Kum 2014 khân ka bialnu nên kan inhual a, inneih ngei kan duh avângin Civil Hospital, Aizâwlah ngei thisen kan entîr ve ve a, a rizal chu a râpthlâk a ni!
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
Ka bialnu nên chuan kum 3 lai kan inzui tawh a, tu mâ la mutpui loh ngat a ni a, kei pawhin a thianghlimna chu ka zahsak êm êm a, 'seks' hmanpui tûrin ka sâwm ngai lo a; anin min sâwm zâwk mah sela, mutpui atân chuan ka phal ngai lo ang. Tin, min sâwm ngai nahek lo bawk!
Chutia thisen kan entîr dâwn lai chuan ngaih țhat lohna pakhat mah kan nei lova, hlim takin damdawi in kan pan a; thisen kan entîr a, a tûka rizal lam tûra hrilh kan ni. Thisen kan lâktîr zawh hnû chuan ke ngatin kan haw dûn a, kawng tluanin kan titi a, nuih kan bâng lo.
"Bawih, i tho tawh em? Vawiin chu mi dang tam hmâin kal ila?" a rawn ti a. Sana ka han en a, phak chial chual chuan, "Mate, i van tho hmâ ve a, tinge a?" ka han ti a. "Inhmuh ka châk tawh lutuk a. Ka rawn phei hmâ dâwn a nia aw? Lo insiam dîm diâm ang che," a han ti zauh a, a biakbûr chu a fâwp ri karh a, a dah nghâl hmak a. Rilru a hlim duh veng veng khawp mai.
Tûkțhuan ka ei sawk sawk a, ka tih dân pangngai angin 'bus stand' bulah chuan ka lo nghâk fan fan a. Rei rial lovin a rawn thleng thuai a, bus ațanga a rawn chhuk chu a nui sâng a, angel hmêl màwi dân tûr ka ngaihtuah nghâl neuh neuh a. An mawi ngawt ang maw le, mihring mah kan mawi êm êm fo si a.
Damdawi inah chuan kan lût a, mi dang pawh an lo la tlêm khawp mai. Ka Duhtaki hming chu an rawn lam a, "Bawih, ka lût hmasa dâwn a nih hi. Hmeichhe dang i lo biak leh chuan ka khâwng kaih tawh ang che, hria maw?" a han ti pâng pâng a. Thîkthuchhiatna hi mipa thinurna chauh emaw ka ti țhîn a, hmeichhe thinrimna pawh a lo ni fo.
"Mate, lût mai mai teh. Be lo ang, be lo ang, i ninawm!" tiin ka han chhâng a. Ka nin lohzia hre mah sela, ka inchhîr thuak a. A hmêl chu a han dur deuh kheih khuih dâwn dâwn a, "Ninawm tihah, i tel lo chuan a ninawm țhîn, rawn chhuak leh vat ang che," ka han ti zawm nghâl zat a, nui sâng chungin a lût thei ta a nih kha.
Rei lo tê hnûah a rawn chhuak leh thuai a, hming indawta theh lût kan nih avângin ka sakhming chu an rawn lam ve leh khauh khauh a. Mi dang an tam lo bawk e tiin, "Mipa dang i lo biak chuan, ka fâwp kaih ang che, hria maw?" ka han ti ve deuh sáp a, nui ver ver chung chuan ka lût ta a.
Hmeichhe hmêl țha tak mai hi a lo țhû a, eng eng emaw min han hrilh neuh neuh lai chuan a 'make up' hman tûr te ka ngaihtuah noh noh a, "HIV hrik kan hmu tlat mai a..." a ti thut ta mai a!
Thu tam tak min hrilh tih chu ka hria. Mahse, thu min hrilh zozai erawh ka chhinchhiah thei lêm lo. Engtin nge kei hian HIV hrik ka pai theih? Eng vângin nge ka pai? Ka bialnuin hria sela engtin nge a awm ang? Ka nu leh pa ka hrilh ang em? Ka țhian te ka hrilh ang em? Rilru a bîng mup mup a, hmâi a sen awp awp a, thlantui hial a chhuak ta mai a!
Pindan râpthlâk ațanga ka han chhuak chu hmêl a danglam zova, "Bawih, tinge? Mawh? Tinge a?" tia zawhna chu khawvêla zawhna chhân harsa ka tih pâwl a tling kha a ni.
"Mate, ințhen a țûl. Kan ințhen a țûl," ka han tih chuan, angel hmêl mâwi tluka ka suangtuah fo hmêl chu a danglam țiam țiam a, "Aih! A theih loh. Ka ring lo. An ti sual a niang. Ti țha leh ang, a dik lo a niang. A theih loh," tih pah chuan a mittui chu a parawl kiang kiang a..
Mi dang awm leh awm loh pawh kan pawisa meuh lo. Rilru nâ leh thinlung nâ chu kan inkuah vawng vawng a, kan bula awmho te pawh khân thil awmzia chu an hriat thiam ngei ka ring.
Kut insuihin khawlaiah kan kal dûn ngai lo. Mahse, chu mi nî chuan ka kut a rawn vuan tlat a, kei pawhin ka thlah phal bîk lo a. Kalkawnga kal pah chuan a rûkin a mittui a hru zauh zauh a, hmuh a hrehawm khawp mai.
Chu mi nî ațang chuan ka Duhtaki 'phone call' chu ka la duh lo a, biak zawm pawh ka tum lo a. Zânah muthilh a harsa a, chhûnah muthilh a awlsam chuang lo a. Ka hun tawn zînga hun khirh bera ka hriat chu ka tawng țan a ni.
Chaw ei ka châk lo a, ni thum leh zan thum chu pindan ka chhuahsan meuh lo. Tuisikìn rilțàm a hnêm tâwk khawp mai.
Ka chhûng te chuan ka awm dân chu an hre thiam lo. Ka bialnu nên kan inti thiam lo emaw an ti a, inkhâwm tûr leh chaw ei tûr bâkin min túr meuh lo. Ka pa erawh chuan damdâwi ka ti leh ta emaw a ti hman a, ka tih loh thû ka hrilh nghê nghê a nih kha. Mahse, an awm a nuam bîk lo tih erawh a hriat theih.
"Inlêng i nei a nia, rawn chhuk rawh," tih aw ka hria a, ka nâu chuan pindan a rawn kik ri leh karh karh a. "U, tûnah rawn chhuk nghâl rawh. Inlêng i nei a nia aw, i hria em?" a rawn ti a. "Ka rawn chhuk," ti bâkin ka chhâng châk lo.
'Zanin angah tû tak chu rawn lêng ang maw' tia ngaihtuah noh noh pah chuan pindan chu ka chhuahsan a, 'sitting room' lam pan chuan ka chhukthla hnak hnak a.
Ka mi hmuh chuan min ti phu zawk!
"Ka pa hnênah rawn lên ka dîl a, ka rawn kal tawp," tiin ka Duhtaki chuan min han be hmasa nghâl a. Ka han hawi kual a, ka nâu bâk ka hmuh loh tâkah chuan, "Hâw leh nghâl rawh, nge i rawn lên a?" ka han ti tawp a. Ka thinlung ațanga chhuak erawh a ni hauh lo, ka rilru avâng zâwka chhuak a ni.
"Aih, ka haw tawh dâwn lo. Ka awm hlen tawh dâwn," tia a thusawi chuan min barakhaih tak zet. Ka lâwm a ni. Tukverh lam chu ka pan a, pâwn lam chu ka en vang vang a, tu dan rual loh mittui chu ka chhuah ve ta hial a; mipa, mittui tla ta chu ka inngainêp ru khawp mai. Mahse, tla sela ka duh êm avânga luang a ni lo tih erawh ka chiang e.
"Mate, inchungah thlifîm dawng lawk ang hmiang?" ka han ti hrâm a. Inchung lam pan chuan ka chhohsan nghâl a ni.
Inchung lamah chuan thu tam tak kan sawi a, 'Pretty Woman' ennawm ka en hnû ațanga KS ka ngaihzâwn thû te, zan khat chu hâwnna tûr a neih loh avânga a rûka ka pindana ka riahpui thû te, amah a insit êm avânga min kalsan thû te, chu mi avânga HIV hrik ka pâi ka inrin thû te kan sawi tel bawk a.
"Bawih, ka enkawl ang che. Fa lâk tûr kan zawng mai dâwn nia. I thih thlenga enkawl che ka duh a ni," zuk han ti a nih chu maw le!
Pathlâwi pakhatin a sawi, ka hriat reng chu 'hmangaihna hi âtna chi khat a ni' tih thû hi a ni. "Mate, min hmangaih tak zet chuan ka thû awih la, ka hmangaih che avângin min kalsan la ka duh e," ka han ti phawng ta mai a..
Ka âwmah chuan a rawn bei thlawp a, a țap zawih zawih a. Hnem ngaihna a vâng duh khawp mai. Ka hmûi ka pet fan fan a, mittui parawl chu tla lo tûra dan ka tum țang țang a, harsa tak a ni e.
Hâ êm chu țhial dûn lo mah ila, țah chu kan țap rei dûn ngial ngial khawp mai. Mittui hian thû tam tak a sawi a, thû tam tak a zêp bawk a. Hmangaihna chu hmangaihnaa hnar a ngai a, duhsakna chu duhsakna vêka hnâwl a ngai bawk sî lai chu thil namên a ni lo!
Chu mi zân chuan hreh takin ka thlah a, hreh takin a haw a. An in kawtah kan ding a, indichim takin kan infâwp vawng vawng a. "Mate, thlâ khi i hmu em? Ka en fo țhîn a, nang pawhin i lo en ve fo țhîn dâwn nia. Hmun hran daih ațanga kan thil hmuh rual theih awm chhun a ni țhîn. Ka hmangaih che a, hmangaih dang tawng la ka duhsak che. I tân ka rem tawh lo tih hre tlat ang che. Min kalsan dâwn lo mah la, keiman ka kalsan tho tho dâwn che a. Khawngaih takin ka lakah beiseina nei tawh suh ang che," tiin - hnuk ulh țeuh chungin a beng bulah chuan ka hrilh sê sê a. Sawi tûr hre lovin a ngâwi reng a, ka hawsan ta a ni.
Chu mi zân ațang chuan a rawn 'call' leh tawh ngai lova, kei pawhin biak ka tum leh ngai ta lo bawk a ni.
Hun a inher hret hret a, mahni chauh chuan tuar a harsa riauva, AIDS ka vei thû chu ka nu leh pa ka hrilh ta nghe nghe a. An rilru chu a na khawp mai. Mahse, ka nu leh pa hi Pathian țih mi leh țawngțai mi an nih avâng a ni ang e, thlamuan rûkna riau an nei bîk tlat țhîn.
AIDS han vei tâkah chuan nun a thawpik êm êm a, miin an hria ang tih hlâu rêng rêngin hun leh ni ka hmang a, ka thih dân tûr te ka ngaihtuah fo țhîn. Chhan leh vâng awm lova thinrim a awlsam fo a, mi dang hlim hmêl hmuh a hrehawm țhîn. Mi hrisêl tak te thîknain ka khat a, vânduai bîkah ka inruat tlat a.
Sakeibaknei anga a ei theih tûr zawnga phî ruai țhîntu chuan rei rial lovin, ka pumin min ei zo ta a!
Ka inkhâwm duh lo a, ka țawngțai duh lo a, Bible ka chhiar duh lo bawk a. AIDS ka vei chhanah Pathian ka mawhpuh tlat a, Setana tân ka inpumpêk ta thuai rêng a nih kha.
Ruihhlovin ka inchîu a, ka inchiuna chu a duh apiang ka hmantîr miah miah țhîn. Ka ruihhlo tihpui te hnênah chuan AIDS vei ka nih thû ka sawi ngai hauh lo bawk. Țhian țhaa ka chhiar ngam te ka hlat tial tial a, țhian țha lova ka ngaih te ka hnaih tual tual thung a.
'CALL GIRL' leh 'KS' tia an koh chu a tam thei ang ber 'condom' hmang lovin ka mutpui a, condom hmang lova min mutpui duh lotu pawh an tam khawp mai - an invêng ve tlat. Ka theih anga tam ngaihzâwng ka nei a, a hângin ka mutpui vek bawk a..
Ka pa mangang tâwp khâwk chuan chhûng inkhâwmna lamah AIDS ka vei thû leh țawngțaipui ka ngaih thu a sawi chhuak ta mai a, chuta țang chuan ina awm nuam ka tihna a reh zo a, thlamuanna hmun rêng rêng ka hmu zo lo.
Ruihhlo ka khawih a, hmeichhia ka mutpui țhin avângin ka pawisa neih ang ang chu ka hmang zo thuai a. Inchhûng bungrua ka hralh ru țan a. Ka nâu, phaia lehkha zir thuamhnaw phei chu ka hralh zo vat a. Gas bûr te leh inchhûng bungrua te chuan rei min daih lo a, mi dang thil rûk a lo ngai țan a. Nun engthâwl tak chu a ni hauh lo mai le.
Harh fîmin khawvêl ka hmachhawn ngam lo a, ka inphenna ber chu ruihtheihthil a ni mai. Ruihhlo ka lam reng duh si a, a tâwpah phei chuan ka zuar ve ta nghe nghe a. Zawrh chhuah tûr lâk lehna man ka daih tawh phawt chuan uar takin ka ti mai țhîn.
Ruihhlo hial ka han zawrh ve tâkah chuan in lamah inpêk a remchâng lo fo a, pâwnah ka riah chhuah phah ta zeuh zeuh a. A tîrah chuan țhian te inah ka riak kual den den a, a hnûah phei chuan hmun remchâng apiangah ka riak tawp mai țhîn a ni.
Vanapa Hall bula ka riah châng chuan zîngah hian 'coffee' leh chhang an rawn sem țhîn a, an thilsem chu nilênga ka inhnawhpuarna awmchhun a ni fo bawk. Zânah Salvation Temple lam ațanga Pathian Thu chhiar ri ka hre țhîn a, chu ri chuan mut a ti tui ve țhîn khawp mai.
Ka chhûng te ka hmuh apiangin ka biru ziah a, hmuh ka châk tlat lo. Ka piang ve a ni tih pawh theihnghilh hmak sela ka duh a ni. Anni chu ringtu an ni a, kei chu an rin dotu ka ni a, hmêlmaah ka ngai hmiah!
Țum khat chu ni dang ang bawka ruihtheihthil ka vawrh lai chuan tu emaw hian hnung lam ațangin ka kut a rawn vuan chawt a, ka han hawi lêt a, a hmêl ka hmuh chuan ka khûr hial a..
"Bawih, i thil zawrh kha ka duh ve. Khawi, rawn la nghâl rawh! Eng zâtin nge i zawrh a? Pawisa chu ka pe ang che! Ka ti ve duh, chu chu a ni mai - khawi!" a rawn ti nghâl bawrh bawrh ta mai a. Ka kut chu han lâksawn ka tum a, a kut khinghnihin min rawn chelh ta deuh deuh a.
"Zâwngi! Min thlah nghâl rawh. I biak tlâk ka ni tawh lo," tih pah chuan a kut chu han lâksawn ka tum zual sauh a, thih thâin a lo țang a ni ang e, ka phelh thei tlat lo mai!
Kan bula mi veivâk te chu an ding sup sup a, zah lâkin ka la lêm lo. Chutih lai chuan zah pakhat chiah ka nei țhîn, Setana. Amaherawhchu, 'bazâr police' ka hlâu êm êm thung a ni.
"Zâwnga! I kalna apiangah ka zui dâwn che tih hre rawh. I thihna hmunah ka thi bawk ang. Ruihhlo pawh ka zawrhpui mai ang che, hre rawh!" tiin a țap chhuak ta mai a..
