ZU ZUAR FANU 13

CHAPTER- 13

R'z Thangluah✍🏻

"Engvanginnge Msi kha i tihmualpho kher a? I thik vang a ni tiraw?,"tih pahin Kimkima chu a hnek thal tawp mai a. Kimkima chuan,"Tunge i nih a? I chaklo ang,"tih pahin rawn thawh leh mai a tum a. Mahse,a rawn thawh fel hma in chupa chuan Kimkima chu a lo pet leh ṭawk mai a,lei charah chuan Kimkima chu a mu hlawm reng mai a,"I sawi dawn nge police hnenah ka hlan dawn che?,"a ti leh a. Kimkima chuan a pum a dawm a,a ṭhen tlawk tlawk mai a,"Tunge i nih ka tih chu?,"a rawn ti leh a. Chupa chuan,"Tunge ka nih hi i hriat kher a ṭul love,Msi kha engvanga timualpho nge i nih sawi la engkim a ṭha a ni mai,"a ti leh a. Kimkima chuan ngeiawm zeta nuih pahin,"Huh kha zu zuar fanu kha maw? A nihna ka sawi mai a nihkha,chu chu engnge i tan a pawina?,"a ti ham ham mai a. Chupa chu a thinrim tawh khawp mai,"I sawi dawnlo anihchuan police ka phone a nga,anni chuan an dawp chhuak thei ngei ang che,"tih pahin a phone chu a khawih nuap nuap a. Kimkima chuan hlaithawng hmel takin,"Nilo nilo khawngaihin phone suh,ka sawi ang engkim ka sawi vek ang,"a rawn ti nghal chul mai a.

"Kan veng aṭang khan class-xii exam kha kan tam lo khawp mai. 15 vel chiah kan niin ka hria,chuan mipa awmchhun ka ni bawk a. Result a rawn chhuah a,Msi topper anih thu ka hriat khan ka thinrim khawp mai a. Mahse,tih theih ka nei silo,thinrim tawh sa nak alaiin ka pa in hmeichhia pawh tluklo tiin min hau leh a. Tichuan,Msi tihmualpho dan tur chu ka ngaihtuah ta a. Ka sim card hman ngai tawh loh chu net pack ka thun a,rei lo te atan whatsapp khawih nan ka hmang ta a. Chu sim card chu tumahin ka number a ni tih an hre tawhlo,tichuan ka ṭhianpa 1 hnenah news group 1 link ka dil a. Chu group chu ka join ta a,ka join aṭanga rei vak lo hnuah Msi chu topper anih thu leh mi tamtakin an lawmpui thu an lo post leh chiam chiam mai a. Chuan,ka nghak hret a kha thu kha ka post ta a ni. Chuan,ka post zo chiah tihin sim card chu ka phawi leh nghal hmak a,tuman min chhui zui theih lohna turin. Mahse,nang hian min lo chhui chhuak tho sia,"a nui hul hak a.

"I fing ve reuh hle mai a. Mahse,i fing famkim lo a nih hi tiraw? Kha thu i post zawh khan,i sim card kha phawi nghal mah la kha group i post naah khan i number kha a lo la awm reng a. Kha kha i hrelo a ni tiraw? Chuan,kan chhui zui che hi i ringlo bawk ang tiraw?,"Kimkima kawr awmah chuan a ṭham a,"Kha number vek khan tunah hian kha thil kha i thik vanga ti i nih thu sawi leh ang che,"a tih zawm nghal zat a. Kimkima chuan,"Kha sim card kha chu ka zai chhia a,ka paih daih tawh lawm,"a lo ti vat a. Chupa chu a nui sun sun a,"Chuti anih si chuan he sim card nung sa hi i phone ah khan vuah la,kha mi news group ah khan va post leh ta che,"tiin sim card thar hi a ipte ṭang chuan a rawn phawrh a. Kimkima chuan,"He thil ti tur hian tunge tir che a?,"a ti ve mauh mai a. Chupa chuan,"Min tir tu thleng thlengin i hriat a ṭul love,ka thu chu zawm mai rawh,"a rawn ti chang fak mai a. Kimkima pawh chuan a phone chu a hawng a,a sim card in vuah sa chu a phawi a. Chupa sim card pek chu a phone ah chuan a vuah ta a. Chupa chuan,"Khawmaw news link chu ka lo join sak ang che,"tih pahin Kimkima phone chu a la a. Kimkima chuan,"Link pawh a awm loh hi,"a lo ti ve ngat a. Chupa chuan nui hak pahin,"Link chu ka thluakah hian a awm,"tih pahin a type nghal mawlh mawlh a,a join nghal a,"Lee nangmah i type dawn nge ka type dawn?,"a ti leh a. Kimkima chuan,"Ka type ang,"a lo ti vat a,a type nghal mawlh mawlh a. A type zawh hnu chuan chupa chuan a en dik leh vek a,"Umm a ṭha e mipa naupang fel tak i nih hi,"tih pahin Kimkima darah chuan a beng thak thak a.

Kimkima thu post chu a darh zau chak leh hle mai a. Mi zawng zawng chuan mak an ti a ni;mahse,a post tu hming erawh tuman an hre lo a ni. Msi erawh chuan post a chhiar hmasak ber aṭangin post siamtu chu Kimkima a ni tih a hre nghal thei a. Ngaihdamna thu ka post ve nghal dawn mawn aw tia a in ngaihtuah vung vung lai chuan,Sangtea chuan a lo call a;

"Aw Sangte,"

"News kha ka lo hmu a,"

"Nia hei keipawh ka chhiar mek a,"

"Kimkima a nih i ring ve tho em?,"

"A sawi dan kal hmangah hi chuan amah lo rin tur an awm hleinem,"

"Nia chuan engtianga hma lak nge i tum a?,"

"Hma lak vak ngai hleinem,"

"Maw? FIR i theh lut dawnlo mi?,"

"A ṭul ber lo,ka ngaihdamthu post ka siam a nga a tawk a ni mai,"

"Nang hi i â ta mi a?,"

"Â love le,"

"Khatiang ngaihdam tlak pawh a nih loh kha,"

"Ngaihdam tlak loh nia kan hriatte hi a sin ngaihdam tlak ngawih ngawih zawk chu,"

"Huiham ka rawn chhuk ang ka rawn thlen hma chu engmah lo ti suh ang che,"

"Ekhai,order a va khauh ta ve,"

"Ka rawn kal a ni mai,ka dah nia,"

Sangtea chu a rawn thleng thla rang kher mai,"I â deuh mi a?,"a rawn ti nghal ringawt a. Msi chu a lo nui mai a,"Nghal ringawt a che,"a lo ti vat a. Sangtea chuan,"Ngaihdamna thu chu post i tum mi a?,"a ti leh a. Msi chuan,"Ka tum chu ka hlen ṭhin,"a lo ti sap a. Sangtea chuan,"A ṭha nihchu i duh chu ti la,keipawn ka duh ka ti ang,"a ti hluk a. Msi chuan,"Eng thil nge tih i tum a?,"a lo ti nghal vat a. Sangtea chuan,"Kimkima ngaihdamna thu i post chuan,i ṭhiannu hi ka ṭhen nghal ang,"a ti sak sak mai a. Msi chuan,"Eng a? Kimkima leh Emily chuan engnge inzawmna an neih a? I ngam chuan ṭhen rawh,"a lo ti ve hmak mai a.

