Aizawl | Feb 4, 2019: MZP leh NESO chuan nimin khan Citizenship Amendment Bill, 2016 pass a nih loh nan Delhi-ah India ram Political Party hrang hrang hruaitute hnenah campaign nei zui zel in 3.2.2019 (Sunday) khan Prasant Kishore JDU leader chu meeting an neihpui.
JDU chuan Rajya Sabha-ah CAB pharh a nih chuan a dodal zawngin vote an thlak ngei tawh tur thu MZP & NESO hi a lo hrilh. Nimin vek khan BJD MP leh Lok Sabha leader Bhartruhari Mathab chu meeting pui leh a ni a. MZP & NESO hnenah hian CAB chu an duh loh thu leh vote lak a nih chuan a duh lo zawnga an vote tur thu a lo hrilh bawk a ni. MZP & NESO hruaitu te hian Conrad Sangma Meghalaya CM leh North East a Political Party hrang hrang hruaitu te AGP, NPF leh INPT an kawm leh bawk a, an ni nen hian CAB dodal zel dan tur an sawiho nghal bawk a ni.
MZP & NESO team te hian Sanjay Raut MP Rajya Sabha Parliamentary Leader leh Shiv Sena spokesperson ni bawk chu an hmu leh bawk a. MZP & NESO chuan BJP thawhpui Party lian tak tak te chu lamtangah a siam mek zel a, tunah hian BJP hian CAB ah hian tanrual pui tur a nei tlem tial tial niin an sawi.
MZP & NESO chuan BJP thawhpui party zawng zawng a mal malin hmuh kual a tum a ni.
Vawiin hian MZP & NESO team hian Congress President Rahul Gandhi an meeting pui leh dawn bawk a ni. Union Home minister Rajnath Singh leh Prime minister Narendra Modi te pawh meeting pui tum a ni bawk a ni.
MZP chuan, Kan hnam tana feh chhuak MZP & NESO team tan hian Mizo mipuite i tawngtai turin an sawm a ni.
- MSR
Post a Comment
He post chungchanga i ngaihdan lo sawi ve rawh: