CAB SAWIHONA MZP IN BUATSAIH

Aizawl | January 18, 2019: Nimin Dt 17th January 2019 (Ningani) khan MZP Headquarters, Lunglei Pisa chu a duh leh mamawh tute dawr theih turin hawn a ni. He hun hi Tv Lalrammuanawma President in a kaihruaia, Pu Eric R. Zomuanpuia Adviser in hunserh  hmangin pawl kaihhruaina kawngah leh ram leh hnam, zirlaite tana ke penna kawngah Krista duh dana ke pen a, rilru thar nen a pawl kaihruai turin MZP member te a fuih a ni.

MZP Headquarters, Lunglei Discussion Forum buatsaihin Dt 16th January 2019(Nilaini) zan Dar 8 khan JB Studio, Chanmari ah Citizenship Amendment Bill 2016 chungchang sawihona buatsaih a ni a. He sawihona programme ah hian North East Students Organisation Finance Secretary Tv Ricky Lalbiakmawia leh MZP General Headquarters President Tv L. Ramdinliana Renthlei bakah Rev F. Sangvela, Pu C. Lalchhuana (MCS Rtd.) leh Pu Malsawmdawngliana (Advocate) te Panel ah thuin sawm bik mi thenkhatte nen Citizenship Amendment Bill 2016 tun hnaia Lok Sabha a pass a nih dan leh Mizote tana a hlauhawm dante sawiho a ni a.

He bill chungchang sawihonaah hian Peace Accord kan neih hmang hian Citizenship Amendment Bill lakah invenna tur a awm lo a, Article 371G in CAB lakah min hum loh mai bakah BJP hian India ram pumpui hi Hindu lal ramah siam an tum dante leh North East State ah Mizoram hi a tuar ber tur kan ni a, a bikin Lunglei leh Mamit in kan tuar nasat dan tur te sawiho a ni. Citizenship Ammendment Bill 2016 hi NESO chuan North East pumpuiah na taka dodal chhunzawm zel an tum thu te sawi a nih bakah MZP pawhin Mizoramah na taka a tul dan anga dodal zel an tum thute sawiin North East a zirlai pawl hrang hrang te hmalakna pawh sawilan a ni. Tin, Citizenship Amendment Bill hi Mizoram Sorkar pawhin na taka dodal a, awmze nei taka hmala chhunzawm zel tura an duh thute sawilan a ni bawk.

Mizoram leh hnam tana Citizenship Amendment Bill 2016 hi a hlauhawm zia leh Lunglei District tana a pawi thui theih zia hrethiama mipui pawhin ngaihven a tun aia kan vei a tul thute he sawihona hunah hian sawilan niin Lunglei mipuite pawhin a dodal tute hmalakna pawh nasa leh zuala thlawp a tul thute sawi lan a ni bawk.

He Bill sawihona  hi hun remchang hmasa berah Cable TV ah pekchhuah tura ruahman a ni a. Lunglei mipuite he Bill chungchang ngaihvena lo thlir theuh turin MZP chuan sawmin a ngen a ni.