MIZORAM IN PATHUMNA LA ; PLAYER TEN AN THEIHTAWP AN CHHUAH- COACH

 

Aizawl | February 11, 2019: 9th Hockey India Junior Women National Championship 2019 (A Division), Kollam, Kerela khawpuia neih mekah nimin khan Mizoram team chuan Uttar Pradesh nen intumin si hnih faiin hnehna an chang a, Pathumna lawmman an la.Heng foal te hi lalrinfeli leh F Lalawmpuii te khung a ni. 

trophy

Trophy leh an medal dawn nen

He inkhelah hian Lalrinfeli (Jersey number 23) chuan 1st quarter minute 14na ah goal khungin, 1st quarter ah goal dang a awm lova, Second Quarter an tan leh a, Minute 4-na ah F Lalawmpuii (Jersey no 3) chuan khung a, 3rd quarter ah nen goal dang awm lovin si hnih faiin Mizoram hi pathumna an ni ta  a ni.

 

Mizoram team te an  game a mawiin fak an hlawh hle a, an fakawmin an chhuanawm tak zet a ni.

  

 

Theihtawp chhuahin an bei thin..

9th Hockey India Junior Women National Championship 2019 (A Division) hi Kollam Khawpui, Kerela ah January 31 khan tanin, February 10 khan a hmawr bawk a ni.

Semi Final ah an chak zo lo tuara infiammite mittui tla chu Media lamin an hmuh hmaih lo.

  

Mizoram team te hi February 12 hian Kollam, Kerela an chhuahsan ang a, february 15 ah Guwahati thleng hman tura beisei an ni.

Tawngtai an thlahthlam ngai lo

  

He tournament ah hian Marina Lalramnghaki chu best midfielder of the tournament atan thlan a ni a. Mizoram teamte hi an mikhual lo hle a, match official zingah KT Lalhlimpuii a tel thei hi Mizoram Hockey ten India Hockey ah hmun pawimawh an luah zia tilang chiangtu a ni awm e. 

Marina Lalramnghaki

KT Lalhlimpuii

Coach Lalrothuami (Bte-i) chuan Player ten an theihtawp an chhuah thu sawiin, "Semi final ah felhlel taka tihthlak niin, rilru na takin awm mahse, Pathumna inchuhnaah an theih tawp an chhuah a, an thawmrimna, inpekna leh an inthunun theihna vanga hetiang dinhmun thleng thei hi kan ni," a ti a. Mizoram Hockey in National Tournament ah official an nei thei chu a thlamuanthlak thu a sawi tel bawk.

Mizoram Hockey Team list chu hetiang hi a ni:

1. F. Ramenmawii - Lunglei

2. Lalrinmuani - Ramlaitui

3. CS. Ramsangliani - Dungtlang

4. F. Lalawmpuii - Tuipui 'D'

5. Merabi Lalruatfeli - Tuipui 'D'

6.Lalrindiki- Hnahthial

7. Lalrinfeli - Hnahthial

8. Lalruatfeli - Hnahthial

9. Lalremruati - Hnahthial

10. Lalneihpuii - Denlung

11. Zodinpuii - Bunghmun 'W'

12. Lalruatdiki - Bunghmun 'W'

13. Lalthantluangi - Kanghmun 'S'

14. Lalenkawli - Thenzawl

15. Laltlanchhungi - Durtlang

16. Lalsangzuali - Sihphir

17. Marina Lalramnghaki - Kawnpui

18. Lalrinchhani - Kolasib

19. Agnes Malsawmkimi - Serchhip

20. Lalpeksangi - Rotlang 'W'

Coach : Lalrothuami (Bte-i) - Mamit

Manager : R. Lalnunmawii - Kawnpui

Mizoram Hockey team te tluang taka lo haw turin duhsakna kan hlan e.