‘MIZO’ tih hming nomenclature kan lo pawm thlap a, chumi MIZO MOVEMENT FOR AN INDEPENDENT COUNTRY atan kan engkim kan lo SACRIFICE nachungin, vanduaithlak tak leh lungchhiatthlak takin kha 1986-a MNF leh Government of India Accord-ah khan Kuki unaute chenna area or teritories te chu ziahluh tel a ni ta lo kha a ni.
( www.exploremizoram.com )

He Mizo Accord ah hian:

1. Kuki te telh an ni lo mai ni lovin, hriattir emaw, tel ve tura sawm emaw pawh an ni ve lo

2. MNF leh Government of India te agreement, signature-a an delhkilhnaah khan Kuki Territory telh ve a ni ta lo.

“ Mahse, kha accord-ah khan pumkhat kan nihzia leh Mizoram thenawma Zofate chenna or luahna ram te chu nakin huna ennawn leh tura dahthat a ni” tih ziahna hmun (Clause) a awm a. Chu clause ennawn lehna hun êng lo thleng tur chu beiseina sang tak nen i lo la nghak fan fan ang u le. Mizoram State puitlinga alo pian chhuahna tura Kuki mipuite inpekna sangtak leh beiseina sangtak chuan khaw-eng hmuphak ve lo mah se, chhelna leh dawhtheihnate chu beiseina a hlawmkhawmin kan tuarchhuak tur a ni, tih hi kan dinna chu a ni.

 Mizo accord ziah fel a nih hnu rei lo teah Pathianin hruaitu chhuanawmtak Pu R. Thangmawia min pe a, aniin Zo hnahthlak (Chin, Kuki, Mizo) te darhsarh taka VISION mumal nei lova ramsa ang maia mahni seh seh tlang leh muala ‘Hnam Ropui’ kan nih theihna phochhuak zo lova kan zuihral mai tur chu phal lovin, a hun hlu neih zawng zawng chu INPUMKHATNA tur kawng sial nan alo hmang ral ta a nih kha. 1988 khan Champhai Mizoramah Pu R. Thangmawia kaihhruaina hnuaiah ‘Zofate Insuihkhawmna Convention’ hman a ni. Chu convention-ah chuan nomanclature atan ‘Mizo’ tih leh Zomi tih duhpawl leh duh lo pawl inkarah inhnialna (debate) nasa tak a awm laiin Pu Sanngam, Chittagong Hill Tracts palai chu lo dingchhuak in Mizo leh Zomi tih terminologies pahnih chauha in debate buai nuai nuai na chungchang a duh loh thu leh a lungawi loh thu a phuhchhuak ta hlawl mai a. Ani chuan, “Keini Chittagong Hill Tracts leh Chin Hills-a awm te hi Mizo kan ni lova Zomi pawh kan ni hek lo” tih pahin a hote nen convention hall chu an chhuah tauh san nghal. Hotu engemaw zat te chuan Pu Sanngam-a chu umzui in, an va thlem lungawi thei hram a ni.

Meeting chhunzawm lehin hun rei tawk tak an sawiho leh hnuah chuan Mizo or Zomi chu hnawlin ‘ZO’ tih hming chu CHIN-KUKI-MIZO te nomenclature atan lungrual takin an nemnghet ta a ni. Tichuan, kan chenna ram leh hnam humhalh a, chhanhim bawk a, vawng nung reng tur leh chhim leh hmar, chhak leh thlanga Zofate zawng zawng tan Independent country sual chhuak turin Zo Re-Unification Organisation (ZoRO) chu beiseina sangtak nen din alo ni ta.

Hun rei tak chhung chu Manipur-ah chibing politics thlipuiin min nuai hlawm a, a tu ate mahin hlawkna teltur kan nei lo. Mahse. vanneihthlak takin 6th November, 2012 atang khan group hrawpui pui pahnih, Kuki National Organisation (KNO) leh United Peoples Front (UPF) ah party engemaw zat te chu kan inchhungkhawm thei ta a, Pathian remruat ngei a nih ka ring.

