KOLASIB DIET-AH MIZO IDOL GRACE-I DAMLAI THLA

TFD-in RTI Act hmanga Kolasib DIET hnena kum 2010-2011 aṭanga 2018-2019 chhunga zirtirtu thawklai te tana training an buatsaih zat te, training attendance sheet te, TA/DA an dawn zat leh an signature photocopy a dilna chhannaah Mizo Idol 2014 Grace Lalchhanhimi chu zirtirtu a nih hma in vawi eng emaw zat zirtirtu angin a training.

AIZAWL aṭanga tihchhuah kartin chhuak magazine The Frontier Despatch (TFD) chuan kum 2010 aṭanga 2013 chhunga Kolasib College-a kal Grace Lalchhanhimi chu kum 2015-a zirtirtu a ṭan hma khan ṭum nga lai Kolasib DIET-ah zirtirtu training anga tarlan a nih thu an ziak leh a, training-ah hian Grace Lalchhanhimi hian TA/DA pawh a dawng niin RTI Act chhannaah hian a lang a ni.

Kar hmasa lam khan TFD hian RTI Act hmanga zawhna an zawh leh an thil duh an dil, Kolasib DIET SPIO C Vanlalmawia, Principal ni bawkin a chhanna phek 500 chuang aṭanga an thil hmuh an lo tarlang tawh a, hetah hian Saiphai GMS zirtirtu, kum 2005-a pension tawh leh 2009-a thi tawh BB Chakraborty chu a thih hnuah ṭum 13 aia tlem lo Kolasib DIET hian training anga an tarlan chu an lo ziak tawh a, tukina TFD magazine issue tharah pawh zirtirtu a nih hmaa ṭum nga training anga tarlan, kum 2014 Mizo Idol Grace Lalchhanhimi, training anga tarlan a nih dan a ziak leh a, a thupuiah DIET KOLASIB-AH MIZO IDOL GRACE-I DAMLAI THLA a ti nghe nghe.

TFD hian Grace Lalchhanhimi, training anga tarlan a nih thu an ziah bakah hian zirtirtu ṭhenkhat, training anga an hming tarlante'n an training loh thu an sawina an ziak bawk.

TFD-in Kolasib DIET-in in-service teacher te tana training an buatsaih dan dik tawk lo a ziah chungchangah hian Kolasib-a Pathianni chhuak chanchinbu Bahzar-ah DIET principal hi a insawifiah a, hemi chungchang zawhna chhangin TFD magazine enkawltute chuan RTI Act hmang hian DIET-in zirtirtu training an buatsaih tawh zat te, zirtirtu training hming te, an TA/DA dawn zat leh signature photocopy an dil a, DIET-in Treasury aṭanga sum an lak chhuahna photocopy an dil lo niin an sawi.

- The Frontier Despatch (TFD)
(TFD Editor remtihnaa a ngai ang anga lakchhawn a ni e.)