"Ka tihpalh,ka lo vin leh vak ṭhin che a,"tih pahin Sangtea chuan Msi darah chuan a va vuan a. Msi chuan,"A ho lutuk,ka tih tur chu ka zo e. Chuan,nangpawh Emily hi ngaihsak ve deuh ṭhin rawh,"a lo ti thung a. Sangtea chuan,"Ka ngaihsak lo mi a?,"a lo ti vat a. Msi chuan,"Ngaihsak lo lutuk,nizanah pawh i be lo. A rilru a na hma tih pawh i hriat kha duat hle ang che,"a ti leh a. Sangtea chuan,"Nihchuan khapa kha i bialpa mi?,"a ti ve thung a. Msi chuan,"Tu?,"a lo ti hâ mai a. Sangtea chuan,"Max kha?,"tih pahin a nui suk a. Msi chuan,"Awii i ti awm ang lo thei e mai a,kha chu classmate ve mai mai nihkha,"tih pah chuan a lo nui hawk hawk a. Sangtea chuan,"A rukin in ni chiang,"a ti leh a. Msi chuan,"Awii i ti awm ang lo thei e mai,anni ang te kha chu kan phû lo,"a lo ti leh a. Sangtea chuan,"Phû loh a awm thei lo,"a lo ti vat a. Msi chuan,"Keiman awm thei ka ti lawm,"a lo ti ve thung a. Sangtea chuan,"Awm thei lo,"a ti leh a. Msi chuan,"Huiham ka tlawm e,i chak,"tih pah chuan a nui sen sen a.

Pi Zuali chuan,"I bialnu chu inah te hian rawn hruai ve la,i pa pawn a hmu ve chak a sin,"a lo ti a. Sangtea chuan,"Nuamlo a ti palh ang,a la naupang ve bawk sia,"a lo ti vat a. Pu Thanga chuan,"Khawi lam mi nge a nih a?,"a lo ti vat a. Sangtea'n a chhan hma chuan Pi Zuali chuan a lo chhang vat a,"Zarkawt a mi a nia,a nu chu nurse a nia. A pa chu PHE Departmentah a thawk a ni awm e. A hmel pawh a ṭha khawp mai,"a lo ti nghal mawlh mawlh a. Sangtea chuan,"Umm ka nu sawi ang kha ni mai,"a lo ti sup a. Pu Thanga chuan,"Nihchuan tun Sundayah hian kan In a chaw ei turin sawm la,"a lo ti ve bawk a. Pi Zuali chuan,"Nia a tihchi ngawt ang,"a lo ti ve nghal vat a. Sangtea chuan,"Nia ka lo be chhin dawn nia,"a lo ti ve mai a.

"Ka hmangaih che tih hi hre lo law law la a ṭhat zawk ka ring. Ka tan chuan ka ṭhiannu i tih hlimna ringawt pawh kha a lawmawm zo zai tawh lutuk,"ama hriat tawk lekin Msi chu a phun sep sep a. A phone gallery a Sangtea thlalak ho chu a en leh vang vang ṭhin a,"Ka ṭhiannu hi i tih hlim chhung chuan kei chu ka hlim a ni mai,"a ti leh sap a.

"Tun Sunday hian kan in lamah chaw rawn ei phei ve ta che. Ka chhungten an hmu ve duh che a,"Sangtea chuan Emily sama chul heuh heuh pah chuan a sawi a. Emily chuan,"Awii ka zak e a,"a lo ti vat a. Sangtea chuan,"I duh loh chuan ka ti lui lo che nia aw,"a lo ti ve vat a. Emily chuan,"Ka hrelo le ka chhungte pawh ka lo rawn ve phawt a nga,"a lo ti leh a. Sangtea chuan,"Awle,"a lo ti vat a. 

"Duat,tunlai hi i mizia hi a dang riau in ka hria,"Emily chuan Sangtea chu thlahlel tih hriat tak hian a rawn ngheng a. Sangtea chuan,"Engtinnge ka awm a?,"a lo ti vat a. Emily chuan,"I ṭawng tlem em em a,chubakah kan inbiakin sawi tur i hre ngai lo. A hma kha chuan sawi tur i ngah theih ṭhin em kha,zanah nise rawn leng turin sawm zel i ngai bawk si,"a ti leh a. Sangtea chuan,"Nia,tunlai chu thil dang ngaihtuah ka ngah deuh a tin ni. Min hrethiam dawn nia aw,"a lo ti ve a. Emily chuan,"Eng thil nge i ngaihtuah a? Ka hriat ve loh chi a ni mi?,"tiin Sangtea chu beisei nei tih hriat tak hian a lo melh a. Sangtea chuan,"Chhungkaw lam thil a nia. Nakinah ka la hrilh ang che,"a lo ti thung a.

"In zak em? I pa hi min ti zak khawp mai,"tih pahin Pu Chhuana chuan a fapa te 2 chu a hlap leh pawp pawp ṭhin a. Pu Siama chuan,"Khaih khaih Pu Chhuan,duhtawk rih teh. Ṭawngkamin sawifel i tum zawk ang u,"tiin a lo khap a. Pu Chhuana chuan,"Ṭawngkam hian a daih seng tawhlo a nih ber hi,Bible pawn kan fate ṭhatna tur anihchuan vuak a phal a lawm,"tih pahin a hlap leh pawp pawp mai a. Pu Siama chuan,"Khai a tawk tawh e,puitling an ni tawh a ṭha zaiin sawi teh ang u,"a lo ti leh takah chuan,Pu Chhuana pawh chuan a duhtawk ve mai a.

"Bawih,naktuk tlaiah Sangtea te Inah chaw ka ei dawn sin. Mahse,chumi hma chu in inah rawn len ka duh a,"

"A ni maw? A chhungte a hmelhriat tir dawn che nimaw? A lawmawm lutuk,immm i lo leng dawn nia,"

"Chuan,zawh tur che ka nei ṭeuh maithei nia aw,"

"Eng lam pang?,"

"Sangtea te chhungkaw chanchin maw le,blind deuhin ka leng lut ang tih ka hlau lawm,"

"Lungngai suh an chhungkaw chanchin hrilh tur che in keimah nilovin,an chhumgkaw zing a mi ngeiin a hrilh ang che,"

"Tu?,"

"I rawn kal hunah i hre mai ang hihi,"

"Hmmm...enteh,hetiang em em hi chu a tih ka ring lova. Ka lawm tawp a ni mai,"

"Umm nia a ṭha lutuk lawm,confi deuh khan awm phawt mai la aw,"

"Ummle chuan naktuk chu chawhma inkhawm banah ka rawn phei dawn nia aw,"

"Awle mahse,Sangtea i hrilh em?,"

"Umm hrilh vek tawh e,"

"Awle ṭhat nasat chu..,"

"Nihphawt aw naktukah kan sawi chhunzawm dawn nia aw,"

"Awle bye,"

"Bye,"

Zomuanpuia te unau a pa in a man a,a vuak thu chu an veng chhung ti ti tam ber a ni leh ta. Mi tamzawk chuan Pu Chhuana chu pa ṭha tak leh mahni fate pawh an dik lohnaah chuan vaw ngam,mi dikah an ngai a. Ṭhenkhat erawh chuan an chhungkaw game khelh bak a nih an rin loh thu an sawi bawk a. Mahse,mi tam zawk rilru chu a hmin tawh tho tho a ni.

Sunday chawhma inkhawm ban a ni a,Mawii leh Rki leh Msi te 3 chu an inzui haw leh hnak hnak a. Mawii chuan,"U Sangtea bialnu hi ka hmu ve chak tawh khawp mai,"a lo ti ve a. Msi chuan,"E Mawi,kan inah i lo leng hman a ngem?,"a lo ti thung a. Mawii chuan,"Engtikah?,"a lo ti vat a. Msi chuan,"Tunah,"a lo ti leh vat a. Mawii chuan,"Ka hrelo le ngatinge a?,"a lo ti leh vat a. Msi chuan,"Emily hian Sangtea te chhungkaw chanchin kimchang hi hriat phawt a duh a. In ina a rawn len hma in kan inah a rawn kal dawn a,tahchuan engkim hrilh la ka duh vang a nia,"a ti leh a. Mawii chuan,"Nangman hrilh mai la,"a lo ti thung a. Msi chuan,"Keima sawi chu a mawilo a lawm. Lehlamah ka ṭhianpa Sangtea a nia,lehlamah ka ṭhiannu Emily a ni leh bawk sia,"a lo ti leh a. Mawii chuan,"Nia i tan chuan a rem chiahlo lawm. Ka in thlak a nga ka rawn chhuk dawn nia aw,"tiin an in pen san ta a.

"Msi chu i bem dawn maw ka tia,a ṭhiannu zawk i lo bem daih a tinge?,"Lawma chu a nui hak hak a. Sangtea chuan,"Ka duhdan a ni bik hleinem. Mahse,a ṭhiannu pawh hi a fel lutuk tho lawm,"a lo ti mai a. Lawma chuan,"Engnge i duh dan nilo chu?,"a lo ti thung a. Sangtea chuan,"Nakinah ka la hrilh ang che. Thil thlen dan hi a buaithlak lutuk,"a lo ti vat a. Lawma chuan,"Ee nizan Zomuanpuia te unau zu rui,a pa in a man kha i hre ve em?,"a lo ti daih a. Sangtea chuan,"Aw hria e ngatinge a?,"a lo ti hâ mai a. Lawma chuan,"Thil te hi i hrethiam har bik thei sia aw. In thlan a hnai tawh a,an pafa in game an khel a nih hi,"a lo ti mai a. Sangtea chuan a la hrethiam chuanglo,"I sawi awmzia ka man hlawl lo,"a lo ti leh a. Lawma chuan,"A van buaithlak ṭhin e aw,nakinah kan la in hrilhfiah dawn nia aw. Nihphawt aw kannu in min lo nghak reng tawh ang,"tih pah chuan a nui hak hak a. Sangtea pawh chuan,"Awle nih le,"tih pahin an in lamah chuan a peng ta a.

"Ihmaw,kan chhungkua chu maw keimah nen hmeichhia 4 kan awm a. Chuan,mipa chu U Sangtea leh Ka pu a ni mai,U Sangtea hi an unau zinga naupang ber a nia. U hmeichhia 2 a nei a,1 zawk chu a thinchhe pangngai a. 1 zawk chu a ṭawng tam lem lo;mahse,a ṭawng chhunah chuan áwka zaidam a nei lem lo. Chuan,Pi ber hi chuan sum bak ngaihtuah a nei tehchiam lova. Pu ber leh U Sangtea hi chu tlemin an mizia a dang deuh,an chhungkua ro ro ah pawh an zaidam a,an fel bik. A bak chu i rawn kal hunah i hrethiam chawp ve mai ang. Ka tan sawi vak vak kha a mawi lova,"tiin Mawii chuan Sangtea te chhungkaw dinhmun dik tak chu a hrilh ta a. Emily chuan nui sâng chungin,"Ka lawm lutuk e aw,nangpawh hi Sangtea chuan i fel zia thu min hrilh nasa ṭhin a lawm. Chuan,tuna i sawi chin bak kha chu Sangtea pawn min hrilh bik lo,"a lo ti nghal vat a. Mawii chuan,"Nia nangpawh hi i hmelṭhat thu min hrilh ngun thei lutuk,"a lo ti ve ngawt a,a hrilh ngai tawp silova.

Tlai lam dar 3.00pm velah chuan Sangtea te chhungkua pawh an kim ṭhap tawh mai. Sangtea te 2 chiah chu an nghah tawh ni,rei vak lo hnuah Sangtea te pawh an lo thleng ve nghal a. Emily chu a zam ve ngang a niang,a khur ve der der thei nia.

"Aa hei hi ka pa a nia,"tih pahin a pa bulah chuan a kal phei pui a,an in chibai nghal a. Pu Thanga chuan,"I hmelṭha hle mai a,"tih pahin a lo nui var var a. Tichuan,midang ho pawh in hmelhriattirna neiin a chibai kual zel a. Emily chuan a hupurh ang aiin nuam a ti zek a.

Ely chuan,"Msi te nen in inkawm ṭhin tiraw?,"a lo ti khauh mai a. Emily chuan,"Aw ka ṭhian ṭha ber a nia,"a lo ti mai a. Ely chuan,"Khutiang mi khu ṭhian atan i kawm chhung chuan kan chhungkaw mo i ni theilo ang,"a ti nghal bawih bawih mai a. Sangtea chuan,"A tawk e aw,kan inkar thu ah hian sawi tur i nei lo,"a lo ti vat a. Ely chuan ngeiawm zeta nuih pahin,"Ve khanglang a che,nangkha thawhchhuah nei silo hian in la pawr ve viau ṭhin suh,"a lo ti leh hlak hlak a. Pu Thanga chuan,"A va mak ṭhin e aw Ely,duhtawk rawh,"a lo ti ve bawk a. Ely chuan ngeiawm zet a nuih pahin,"Khutiang zu zuar fanu nen a inzawmna nei ho reng reng hi chu ka haw vek. Mawii nangpawn i kawm ṭhin tih ka hria,bansan nghal ang che,"a ti leh nghal hlawih hlawih a. Sangtea chuan,"A tawk e Msi chanchin kha rawn sawi chhuah kher a ṭullo. Kal ang,"tih pahin Emily chu a kai a,pawnah a chhuahpui nghal daih a.

A bike a ti nung a,"Rawn chuang rawh khing ho khi ka hne ngawih ngawih,"a ti hlak hlak a. Emily pawh chu ngawi rengin Sangtea bike ah chuan a chuang ve mai a,"Khawnge kan kal dawn?,"a rawn ti zawi sap a. Sangtea chuan,"Msi te inah,"a lo ti bul hmuk a. Emily chuan Sangtea chu engmah a zawt zui tawh lo.

Msi te nufa chuan eirawng an lo bawl ve mek a. Sangtea te 2 rawn lut am hmuh chuan mak an ti hle mai. Pi Ruati chuan,"Nangni 2 chu?,"a lo ti vat a. Msi chuan,"Engnge awmzia?,"a lo ti vat a. Sangtea chu ṭhutthlengah chuan a ṭhu hnawk a,"Chaw in chhum tawh em?,"a ti ringawt a. Emily lah chu ngawi rengin Sangtea bulah chuan a ṭhu a. Pi Ruati chuan chhum love,engnge thleng a i va thinrim hmel ve a?,"a lo ti vat a. Sangtea chuan,"Chaw in la chhum loh chuan Emily hi lo chhum kep mai ru aw. Nakinah engkim ka hrilh ang che u,tunah chuan keimahin awm ka duh,"tih pahin chhuah leh mai a tum a. Emily chuan,"Khawnge i kal dawn? Ka rawn kal ve duh,"tih pahin Sangtea banah chuan a vuan a. Sangtea chuan,"Chaw pawh i la ei loh kha,tah hian lo awm char char la nakinah ka lo hruai ang che,engmah hlauhthawn tur a awmlo nia aw,"tiin a chhuak nghal a.

Msi chuan,"Engnge thleng a?,"tiin a lo zawt leh vat a. Emily chuan,"Mawii khan a sawi dik chiah nih hi,"a ti ringawt a. Msi chuan thil thleng tur awm ang chu a ngaihruat thiam nghal a,"Keimah vang a ni tiraw? Pawi ka ti lutuk,"tih pahin Emily chu a kuah a. Emily chuan,"Aih pawi ti suh,thiam lohna i nei lo. Sangtea u in a tihdan che kha ka lungawi thei bik lo,"a lo ti ve vat a.

Pi Ruati chuan,"Engkim hi keima tih dik lo vang  a ni. Pawi ka ti khawp mai,"a lo ti ve bawk a. Emily chuan,"Nu Ruat,in thiamlo duh reng reng suh. Pathianin thudik chu a hre vek a lawm,"tiin a lo hnem ve bawk a. Msi pawh chuan,"Ni e Nu,i thiam loh a ni hleinem. Nu in a fanu tan a theihtawp a chhuah a ni mai a. Chu thilah chuan thiamlohna i neilo,"tiin a nu chu a lo hnem ve malh malh bawk a.