L MALSAWMA COLNEY CHANCHIN

MZP General Headquarters Lifetime Adviser (1994- 2019 )

Ziaktu:  Manga Thomte

    NESO council member, MZP Gen. Hqrs.

  Pu, L. Malsawma Colney hi MZP General Headquarter Senior Adviser kum 1994 atangin tunthleng hian a la ni a, sawidan pakhat ah phei chuan damchhung (ban thianglo) “LIFE TIME MZP ADVISER” a ni. Ram leh hnam tan hna thawkin, hnam hmangaihtu a nih bakah Zirlai/thalai te ram leh hnam tan a hna thawk a hmangaih tur a fuihtu a ni bawk. Pa frank tak ni in thusawi thiam tak a ni a, a thusawi ngaihthlak a manhla em em thin a, tunlai tawng takin ‘Presence of Mind’ a nei tha hle bawk a ni. Amah hi pa huaisen tak ni in Pathian tih mi tak a ni. 

Pu Malsawma leh Manga Thomte

 PIAN LEH MURNA LEH CHHUNGKUA :- 

 Pu, L. Malsawma Colney hi Rev. Fehtea (Biate Pastor, kum 1926-ah Synod in a nemnghet) leh Pi Kapchhungi te fa sawm leh pahnih zing a a tuai lam pariatna ni turin Biate-ah Ni, 29th July 1931 khan alo piang a, tunah hian Pu Hrangthanga (Ex-Minister) nen chiah an la dam a ni. Ram tan a theihtawp a a inhman a vangin kawppui lam a ngaihtuah/ngaihsak lawk lo a, ama sawidan takin Kum 2004 alo herchhuah meuh chuan a nakruh bo ngei Pi, Lallianmawii, Kanghmun khua chuan a pan vang vang a, a kherh a kherh hnu ah a tang thei ta ngang lo ni tur a ni, kumtluang a tan “TIAM TLAT E” an ti ta nge nge a ni. Pu, Sawma hian nupui a neih khan kum 73 mi a ni a, a nupui nen hian kum 40 vel lekin an inthlau a ni. A nupui Pi, Mawii hi Master of Divinity (M.Div) ni in nu fel tak leh luzo tak mai a ni a, Missionary nih tum ni mahse pa ropui tak thai ni turin Pathianin rem a ruat a nih a rinawm. Tunah hian Home Guard ah Clerk hna a thawk mek a ni.

 ZIRNA KAWNG LEH HNATHAWH :-

 Pu, L. Malsawma Colney hi a zirna kawng a chhukchho ve hle a, mi tumruh tak a ni tih a zirna kawng a tang hian a hriat a ni. Kum 1942 ah Biate Primary School ah class III thleng a zir a, kum hnih (2) a chawlh hnu in Sialhawk Middle School ah Class IV-VI a zir a, Kum 1948 ah Mizo High School ah Class-VII a zir leh a, kum 1950 ah class-IX a fail a ni. Kum 1951 ah Imphal, Manipur-ah Bengali High School ah class-X a zir zawm a, a fail leh a vangin kum 1953 ah Burma Army Supply Clerk a zawm a, Bengali High School a an Headmaster in Matric (class-x) exam ah Mathematics a bat thu leh exam leh tura a tih a vangin 1954 ah Matric a zo thei ta hram a ni.

Manga Thomte, Pu Malsawma Colney leh MZP president L Ramdinliana Renthlei

 Kum 1955-ah D.M College, Imphal Manipur ah Intermediate of Arts (I.A) 1st year a zawm leh a 1956 ah I.A English ah subject a ba leh a, 1957 ah a passed thei ta a, 1957-ah St. Anthony College, Shilong-ah BA a zawm leh a, 1960, 1961, 1962-ah te III year a exam a, BA kumnga (5) a beih hnu in a Graduate ve ta a ni.

 A lehkha zirna kawng chhukchho hi tluanglo viau mahse, hna a zawnna kawngah chuan a vannei hle mai a, exam a hmachhawnna a piangah pakhatna a ni thei zel a, hna chi hrang hrang paruk (6) lai a hmu hman a ni. Kum 1957-ah India Prime Minister lehkha a thawn a, Assam sorkarin tlangmi (Tribal) te an ngaihsak loh zia leh an hmuhsit thu te, an tan hna a harsat thu te a thlen a, Prime Minister chuan Assam sorkar lehkha a thawn a, Assam Secretariat ah direct in kum 1957-ah hna an pe a, Assam Public Service Commission kaltlang lo in P.M in direct in hna a pe a ni.

 Kum 1960-ah Army Commission a bei ve a, Exam-ah Pakhatna a ni a an mal lak nghal mai a, hemi kum hian apa a boral tak a vangin leh anu in awmpui tura a tih a vangin Biate-ah haw in kum 1962-ah Biate High School-ah zirtirtu hna Rs. 170/- hlawhin kum 1966 thleng a thawk a ni. Nu leh pa thuawih leh zah thei leh zah mi tak a ni tih hetatang hian a hriat a ni. 

 MNF A INHMAN DAN :-

 Kum 1965-ah MNF Sanator ni turin “Tuipui leh khawmual-ah pawh, Ram leh hnam tana ding turin ka intiam e” tiin thu a lo chham tawh a ni. Hetih lai hian Biate High School-ah ala thawk a, kum 1966 January thla ah phei chuan Headmaster a ni. Ram tana Zalenna sualna (movement) ah cabinet zing ah tel in kum, 1966-ah E.Pakistan (tuna Bangladesh ni ta) ah buai intan hnu-ah MNF President Pu, Laldenga hnung zuiin a awm a, 1966 October ah Mizoramah a lo let chho leh a ni. Pu, Laldenga mi rin ber ber te zinga mi a ni ve thin a, hun pawimawh-ah te leh hmun pawimawh-ah te hian thu sawitu ber niin thu sawi tura sawmna a dawng nasa thei hle a ni. Kum 1966-1967-ah phei chuan Wanted zingah a tel a, MNF a a tel chhung hian nihna leh chanvo pawimawh hrang hrang a chelh nual a ni.

 Kum 1975-ah Arakan ah MNF Vice-President a ni a, kum 1968-ah Senate President (Protempore) a tan thlan a ni. 1971-ah National Executive Committee (NEC) member a ni a, MNF leh India in inbiakna neih duhlo in, “Mizo te hi Ram dang awpna hnuai a awm tur kan nilo” ti tlat tu a ni. India nen a inremna kawng zawn hi a thlawp loh a vangin hruaitu thenkhatte nen a ngaihdan a in ang thei ta lo a, kum 1976-a Culcatta Convention ah te pawh a tang huai hle a ni. Kum 1978-ah MNF Vice-President ni leh in, 1979-ah phei chuan MNF President a tan a duh tu pawh anlo awm nual ni tur a ni. MNF President dinhmun hial a luah a sawi a ni a, mahse ngaihdan inanglo/ inperhsan tak hruaitu te zing ah a awm a vangin kum 1979-ah ram tana a rammutna a tangin a rawnchhuak a ni.

 M.P (LOK SABHA) A TAN AN SAWM :-

 Mizoram buai hma a MZP hruaitu a nih lai khan Mautam chungchangah te sawrkar an nawr nasa in tha an thawh nasa em em a, hetianga ahnathawh avang leh B.A passed hmasa te zinga a telve vang te pawh a ni ang kum 1964-ah Pu, A. Thanglura Congress President (M.P (Rajaya sabha), Assam MLA leh Minister pawh lo ni tawh) leh Assam Congress General Secretary te chu Biate-ah kalin Pu, L. Malsawma Colney hi M.P (Lok Sabha) member a tan in candidate a, Ms. Chanda thlak turin an sawm a, a duh chuan tling tur chiangsa a nih dan te leh Central/Union Minister a nih tur thu an hrilh a, a thlemin an thlem a ni zawk mah a, “Ngawiteh Pu Lur, min hrechianglo a ni. Kei chu Nationalist (Ram leh Hnam hmangaihtu) ka ni a, Vai ho bula awm a a lal pawl nih ka duhlo, an lal em em tih pawh ka hria... Nichol Roy te ang lek ah miin min ngai ang a... ka duhlo. Hei, MNF Movement an tan dawn a India Minister nih ai chuan India kap tur a ramhnuaia di bul khel ka duh zawk” tiin alo chhang a ni. Pu, A. Thanglura chuan a ati khawp mai a, tumah MP tura a sawm a an sawm  ngailoh thu te luhlul a tih thu te leh Mizoram tan a tha tur a nih thu te sawiin a hau ti tih a ni.

 POLITICS LEH NGO A IN HMANNA :-

 Kan tarlan tawh angin kum 1964-ah Assam M.P (Lok Sabha) atan Congress ticket a ding tura sawm a ni tawh a, alo hnar tawh a nih kha. A rammutna a tanga alo haw hnu kum 1989-ah Democratic Party-ah Treasurer leh Vice-President  nihna te a chelh a, MP-ah in Candidate in a vanduai ah a tang hlauh a ni. Hemi tih loh chu Political Party a a in hmanna sawi tur a nei lem lo a ni.

 Kum 1957 Shilong a a awm lai in AIR Shilong-ah Leading Artist ni in Liansailova Sailo te nen team diin Mizo hla te an sa thin a ni. Kum 1958-ah Shilong MZP (Mizo Students’ Association) President a ni a, kum 1954-1956 chhungin Manipur a legkha a zir laiin Minipur Boys’ Scout-ah State Commissioner te a ni. Kum 1959-ah Assam chhung a Mizo awm ten Assam Phaitual Mizo Kohhran an din a, chutah chuan Mizoram Synod leh Mizoram Baptist Kohhran ten kohhran Upa neih/thlan an phalsak angin Pu Sawma hi kohhran upa hmasa ber atan thlan zingah a tel a ni. Shilong a a awmlai chuan BSI, MZP, Kohhran, Culture Club,...adt., engkimah a hruaitu a nih avangin a ma hna nen a buaithei hle a, a tangkaiin a hah em em na in a lar in a luck phah viau a ni.

 Kum 1962-1966 Biate a a awm chhung khan Tuichangral KTP hruaitu nihna hrang hrang a chelh a, “L. Malsawma Colney B.A in thu a sawi dawn” an ti thin a ni. Kum 2013 a tangin ZO Re-Unification Organisation (ZORO) General Headquarters-ah Vice President ni in kum 2012 khan United Nations Permanent Forum on Indigenous Issues (UNPFII) Session UNO General Headquarter New York, USA a neih ah a zuk tel tawh bawk a ni.  Kum 1994  atangin MZP Senior Adviser atan ruat a ni a, a ni hi MZP neitu tih  hial a ni a, Life Time MZP Adviser, ban thianglo ni te pawhin an sawi thin a nih kha.

 ZORAM MAP :- 

 “Zalenna kan sual a, hetiang kan nih tak ah chuan kan ram chin diktak thangthar te leh Mizo Mipui ten kan hriat theih nan tiin ka theih tawk Historical MAP of Zoram hi ka ziak ta a ni.... “a ti a, he Map hi kum 1989-ah a vawikhatnan tlangzarh a ni a, kum 2006-ah MZP bultumin Print a tlangzarhna neih a ni leh a, tunah hian changkang deuh zawk in a Print leh a, a duh te tan engtiklai pawhin lei theihin a kawl reng a ni. Mi hrang hrang te leh PWD lam te thurawn a ngin tunah hian Zoram Map hmar lam Zofate chenna Akyap thlengin a ziak leh mek a, a zo leh thawkhat tawh a ni. 

 Hei bakah hian Ram thianghlim Map (Holy Land Map) a ziak a, hemi a vang hian National Council Church of India in Degree te pawh pek an tum a ni.

 TLANGKAWMNA:-

     Pu L Malsawma Colney chanchin hi ziah vek sen a ni lo a, a tawngkam bungrua te pawh ngaihnawm tak tak a tam em em a, chanchin a ngah em em a ni. Zo hnam ah chuan pa ropui leh pa challang tlemte te zinga pakhat a ni a, a chanchin tarlan awm tak tak hmaih palh a awm ang tih ka ring, mahse hei hian Pu L Malsawma Colney hlimthla tal a tarlan ka ring. He pa ropuitak phen ah hian zirlai leh thalai te hian zir tur tam tak kan nei a, Ram leh Hnam hmangaih a chhan tur hian min duh a, a ni pawh khawvel ropuina leh mahni hmasialna leh hlawkna tur tam tak kalsan in mahni nunna thap in ram leh hnam a tan tlat a, tun thleng pawh hian he a rulru hi ala pu reng a ni.

 Pu sawma hi Pathian ringtu leh Pathian tih mi tak a ni a, silaimu kara a awm lai leh tun thleng pawh hian “BIBLE’ a keng reng a, a ma sawi dan tak ah thihna vawi duailo a pumpelh tawh a, heihi Pathian a rin tlat vang ni ah kei chuan ka ngai a ni. A kum leh hmun hming te hi tihsual palh a awm palh thei e.

L Malsawma Colney Thlan @Biate

Ziaktu thuziak dang hetah