GJC Annual Week Closing Function hmang

Aizawl | February 4, 2019: Government Johnson College (GJC) Aizawl chuan vawiin khan Annual Week closing function vawi 18-na leh Beat Contest Vanapa Hall, Aizawl-ah an hmang a, Mizoram Deputy speaker Er Lalrinawma'n khuallian niin a hmanpui.

He hun hi GJC Students' Union vice president David Lalrinchhana chuan a kaihruai a, college Principal Prof. K. Vanlalmawia'n thu sawiin, chawhnu lamah beat contest an nei a ni.

He huna thusawitu Mizoram Deputy Speaker Er Lalrinawma chuan, "Sorkar thil pawimawhah hmun hrang hrangah kan zin ṭhin a. Chung kan zinnaah te chuan, thil tihfel mai theih tura lang, tihfel ni si lo a titute'n hnam thinlung pu deuh sela chuan tih zawh mai theih tur hi ka hmu ṭhin a. Pathianin ram min pe a, hnam thinlung kan put a pawimawh hle a, hnam thinlung kan put chuan kan hna te a lo ṭhain hma kan sawn dawn a ni. He ram hi neitu nihna rilru nen i enkawl ang u. Kan ram hian a mamawh ber chu neitu a ni. Kan ram lui te tûrin kan hrai a, a chang leh ram kan hâl a. Hengte hi ram dang aṭanga lo kalte tih ni lovin keimahni tih ngei a ni. Kan ram neih chhun hi keini'n kan duata kan hmangaih loh chuan hnam dangin min enkawlsak dawn lo va; chuvangin neitu nihna thinlung nena kan enkawl a pawimawh takzet a ni," a ti.

Khuallian chuan, "College zirlai kan ni a, kan fai a, kan nalh hle. Helaiah hian kan nu leh pate'n thawmhnaw min pek ang ang hi lawm taka dawnsawn hi kan tih tur a ni. Kan fate hnenah hian kan theihtawka ṭha thawmhnaw kan pe ṭheuh a; kan retheih em em lai pawhin kan lo din chhuah theihna turin kan nu leh pate'n theihtawp an chhuah a, an neih tawk min pek lawm taka pawm hi a Pathian thu em em a ni," a ti a, "College zirlai kan ni a, kan fai a, kan nalh hle. Helaiah hian kan nu leh pate'n thawmhnaw min pek ang ang hi lawm taka dawnsawn hi kan tih tur a ni. Kan fate hnenah hian kan theihtawka ṭha thawmhnaw kan pe ṭheuh a; kan retheih em em lai pawhin kan lo din chhuah theihna turin kan nu leh pate'n theihtawp an chhuah a, an neih tawk min pek lawm taka pawm hi a Pathian thu em em a ni," a ti bawk.

Dy. Speaker Pu Rinawma chuan, "Hnam dang tihdan copy ai chuan keimahni'n kan pi leh pute tihdan kan chhawm, kan hnam ro kan vawn nun hian kan ropui zawk dawn a ni," tiin zirlaite mahni hnam thil ngai pawimawh turin a chah a ni.