KNO leh UPF te chuan kan hmalam politics dinhmun tur chu Dorcas Hall, Churachandpur-ah thlirhona (Joint Meeting) kan nei a. Chu meeting-ah chuan, kei chuan, Manipur atanga ‘Tribal State’ ker chhuah chu a remloh tur thu ka sawi a, a chhan chu Tribal State chuan Naga ho pawh a huam tlat avang a ni. Pakhatnaah chuan, Naga ho National Political Agenda or Framework-ah Kuki te an tel ve lo. A pahnihna chu, ram dik lo taka zauh duhna avangin NSCN (IM) chuan Naga thenawm hnaia awm Kuki lalram te chu runin an suasam vak a, an nunrawnna avangin Kuki khua thahnem tawk tak a mang/rem a, Pawisawilo mihring nun tam tak a boral a, damchhunga rualbanlo tur leh fahrah a za tel meuh a hring chuak a ni. Point pathumna chu Naga te chu thingtlang mi ni mahse hnam hrang daih an ni tlat. Zo hnahthlak an ni ve lo. An political goals & ideals-ah pawh Zo hnahthlakte chu kan lang pha ve lo. Keini Zo hnam te chu kan rawnchhuahna a inang a, kan history a thuhmun a, kan khawtlang nun culture ah danglamna a awm lova, chuan, tawng tlem tlemin inthlau deuh mah se, kan inpawh in kan hre thei nghal zel a ni.

Pu R. Thangmawia Political Vision leh Politics ka kalpui leh ka hmuh ve dan chu alo in ang hle mai a. ChinKuki-Mizo ten lungrual taka Zo Political Identity a inchhungkhawma independent country ‘ZOLAND’ kan neih theih dan tur kawng sawiho turin Pu R. Thangmawia leh a Cabinet member-te chuan ka awmnaah min rawn tlawh a, chuta an thu rawn ken chu, “Mizoramah Mizo Identity in kan kal ang a, chutiang zelin Chin Stateah Chin Identity in, chuan Manipur leh Myanmar chhunga Chin State tiamloha Kuki Identity in kan kal thei a ni” an ti a.

Pu R. Thangmawia thu rawn ken chuan min ti lawm hle a, ka zawhna chu, “Chin leh Mizo te chu ZoRO chhunga mi ve ve niin an ram theuhah mahni state Govt. nei ve ve an ni tawh; chutiang ang dinhmun chu Kuki te pawn an nei thei ang em?” ka ti a. “Tehreng mai” tia min chhanna bawhzui nghalin Pu R. Thangmawia chuan Pu Khaijang Haokip, President, ZoRO (NE) leh Pu Lalruatliana Fanai @ Ruata tuna ZoRO - GHQ. Gen. Secy. ni mek leh an team te chu Myanmar General Census 2014 atan Mizo leh Lushai hnam Kale-Kabaw Valley-a cheng zawng zawngte chu Kuki tih hminga inziaklut vek turin an va campaign a ni. Pu R. Thangmawian a thu tiam a hlen khan min hneh a, ropui ka ti takmeuh a ni. Chuta tang zet chuan ZoRO idealogy-ah kei pawhin rinna nghet ka lo neih phah ta a ni.
( www.exploremizoram.com )

ZoRO chuan hma sawn zelin, ZoRO tana kan ke penna te chuan rah tha chhuah zelin tunah chuan Assam rama Karbi unaute pawh ZoRO-NE ah rawn inchhunglutin an zinga mi chuanawm pahnih pawh Vice President leh Jt. Secretary dinhmun pawimawh tak te chelhtir an ni. A pahnihna atan, Arunachal Pradesh, Changlang District-a cheng kan unau Singpho hnam te chuan ZoRO zawm duhna thinlung thuk tak an neih thu kan dawng leh tawh a, Myanmar-a Kachin Independent Organisation te chuan Kuki te chu an mahni chhangtu an ‘U’ kan nih thu an declare tawh bawk a, helam ah, Nagaland Mon Dist. a Konyak unaute chuan Kuki te chu kan NAU an ni tiin min rawn hriattir leh bawk. Kuki te chuan Kachin le Konyak te chu ‘LAWM TAKIN’ a pianpui ngei, a Unaute (Blood brothers) an nihzia tihchian nan SIAL (MITHUN) talh meuhvin a pawmna a sawhnghet ta a ni.

The Chin-Lushai Conference of 1892 zulzuiin chutiang conference Sadar Hills, Saikul hmunah 2014 khan ropui taka hman a ni a, chu conference ah chuan Pu R. Thangmawia, President, ZoRO chu Chief Guest a ni. A kum leh 2015-ah pawh chutiang conference chu Kholmun, Churachandpur-ah hman leh ni in, 2014 vekah khan Moreh Town a ‘CHAVANG KUT’ or |hal Favang Kut chu India leh Myanmar-a cheng Zo hnahthlak ten a ropui thei ang bera hman leh a ni.

Inunauna Ideology leh suangtuahna ram tana hmathlir ngial nghet tak (Firm Vision) chuan ZoRO movement min support tir a, chu ‘unstopable’ beiseina vision ka neih tlat avangin Dr. Seilen Haokip (UK) nen UNPFII Conference New York, USA-ah ZoRO consultant nihna nen tum hnih lai kan va tel ve tawh. Tute pawhin hnam inpumkhatna tura mahni zone theuha hma kan lak thinna te hian kan Pathian khawngaihna leh tanpuina ala auchhuak dawn a ni tih i ring theuh ang u.

Vawiin niah hian, Zo hnahthlak unau te hian kan tihmakmawh nia lo lang ta chu, ban (pillar) pahnih nghet tak ai chuan ban pathum nghet tak chu tuifawn leh thlipui karah pawh a ding nghet zawk dawn a ni tih chu hai rual lohvin kan hre theuh awm e.

Chin State leh Mizoram state te chu an ding nghet tawh. Tunah kan hmabak chu Manipur leh Myanmar-a Kale-Kabaw Valley te khi Kuki Identity atan leh Zo hnahthlak zawng zawng zalenna ram atana nawrchhuah hi a ni. Hemi atan hian kan mizo unaute leh kachin unaute tanpuina leh finchhuahna kan mamawh hle dawn a ni. Chutiang tanpuina chu keini KNO leh UPF te chuan beiseina sangtak nen kan lo thlir reng dawn.
( www.exploremizoram.com )

Chin state leh Mizoram-in an neih ang political status hi Manipur leh a chhehvel pawhin Kuki hminga a neih ve hunah chuan ‘ZO COUNTRY’ dinchhuahna tura ban (pillar) pathumna chu sawi nghin rual lohvin kan lo phun nghet tawh dawn a ni.

Mizoram hi khawvel pum huapa Zo mipui zawng zawngte tan kan Jerusalem a ni. Chuvang chuan, he rama cheng chhuangkaw tin ten zalen taka Pathian an biak theihna tur leh Society ralmuang a nih theihna turin kei pawh a tulna apiangah hmalakpui turin ka inpeih reng a, Zo mipuite pawh chutiang hun atan ka sawm nghal ni se. Chuan, ka sawi duh leh pakhat chu, keini khawvel pum huapa Zo hnahthlak zawng zawngte hian Mizoram hi thenawm ram te nena state ramri inchuhnaah te, zofate ni lo ramdangmi dan lo anga lo lut ru te lak atangin he ram hi thih ngama chhan turin kan inpeih reng tur a ni. Heng chauh hi ni lovin, keimahni chhungkua ngei atang pawha silai keng group tu emaw ten State sorkar emaw, mipui/mimal vau ang chi ah te he ram leh mipuite hi kan ram leh kan mipuite an nih tlat avangin kan chhanin kan hum him reng tur a ni.
( www.exploremizoram.com )

Ka thutawpna turin, eng tik niah emaw chuan heng kan thupui, “ INNER LINE RESERVED FOREST” tih thu pawimawhtak leh Zofate chatuan ro tur hi keimahni Parliament ngeia kan la sawihoa kan la legislate ni tur chu nghakhlel lovin beiseina nen i la thlir ang u. Lalpa kan Pathianin Chin-Kuki-Mizo te inunauna tichak zelin ZO NATION chu malsawm rawh se.