MZP IN CAB DODAL ZEL, KAWNGZAWH RUNPUI HUAIHAWT DAWN

 Aizawl | January 18, 2019: Mizo Zirlai Pawl (MZP) chuan CAB duh lohna lantir zel tumin hma a la a, January 23 hian Mizoram pumah Kawngzawh runpui neih an tum.

MZP Meeting

MZP General Headquarters an president L Ramdinliana Renthlei kaihhruaia Executive meeting vawiin a thukhawm chuan, India Sorkarin Lok Sabha ah The Citizenship(Amendment) Bill, 2016 a lo pass tawh leh Rajya Sabha ah january 31 atanga thutkhawmah pharh tumna awm chu duh lovin dodalna lantirnan January 23 hian Zoram pumah Kawngzawh runpui buatsaih turin a rel ta a ni.

He kawngzawh runpui hi MZP chuan, MZP Headquarters, MZP Sub-Headquarters leh MZP Branch zawng zawngte leh Hnampual zirlai pawl-a kan thawhpui Mara Students' Organisation (MSO), Lai Students' Association (LSA), Siamsimpawlpi (SSPP), Hmar Students' Association (HSA), Mizoram Bawm Students' Association (MBSA), Ranglong Student' Union (RSU), Pang Zirlai Pawl (PZP) leh Thado Kuki Students' Union (TKSU) te mahni area chhungah Kawngzawh runpui hi chak taka lo kengkawh vek turin a ngen nghal bawk a ni. 

MZP Thuchhuah

MZP thuchhuah chuan,"The Citizenship(Amendment) Bill, 2016 chu India Sorkar (Central Government) chuan Parliament House (Lok Sabha)-ah a pass tawh a, Parlia-ment House (Rajya Sabha)-ah chhawpchhuah ni tawhin 31. January, 2019 atanga session tan leh turah hian sawiho leh tutu nia hriat a nih avangin North East State hrang hranga zirlai inzawmkhawm pawl NESO chuan 30. January 2019 hian North East State hrang hrangah Kawngzawh Runpui mahni State theuhah neih ni se tiin a rel a.

MZP pawh NESO a tel zirlai pawl kan nih angin MZP General Headquarters Executive meeting ni 18. January, 2019 (Zirtawpni)-a neih chuan Mizoram pumah ni 23. January, 2019 (Nilaini) hian Kawngzawh runpui hi neih ve ni se tiin a rel a. MZP Headquarters, MZP Sub-Headquarters leh MZP Branch zawng zawngte leh Hnampual zirlai pawl-a kan thawhpui Mara Students' Organisation (MSO), Lai Students' Association (LSA), Siamsimpawlpi (SSPP), Hmar Students' Association (HSA), Mizoram Bawm Students' Association (MBSA), Ranglong Student' Union (RSU), Pang Zirlai Pawl (PZP) leh Thado Kuki Students' Union (TKSU) to mahni area chhungah Kawngzawh runpui hi chak taka lo kengkawh vek turin kan inngen a ni a, programme leh tul dang ruahmanna siam ngai chu mahni remchan dan anga lo inbuatsaih mai turin kan inngen e. " " tiin a tarlang.