Ratu | January 04, 2019: Nimin January 03 2019(Nilai) zan dar 7:00 khan Mizo Zirlai Pawl (MZP) Sub Headquarters Ratu chuan an dincham phaphak Silver Jubilee lawmna Bazar kawn Ratu ah an nei a. He hun hi MZP General Headquarters President Tv. L Ramdinliana Renthlei leh hruaitu dang ten an hmanpui a. Darlawn Headquarters MZP hruaitute leh Saitual Headquarters MZP hruaitu ten an hmanpui bawk a ni. He hun hi Pu C Ramfanzauva Vice President MZP Sub Headquarters Ratu in a kaihruai a, he huna hian L. Ramdinliana Renthlei President General Headquarters MZP leh Tv. K. Lalchawimawia MZP Sub headquarters Ratu ten thu an sawi a ni.
He huna thusawitu L. Ramdinliana Renthlei MZP General Headquarters President chuan, "Kan ram leh hnam leh Zirlaite tan MZP chuan kan theih ang angin hma kan la thin a, Zirtirtu semrual a nih theih nana hma kan lakna te, Mizo Zirlaite chanvo humhalh a nih theih nana hma kan lakna te, Chakma dan lova Mizoram a awm foreigner hnawhchhuah an nih theih nana hma kan lakna te, Mizoram ramri venhima humhalh a nih theih nana hma kan lakna te zawng zawng hi MZP danbu a awm a nih avangin MZP hian kan kuang lo kan nawr lo a, kan pawl thil tuma awm a nih avangin kan tih tur a ni a. Kan ram leh hnam leh Zirlaite tana thatna turah chuan kuang lo kan nei lo a theihtawp chhuah in hma kan la zel dawn a ni."a ti a.
L. Ramdinliana Renthlei chuan, "Politics-ah hian Political Party te hi hmanraw tamtak zinga pakhat chauh a ni a, hei hi Mizo te hian kan man thiam loh avangin Political Party a lut te chauh hi Politics khelah kan ngai fo thin a ni, Politics awmzia leh nihphung kan hriat fuh loh vang a ni. Democracy ah chuam mimal in emaw pawlin emaw Sorkar thutlukna emaw Sorkar inrelbawl danah emaw Sorkar kalphungah emaw kan ngaihdan leh duhdan tilang thei tura hmalakna emaw telve na kan neih hi Political pariticipation a ni a, hei hian inthlan huna vote thlak te, Sorkar policy duhloh vanga nawrhna hrang hrang huaihawt te a huam vek a ni. Chuvangin thalaite leh Zirlaite hian politics hi kan vei a hun tawh a, kan ram leh hnam siamtha tur hian Party politics luh chilh kher lo hian theihna kan nei a, i tang sauh sauh ang u."a ti bawk.
He hunah hian NGO hrang hrang hruaitute leh Ratu khawtlang hruaitute pawhin thu an sawi bawk.
MZP Sub headquarters Ratu hi kum 1993 khan din a ni a, din a nih tirh atanga hruaitu lo ni tawh te hnenah chawimawi nan Pangpar thi awrhtir an ni a. MZP Sub headquarters Ratu Silver Jubilee lawmna ah hian Ratu khawtlang a VC, YMA leh NGO hrang hrang hruaitu te hnen atangin thusawi ngaihthlak a niin, Ratu khawtlang mipuiten an hlutin a lawmna ah hian an kal tha hle a ni.
Post a Comment
He post chungchanga i ngaihdan lo sawi ve rawh: