MIZORAM SAWRKAR THAR LAKLUH A NI, CM ATAN PU ZORAMTHANGA

Aizawl | December 15, 2018: Vawiin December 15, 2018 chawhnu khan Raj Bhavan tualah Mizoram sorkar thar lak luh a ni ta a; Governor, Kummanam  Rajasekharan  chuan Chief Minister atan Pu Zoramthanga rinawmna thu tiamtirin a la lut a. Tun hi Chief Minister Pu Zoramthanga tum 3 Mizoram Chief Minister  a nihna a ni.  Deputy Chief Minister atan Pu Tawnluia lakluh a ni a. Cabinet Minister dang 4 leh a vawikhatna atan a  Minister ni tur, MLA paruk te pawh rinawmna thu tiamtirin Governor chuan Minister of State niturin a lalut nghal bawk a ni.

Sorkar thar lak luhna inkhawm hi chawhnu dar 12-ah tan niin, Chief Secretary Pu Arvind Ray chuan a kaihruai a.  Larsap chuan Chief Minister atan Pu Zoramthanga, Cabinet Minister atan mi panga leh Minister of State atan mi paruk te chu ram Danpui hnuaia rinawm taka hnathawk tur leh sorkar thurûk vawng tha turin thu a tiamtir a; Council of Minister lakluh thar te hian Mizotawngin rinawmna thu an tiam vek a ni.  Tun tuma Sawrkar thar lakluh inkhawmah hian Kohhran mite pawh hun pek a ni a; Synod Moderator Rev. R. Lalhmingthanga chuan hunserh hmangin Besy Choir hnen atangin Pathian Hla sak ngaihthlak a ni bawk a ni.

  

Deputy Chief Minister  Pu Tawnluia hi 5th Mizoram State Legislative Assembly-ah khan Home Minister a  ni a, Cabinet Minister atana lak luh takte ho pawh nihna pawimawh tak tak chelh tawh te an ni a. Dr. R. Lalthangliana, Pu Lalchamliana leh Pu C.Lalrinsanga te hi 5th Mizoram State Legislative Assembly-ah khan Cabinet Minister, Speaker leh Deputy Speaker te an ni a; Pu R.Lalzirliana pawh hi 7th Mizoram State Legislative Assembly-ah khan Home Minister a lo ni tawh a ni. 

Minister of State atana lakluh thar te chu Pu K. Lalrinliana, Pu Lalchhandama Ralte, Pu Lalruatkima, Dr. K. Beichhua, Pu T.J. Lalnuntluanga leh Pu Robert Romawia Royte te an ni.

Mizoram sorkar thar lak luhna inkhawmah hian Chief Minister hlui Pu Lal Thanhawla pawh a tel a.  State pawnlam atangin Meghalaya Chief Minister Pu Conrad K Sangma, Pu Keshab Mahanta, Minister, Water Resources, Pu Prafulla Kumar Mahanta,MLA, Assam Chief Minister hlui  te, 8th Mizoram State Legislative Assembly a MLA te, Head of Administration chin official te, Minister te nupui leh fanaute leh sawmbik te an tel a ni

8TH MIZORAM LEGISLATIVE ASSEMBLY A COUNCIL OF MINISTERS TE

Chief Minister:  Pu Zoramthanga

Deputy Chief Minister : Pu Tawnluia

Cabinet Minister:

1.Dr. R. Lalthangliana

2.Pu Lalchamliana

3.Pu R.Lalzirliana

4.Pu C.Lalrinsanga

Ministers of State:

1.Pu. K.Lalrinliana

2.Pu Lalchhandama Ralte

3.Pu Lalruatkima

4.Dr K. Beichhua

5. Pu TJ Lalnuntluanga

6. Pu Robert Romawia Royte

MNF sorkar tharah hian Minister hmel thar lang an awm nual a, chungte Pute- K.Lalrinliana, Lalchhandama Ralte, Lalruatkima, Dr. Beichhua, TJ Lalnuntluanga leh Robert Romawia Royte te an ni a, TJ Lalnuntluanga leh Robert Romawia Royte hi an vawikhat MLA tlinna an ni. TJ Lalnuntluanga hi Champhai South a Chief Minister ni lai Pu Lal Thanhawla khing thlatu a ni