Ka rilrûah chuan bazâr police an lian ber tlat a, ka han hawi kual thiak thuak a; mak ti hmêl ka hmu hnem ber a, thinur hmêlin a dawt. Nui hmêl pawh an awm nek nawk bawk.
Duh aiin a țawng thui ang tih ka hlâu a, ka kuah ta ringawt a. Mi țhenkhat chuan kut an lo bêng dar dar a, "Mate, Millenium Centre kawt lamah chho phawt teh ang. He lai hmun hi ka tân a him tâwk lo," ka han tih chuan a kut pakhat chu a la thlaa, a kut ding lam erawh chuan min la chelh tlat thung a, kan inkai chho ta hnak hnak a.
Dik tak chuan ka lâwm a ni. Ka thawveng êm êm a, khaw lum zual tak laia thlifîm dawng heuh heuh ang mai hian ka awm a. An sawi dam lai piarâl chu la hmu lo mah ila, a bula vâukam vêl hmu ta hial ang mai ka ni e.
Kan ngaihtuahna a kal tluang ve ve pawh a ni mahna, eng thû mah sawi lo ve vein Millenium Centre kan thleng țhak a, a kawtah chuan țhut hmun kan rem dûn sauh sauh a, sawi tûr kan ngah dûn khawp mai.
Thim thlengin kan titi a kal tluang a, lungawi taka ka nuih lohna a rei tawh a, lungdama âm takin ka nui bâwk bâwk a. Thusawi laklawh lai te chuan kan inen vang vang a, chhan leh vâng mumal nei lêm lo te chuan kan han nui dûn leh ringawt țhin a. Aw, hun hlimawm chu a van ni êm!
Ka inrin hmâin kan kiangah chuan pulit pahnih hi an lo ding reng tawh a, "Heroine i zuar țhîn tih ripâwt kan dawng a, 'lock up' lamah chho ang le," tih pah chuan kawl nêlawm loh tak chu pakhat zâwk chuan a han phawrh a. "Ka pu, ka pasal a ni a. Khawngaih takin kawl chu buntîr lo hrâm teh u. Ka rawn zui ve dâwn che u," a ti ta reuh a!
"Sir, kei chuan ka bun hreh hauh lo. Nimahsela, amah avâng talin min buntîr lo mai teh u. Thû ka awih ang," ka han ti ve mai bawk a.
'Lock up' kan thlen chhoh hnûa tih fel tûr ang ang kan tih fel hnû chuan hmun nêlawm lo takah chuan ka tâng ta a. "Bawih, i chhûng te ka hrilh ang a, an rawn ngaihven mai ang che," tiin min han thlamuan a tum hrâm hrâm a.
Haw tûra kan intur nak nak lai namêk chuan mi pakhat hian, "Hei, pawisa bo chhar chungchângah FIR ka rawn theh lût duh a, in buai viau em?" a tih thâwm chu kan hre phâk a.
"Awi! U Duhawma a niin ka hre tlat, ka va be chhin lawk ang e, Bawih," tih pah chuan ka awmna rimtui lêm lo tak ațang chuan a phei nghâl a..
Darkâr chanve hnu vêlah chuan pawisa zât chu chêng singriat chuang a nih thû te, TV kal tlanga a neitu zawn ni sela an tih thû te chu an sawi zo var a.
U Duhawma a tih mai chuan, "Pu te u, thu dang alâi chuan thil pakhat. Hei, kan nâu in lo man reng mai a. Eng vâng nge ni ta?" a han ti ta mai a nih kha!
"Ruihhlo zuar țhîn a nih thû kan dawng a, hotu te lam ațangin man tûra tih kan ni a, ni thum lai kan zawn rûk rauh rauh hnûah nichin lawk khân an nu nên Millenium Centre kawtah an awm tih kan hriaa, kan la nghâl a nih kha," tiin pa pakhat chuan hawihhâwm takin a han chhâng a.
A hmâ lawkin min dap chhuak dáp a, ruihtheihthil kawl lai engmah an hmu lo a ni.
"A nih chu maw le. Tûn hmâ chuan a zuar țhîn ngei alâwm. Tûn hnâiah erawh chuan kei phei chuan a zuar tih pawh ka hriatpui meuh lo. Finfiahna te in nei em ni? Kan nâu a nia, in hotu te biak dân a awm em aw? Ngaihdam dîla chhuah ngensak ka duh khawp mai," tiin u Duhawma chuan ka tân țawng a cheh ta miah miah ta mai a, mak ka ti khawp mai.
A nâu ka nih ka hre ngai lo a. A hmêl lah ka vawi khat hmuhna a ni a, eng ti fakauvin nge ka Duhtaki nên an inbiak ang le tih chu ngaihtuah tham a ni hial!
Ka hriat ve phâk loh chuan an ri deuh nak nak a. Pulit pakhat hian u Duhawm chu a ko pêng a. Minit 10 vêl hnûah chuan a hmêl ka hmu leh ta a. Pulit pakhat chuan min rawn pan a, rip inkalhna chu a rawn hawng a, "I chhuak rih thei e," tiin min rawn hrilh ta mai chu a nia, a lâwmawm duh khawp mai.
Ka lâwmna ber zâwk chu ka Matei-ah a lungphûm a innghat tlat a, a sakruang vêlah chuan lungdamna banin a hual vêl bawk a; ka intenna erawh chuan ka thinlung thawnthû laimu a ziak reng fo țhîn.
Ka Matei u Duhawma chuan a buai deuh thû min hrilh a, lâwmthu bâk kan inhrilh hman meuh lo. A rawn lang a, a liam leh nghâl a. Kan tâna a thiltih erawh ka nghilh ngai lo'ng. Ka tân chuan Samari mi țha tluk thawthânga hlû a ni tlat asin.
"Bawih, zânin chu khawiah nge kan riah dâwn?" tia zawhna chuan min barakhaih chiang hlê!
AIDS vei ka ni tih theihnghilh meuh khawpin boruak dang ka hîp nilêng a, "Mate, nang i riahna hmunah, kei ka riahna hmunah," ka han ti sam et a. Ka thinphû chu a phut dân pangngaiin a phu hauh lo tih ka chiang êm êm a ni.
"Fiamthû lovin. Bawih, tlân bo daih ila? Kan nih nih kan ni tawp mai dâwn nia. Mawh, tlân bo ang. Mawh?" a ti lehpek a, ka nui! Pathlawi pakhat thusawi, 'hmangaihna hi âtna chi khat a ni' tih kha ka han hre chhuak leh iar uar a.
"Mate, kei chu hei ka tlân bo tawh a. I duh leh rawn tlân bo ve mai rawh," tiin a rilru ka han dêk fiam leh hlek chhin a. "Zâninah khawiah nge i riah dâwn? Pawisa i nei tlêm rih bawk sia. Treasury Bazâr-ah nge, Vanapa Hall bulah?" tiin min han zâwt nghâl var a.
He nâu hi chu a mak a ni. Hmangaihna luhlul neitu a ni a, a ât ang ang hian hmangaihna sâng ber phût lo mah sela a phû êm êm a ni.
"Haw leh phawt la, tlân bo dân ka lo ngaihtuah char char dâwn a nia. Tûnah hian heroine hâwng 40 neitu nên kan inbe mêk a, a fuh chuan bul țanna tûr chu kan nei mai ang," tia ka hrilh chuan a hmêl a dam sawng sawng a, bus ațanga a rawn chhuk hmêl ang țhîn bawk kha a pu leh ta a.
An in kawt thleng ka thlah a, kawngkâa a luh rualin a pâin a bêng nghâl chawrh tih pawh ka hmu a. A nuin a pa a hauh lai chuan rilru na tak chungin ka kalsan a ni.
City Park bula inrel pakhata riak tûrin rilru ka siam fel a. Ruihhlo avângin ka chêr chhe hlê tawh a, Setana hnênah duh ka dîl țhîn. Mahse, ka dîl min pêk tâk han sawi tûr pakhat pawh ka hre map lo a, Pathian lakah ka hel laklawh a, ka be vêl mai mai niin ka inhria.
Inrel ka thlen hnû chuan iptêa ka ah kual reng, ka mutbû chu ka la chhuak a, ka siam sawk sawk a. Ke hlîra nilênga vâk kual ka nih avâng pawh a ni ang e, rei rial lêm lovah ka muhîl nghâl bawrh bawrh a.
"Bawih, tawlh phei deuh teh," tih țawngkam chuan min țhâwng harh chiang kêk kâwk khawp mai. Ka intung tho vut a, ka sîrah chuan ka Duhtaki chu a lo mu zâl ve thên hi a lo nia..
"Bawih, thih thlenga i tâna rinawm tawh tûrin ka rawn pan che a ni e. Min hnâwl bîk suh aw?" a han ti a.
"Mate, nang êm chu hetah hian riak ve lul lo e. Khaw'maw i 'phone' kha rawn la lawk teh. Ka pa ka han bia ang e.." tih pah chuan a biakbûr chu ka lâksak nghâl a.
Kawngpuiah chuan ka chho a, 'Mom' tih hming chu ka hmet a, a nu chuan rang takin a lo la nghâl thuai a, "City Park bulah kan awm a, tûnah rawn lam nghâl thei ula ka va ti ve? Aw, ni e. Keimah.."
Thu dang ka sawi hmâ chuan 'phone' chu a rawn phih țhuai a, ka inring hman meuh lo. "Bawih, ka hmangaihzia che hi i la hre khawp ang. I la hre khawp ang.." ti mawlh mawlh chung chuan Sikulpuikâwn lam panin a tlân nal nal a.
"Mate, ding lawk teh. Khawngaihin, ding lawk teh!" tia âu chung zêl chuan ka han ûm ve tak ngial a, ngawlvei chawrchê thapui chuan thui a tlân thei ngang lo a ni.
Chu zân chuan ka inngaihtuah zankhua zak a. Thingchangvâr vêlah chuan Baja Tlâng lam panin ka inak chhuak a. A hmun ka han thlen meuh chuan khua pawh a vâr iar uar țan a.
Kan 'missionary' hmasa te lungphun chu ka han dawm vang vang a, mittui tla chung chuan a hnuaiah ka chhuk a. "LALPA, Setana betu, AIDS vei, rilru tenawm tak putu Pathian i la ni duh a nih chuan hmangaih ka nei a, khawngaih takin ka hmangaih hi pasal țha tak pe ang che," ti bâkin ka chham lo.
Hmangaih mitthi sûn hlim ang maiin ka lung a chhia a, ka nun ka thlîr lêt zung zung a, inchhîrnain ka khat a, ka țap chhuak hawm hawm ta hial a..
Thâwklehkhatan 'electric current' man ang maiin ka taksa pumpui chu a rawn țêk chuai a, țap lai ka bâng chiang kher mai. Ka hlâu a, chu hmun chu ka kalsan nghâl a.
Unâu tluka ka ngaih, tûn hmâ pawha a ina ka riah luh fona, țhianpa Edward-a in lamah bawk chuan ka lût leh rãwih a. Ruihho sim ka duh thû a hriat chuan a lâwm êm êm a, OST leh AIDS damdawi lâkna tûr te min ngaihtuahpui nghâl zung zung a, Pathian hnênah chuan lâwmthu ka sawi ve leh țan ta a..
Unâupa Edward-a inah chuan thla 3 chhûng zet zawt ka awm a. Zan khat chu kawngkhâr a rawn ri dat dat, ka va hawn nâk chuan ka pa țhianpa ka hmu hlawl ta mai a!
Țhu khawmuang lêm lo chuan ka chhûng tein ka chanchin an ngaihven fo thû te, min zawn fo thû te, an manganzia thû te min hrilh nghâl mawlh mawlh a. Ka hnuk a ulh țeuh a. Chu mi zân la la chuan min phur haw nghâl a, in thlengin min thlah thlap a.
Chu mi zân tluka kan chhûngkaw hlim zân chu a tlêm khawp mai. Ka hlìm erawh a kim tlat lo a, ka nu biakbûr chu hmansakin ka Duhtaki chu ka be pawp nghâl nghe nghe a.
Ruihhlo tih leh zawrh ka sim thû te, ina ka haw tâk thû te chu ka hrilh hmasak thil an ni. "Bawih, kei chu kan inhmuh hnuhnun ber zân ațang khân inah ka la haw lo hrim hrim. Natûkah thisen 'test' dûn leh ngat ila, chu mi zawh chuan inah ka haw ve ang. Dâr 10, damdawi inah aw. Chuan, kan inneih theih tawh ngei ka ring bawk. Hei, ka dah dâwn a nia aw? Hnathawh a ngai a.." a han ti zung zung a.
"Hnathawh a? Zân zânah maw? Eng hnâ nge a?" mak ti takin ka han ti a.
"Naktûkah engkim ka hrilh fiah vek dâwn che a nia. Miin min nghâk mêk a. Bawih, 'bye' phawt," tih pah chuan a tih dân fo țhin angin a biakbûr chu a fâwp ri sak a, a dah nghâl a.
A tûk dâr 9:30 ațang chuan damdawi in, thisen entîrna pindan bathlârah chuan ka nghâk ta a. Dâr 10 a ri a, a rawn lang mai lo a. Biak ka han tum a, a biakbûr chu a hmet hlum tlat mai bawk si a, awm a nuam lo țan. Dâr 11 a rîk meuh chuan țum 30 chuang chu biak ka tum hman a ni. Nilênga nghâk tûrin rilru ka siam bur a, 11:30 rîk dâwnah chuan a rawn thleng a.
Pawr fep hian ka hmu a. Mut kham ngai lo hmêl a pu a ni. A dâng bel a, ei leh in țha hmu mumal lova ka awm lai hmêl ang kha a puin ka hria. Ka bula a rawn țhut rual rual chuan, "Mate, i damlo em ni? I țha maw?" tia zawhna a hriat chuan a nui sen sen a, "Bawih, i dam loh chuan ka dam lo a ni mai," a ti sap a.
"Bawih, i rin aiin ka 'inno' tawh bîk vak lo ang. Mahse, pawi ka ti lo a, pawi ti bîk suh. I kianga ka awm ve theihna tûr a ni mai," a ti sam et a.
Thisen kan laktîr zawh hnû chuan Millenium Centre kawtah kan phei a, darkâr 4 kan titi hnûah a intiam ang ngeiin an inah chuan ka thlah a. An kawngkâa a luh rual chuan a nuin, "Awi, mami, mami, i va rawn haw har êm êm ve.." tia a țê chêl chûl lai chu ka thlîr reng a. Rilru dam takin ka haw leh thei ta a ni.
Zânah chuan WhatsApp hmangin kan inbia a, a pâin a hauh loh thû leh a lâwm êm êm zâwk thû min hrilh te chuan thinlung a ti hlim vawng vawng a. A tûka thisen entîrna rizal lam dûn leh tûrin kan inthurual a, mut zâi kan rêl dûn a.
Zîngah chuan WhatsApp hmangin ka va bia a, dâr 10 rîk dâwn pawha min la rawn chhân lêt loh avâng chuan ka ngaih țha lo chuan ka va 'call' a..
"Matei hi a damlo a. Rawn ti buai rih suh. Pâwna chhuah a pâin a phal lo!" tiin a nu chuan ka Duhtaki biakbûr ațang chuan min rawn hrilh a, a dah nghâl hmak zui a. Thin a khei zak mai!
Ka Duhtakin thisen entîr a ngai pawimawh êm a tiin rizal lam tûr chuan ka chhuak ta a. 'Confidential' thil mah ni sela, a thawktu khân kan inkawp tih a hre chiang thawkhat a, 'test result' chu a pahnihin min pe chhuak phal hrâm a.
Keimah NEGATIVE, amah POSITIVE..
***Hei hi chhunzawmna HETAH aw.-
(Thlalâk: Non-google image!)
- Tlângau@Artui uih Street.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: