Aizawl | January 21, 2019: Mizo Zirlai Pawl (MZP) General Headquarters chuan vawiin khan Local Administration Department(LAD), Minister K Lalrinliana a pisa ah kawmin Mizoram chhunga danlo a khawdin leh Mizoram leh Assam State inrina ramri chungchang an sawipui.
MZP hruaitute chuan, Mizoram chhungah danlo a khawdin khaw 21 lai a awm thu Minister hnenah an thlen a. Heng khuate hi Lunglei, District chhungah khaw 19 awmin, Mamit, District chhungah khaw 2 a awm bawk. Heng khuate hi Chakma leh Tuikuk ten an din a ni a. Heng khuate hi rang taka Mizoram Sorkar chuan endika thiat nghal turin angen nghal a. Minister chuan, ‘‘MZP ten heng khua dan lo a din an lo hmu chhuak chu lawmawm a tiin, a rang thei ang bera thiah anih theih nan hmalak a ni ang,’’ tiin, MZP hruaitute chu a chhang a ni.
MZP hruaitute chuan, Kolasib bialtu Pu K. Lalrinliana, chu Bairabi Zophai leh a chheh vel bialtu anih angin, ramri chungchang sawipui nghal a ni a. MZP chuan Bairabi Zophai hmunah hian ZOFATE CHAWLHBUK hi a din ngei angaihthu leh sak anihhma chu tawp san an tumloh thu thlen nghal a ni a. Minister chuan, ‘‘Bairabi Zophai hmunah hian Zofate Chawlhbuk a din ngei theihna turin, bialtu MLA anih ang pawha hmalak a tum thu leh a hmunah ngei MZP hruaitute nen enho anih tur thu’’ MZP hruaitute a lo hrilh a ni.
Ni 23rd January,2019(Nilaini) hian MZP chuan Mizoram pumah Citizenship Amendment Bill,2016 dodalna hrang hrang karah pass luih tumna a awm avangin Hnam Chhanna Kawngzawh a huaihawt dawn a. Aizawl khawpui chhungah Chhim leh Hmar atanga zawh tan tur niin, Chhimlamah Khatla kawn atang zawh tanin, Hmarlamah Zarkawt atanga zawh tan a ni anga, Vanapa Hall kawtah programme hman niin, All NGO hruaitu ten thu sawina hun an neih bakah India Prime Minister leh Union Home Minister lim hal nghal a ni ang.
MZP General Headquarters chuan, ‘‘Hnam Chhanna Kawngzawh’’ah hian ram leh hnam tana Mizo mipui leh Zirlaite zawng zawng lo pen chhuak vek turin a sawmin a ngen nawn leh a ni e.
Post a Comment
He post chungchanga i ngaihdan lo sawi ve rawh: