NAWHCHI ZUAR THUKHAWCHANG

"ka fapa ka ngai mange!'' ti a ka bula a Davida'n a sawi apiang in 'a nu chu nei tawh mai rawh' tiin ka hrilh thin....mahse a chhungten chutiang hmeichhe lepchiah,zu zuar fanu,tu tute nge a mutpui tawh tih pawh chhiar fe tham chu an hnawl bur mai si....Mazuali pawn nei dawn se chuan a hnial bik kher lovang..mahse keipawn ka duhpui lem lo,a chhan chu ka thian hi hrehawm tak a a awm ka phal lo ..

Engtik laiin nge hmangaihna khur ah ka zuan luh ka hrelo,kan inhriatna ala rei lutuk lo a,mahse thian ber a min neih vangin a tawrhna pawh ka hriatthiam pui a,ka theih ang tawkin ka hnem ve thin,Davida ka thian tha tak,ka nel em2 nen chuan inngaizawng kan ni ta reng mai...Palai arawn tir a,reilote ah kan chhungte chu an inbe rem thuai a January? thla laihawl chuan zu zuar fanu leh a fapa ngai a kur ruai thin chu ka pasal ani ta a,Ramthar a ka pasal te inpui ah kan insuan lut ve ta a ni...

A hna avangin zing takah a tho a,engkim a hun tak ah a ti thin..kan in hmangaih tawn bawk a,a tu ve ve tan pawh han in rinhleh chhan tur a awm ngailo..mo thar e tilo chuan Hospital a awm ngai hialin ka awm a,chutih chhung zawng pawh chuan sawiselna tur ka la neilo..min duat a,ka kiangah awmin min thlamuan thin a,ka eng a thawl hliah2 thin,ka dam hnu chuan kan chhuak a,..chumi ni tlai lam chuan "Hospital ah khan ka in thei si lova,tlem te chauh ka fapa kan phah in zu ka va in lawk ange" ati a,a in tam lo aniang a rawn rui meuh lo..a awm pawh ka tih pui a,zu in nasa ve takani thin a,a in chak tawh pawh ka ring ani...

Mahse chumi ni atang chuan zu a in ta fo mai a,hunbi a vawng dik lova,len hun leh hawn hun pawh a hre ta meuh lo,alo hawng a,a fa pawmtu Mazuali nen phone hmangin an inbe ta zeuh2 a,ka thik a,ninawm ka ti hle bawk..a nu leh pa ka hrilh hnu ah Mazuali phone number chu ka delete sak a mahse reiilote ah an inbe leh mai thin..Mazuali'n a rawn phone chang a ka lo pick up lahin "Davida kha phone pe rawh" ati a,ka hmuh leh hriat lai ngeiin an inbe ta ziah a...

Davida chuan a fapa chu a ngaiin a duat hle a,''naute ngaina leh duh chi tak ka nia" pawh ati fo...keipawn namen lovin ka hmangaih ani,ka fapa ve tho ani a ka ngaina in ka duat ve tur ani...a pa tan lek phei chuan ngai vawng2 awm pawh ani reng a,han len luh a,thil va leisak te pawh atih tur dik tak ani... "naute a la te in keiin nau ka pai ve vat chuan a thalo ang" tiin ka hrilh fo a,Mazuali lah in naute min pe phal bik lova,sawn man lah a dawng duh lova,a buaithlak angreng khawp mai..

Davida lah zu in mi alo ni bawk nen zu in chhuanlam a va len fo pawh a awm lutuk mahse zan hial ava riak ta fo chu ka ngaithiam ta ngang lova,amah ka hauh lah in "ka chatthla a,ka lo muhil alawm" tiin min hrilh mai a,mahse vawi khat chauh ani lo,a tam tawh lutuk....tum reng vang a riak tih chu a chiang reng mai..a chang chuan ni thum hial a thang bo a,a nu leh pa ten an va koh lah in "ka hmangaih a,nupui ah neih ka duh a,in phallo anih kha" alo tihsan mai a..a rawn hawn duh tak tlat loh vangin keipawh ka thawmhnaw te siamin kan in lam ah ka hawng ve ta a...

Nu leh pa ka nei tawh lova,ka pi leh pu te bulah chuan tap chungin ka tlan ani...ka pi pawh in min khawngaih takzet tih ka hria...sum chhuah mai ka duh tawh hial a,mahse ka pu chuan ka hma hun thiam tak a ngaihtuah in a phal ta rih lova...

Davida thenawm te chuan min rawn ko a, "Office pawh a kal duh lo,Bawihi ka then duh lo ani...alo hawn hma chuan khawi ah mah ka kal lovang"a ti,tiin min rawn hruai an tum a,Ka lo duhlo nasa mai a,Amah ngei kalin min rawn ko leh ta a,"chuti na na na chu'' tiin ka pi leh pu te pawn hawng leh mai turin min ti a,kan inzui hawng leh ta a...A sawi leh intiam ang ngeiin Davida chu a danglam hle a,a nun pawh nasa takin a in thlak danglam ve ani...Zu pawh a in rui ngai lova,zing leh tlai ah pawh khawi ah mah kawi lovin a office bang chu alo hawng mai thin..A fapa chu va lak tum a an kal lahin "nang ni sawn man kha kan awt love,cheng nuai 5 te chu nise kan dawng duh mahna!! Nang lo pawh puh tur kan hre hnem emai" an lo tih khum erh a, Kha leh chen a fa anga an sawi tun a tak a chuti tak a a pa atan a an duh leh silo chu a tuar thiamlo ve hle aniang..A hmel chu a hlim lo a,ka lainat in ka khawngaih ngawih2 ani..han hnem vak ngaihna lah ka hrelo a,kan sepui ruah do tlawk2 ani ber e..

Chutia a fa neihna te nen a khaw khat a awm reng chu a pa in tha dawn in a hrelo a,Police hotu lam te chu transfer turin Davida hriatloh in alo dil fel sak diam tawh a,Chu thu Davida'n a hriat chuan a sa phat mai.."post to post in tumah an in transfer ngailo,ka pa tih ani chiang lutuk" tiin a lungawilo nasa mai a,mahse kan that na tur alawm tiin ka hmin thei ta hram a,Lunglei lam ah an transfer ta a..An hotu te that zar ah keipawh ka kal ve min phalsak a,mahse harsatna neuh2 a awm tak vangin Aizawl lam ah kei chu ka let leh ta a..

A thiante phone hmangin in rawn be zeuh2 a,a thiante a zah vangin be let turin min ti fo a,Top Up kan heh tak em vangin ka pa pawhin min kamkhat hial a..Aman phone a neih loh chuan tihdan vak awm chuang hek lo le... Kei Aizawl lam a ka awm tak vangin ka lo dawn ve turin a hlawh chu Deduct (chhungte lo dawn ve tur a hlawh chheh hran) then tir tur a min hrilh vangin a hlawh thenkhat chu ka pa in ala ta ziah a, Tum khat chu ka pa a rawn bia a, "Ruati kha thil engmah ka la leisak lova,cheng 4000 lo pe rawh" tiin a rawn hrilh chu ka lo ngaithla ve reng a,mahse cheng 1000 chauh min pe a..Christmas kawrlum leina tur a ka tih pawh chu lei ngam leh lovin,mawza leh kutkawr leh T-shirt Davida tan ka lei sak ta zawk a..tlem a zawng ka la hum thei a,chu chuan eitur te leiin Lunglei ah ka phei ve ta rawih a..midang nupui te chuan an pasal te thil an chah a,ei tur tuihnai leh eng engemaw hi an lei tan2 thin...keini erawh cheng 400 chauh neiin christmas chu kan hmang ve a ni..Chuta tang chuan ka pasal chu alungawi ta vak lova,phone kaltlangin ka pa nen an inhau hrep nghe2 a..

Ka nu leh pa chuan a hlawh an hmanna chu lehkha ah ziakin an rawn thawn a.,Inpui nghaktu an ni a,kan tihtur leh mawhphurhna alawm tiin ka hnem leh rih a...Mahse a nu lehkhathawn a han chhiar zawh chuan a mizia chu a mak a mak in a danglam a ni..Lehkha chu ka hmu ve tho na in chhiar lovin ka pe mai kha ani a,rei tak hnu a khum a lehkha ka hmuh chuan ka han chhiar chu amak ka ti ngang mai.. "ka fapa ini a,ka ril a rah,i nupui chuan a then thei che mahse keichuan ka then theilo che" tih hi alo ni a,chu lehkha chuan min thawng em2 a,chutiang a ka then thei ani tih ka hrilh awm ka hrelo a,ka lak a an vuina tur awm lah ka hrelo..

Aizawl a ka let leh hnu chuan Davida hlawh chu a pung ve a,a hlawh a pung bawk a tiin ka pa chuan Deduction siam pung turin in pa chu han be teh min ti a..Phone hmang a ka han hrilh chuan a thinrim ngang mai a, "a hma pawn ka sawitawh kha..min hmangaih lo,sum chiah an duh,sum chiah..ka sawi tawh kha" a ti tun tun mai a..thu tha reng2 a sawi pui theih ta lova.."ka lo hawng dawn,zanah ka lo thleng ang" tiin phone chu a dah tau bur2 a,..chumi zan chuan a thianpa nen an lo hawng a ni..

A lo hawn tuk chuak buhfaitham khawn tur a chhuah ka tum chu Davida chuan a phallo bur a,amahlah a rui nasa bawk si mahse ka nu leh pa chuan min nawr chhuak lui dawt2 hial a...

Ka han hawng leh chu ka pasal chu a hnar thi hnianghnuang hian a pa nen an lo inhmachhawn reng mai a, Davida chuan "engtin nge ka thu lovin Deduction in lo tihpun theih?" ati pung2 a,ka pa lah chuan "I pa ka nih hi engkim ka ti thei" a tih chuan an inhnial chhan awm chu ka hrethiam mai.. Ka pa chu chhuat lai ah a nghawk let tawp a, chutih lai chuan "David ka hmangaih che,i nupui chuan a then thei che,i pa chuan a then theilo che" tiin ka nu chu a tap a,lehkhathawn ami ang chiah kha ani tih ka hria a,.Davida chu ka chung ah a tuan leh ta, min sawi dawt2 a,"min then thei maw?" tiin min nam dawr2 a, "chutiang ani lo"ka tih hnu chuan han sawifiah mai dan tur ka hre ta bik lova,engkim a buai zo ani ber e...

Davida chuan "ka nupui nen kum khat kan innei tawh,ka thiante chuan an nupui te thil thar an leisak huai2 a,ka zak ve asin,thawmhnaw pakhat pawh ka la leisak lo,ka zak ngawh2,engmah pawh ka leisak lo hi" tiin a ang tun tun a, Ka pa chuan "i nupui chu saruak in em ni alo luh? an va rethei awm ve..i hlawh hi midang chawm nan a pek ini lo,i nu leh i pa chawm na atan a pek ini" alo ti ve thung a...a tawp a tawp ah chuan chhuak rawh u..in nun in sim hma chuan rawn hawng tawh suh u..min nawr chhuak ta a..

Kalna mai tur kan hrelo a,Lunglei ah bawk chuan kan phei leh ta a...Rei deuh hnu ah ka damloh tak vangin..."hawng mai ang,ka pa ngaihdam dil leh la,in lam ah inenkawl ka duh" tiin ka hrilh a...Phone hmang in ngaihdam a han dil a,haw chhoh kan duh thu te a hrilh a,mahse chhanna kan dawn chu "chhungkua kan lo inrawn ang" tih zawng ani...ngaihdamna thu pawh an sawi duh lova,kei lah engmah ti hleithei lovin ka awm a,kan hawng ta tawp a...mahse chhungkua kan inhmuh dan adang a,boruak a danglam vek tawh..

Mak deuh maiin Davida chu tunhma ai an duat a,an kawm ngeih a,an be tha a,ka bulah a awm tlem a, T.V a en loh vek pawhin a nu leh pa te room ah an inkawm daih thin,ka natna a zual a,min hlat telh2 bawk si...biak ka hlawh ngai ta miah lova,hmun phiah ka han tum te hian min chhuhsak zung2 a,ka pasal chu ka fuihpawrh ah an ngai a ni tih chu ka hrethiam mai..Davida hnen ah chuan "leave ka la anga,Aizawl ah kan inentir dawn nia iti si a,ka hming in leave ila a,chhuanlam ah in hmang a,heti hian inentir lovin min dah leh ringawt a,ka na lutuk asin,ka nu leh pa hrilh rawh" tiin vawitam tak ka hrilh a, "zan ah ka sawi ang" ati laim mai2 a...mahse a sawi loh zia chu ka chiang..

Keimah bawk chuan ka pa hnen ah inentir ka duh thu ka han hrilh a,mahse ka pa chuan "pawisa kan neilo" ati thla hmiah mai...kan nupa kawl chhun chu cheng 700 chauh ani a,ka hrehawm ti lutuk hi ka puak keh lo chauh ta..engmah sawi set2 lo chuan ka pu te bulah ka phei ta tawp a,ka taksa chu a khur dar2 a,ka pen thlu hleithei lo..mahse Davida chuan tlai ah min rawn ko a, "i va leng rei ve" a tih chuan in entir thuai2 ka duh tawh thu in ka chhang a...kan hawng leh ta a,sawi tawh tur a a intiam chu sawilo bawkin a awm leh a,ka awm a nuam thei ngang lo...ka zak ngawih2 ani ber mai,ka pu te in ah bawk chuan ka let leh ta..

Ka pu chuan "i pasal in i thlavang a hauh ngam silo,hetiang ringawt chuan a diklo,sum kan chhuah tur ani" atih chuan ka let vang2 a,ka thawmhnaw te chu lak mai theih in ka siam sa vek a,..Sum kan chhuah ta a..chumi ni chuan ka in entir nghal a ka khua a sik leh er2 a,engkim ka ning a,ka luak a chhuak a,ka zawi ngawih2 ani..a chhan ka hre ta,nau ka pai ani tih hi..

Doctor in ka rai vang a chutiang a awm ka ni tih a sawi chuan ka rilru chu ana thar hle a..a fa ka pai a,ka rai no tih pawh a hrelo a,hre tur a inentir a ka sawm lah in a duh silo kha ka rilru ana thar ngawih2 ani..A thianpa chu ka hrilh a ani chuan alo hrilh chhawng ve leh anih ka ring.,tlai lam ah min rawn be vat a...

Kei chu Rangvamual a kan unau zing a naupang ber tlawh in ka kal a,Davida chu zan lam ah alo thleng ve thuai a..a fa pai na nu in a hriat kan hlau si a,Hunthar lam ah kan chho a,chutah chuan Davida thiante in ah kan awm ta rih a,sum kan chhuah tawh si a,in sawirem leh turin a chhungten man pek leh an duh kan ring lova,ka pu te lah in an dawn duh bik kan ring lo,han tih vak ngaihna hrelo in kan awmdun ta tawp ani...

Chutih lai chuan ka pa in a rawn phone sek a,"rokhawmtu leh service sheet atang khan Ruati hming kha thaichhe tawh rawh se" a rawn ti chhen a,chu kher chu Davida lo chuan a tidanglam theilo ani...Hunthar ah a rawn chhuk tih thawm kan hriat chuan kan hlauthawng lutuk chu Lunglei ah bawk kan phei leh a...Induh vang a inhmanaih si,inthen tawh vanga awmdun thei tawh lo,awmdun lo theilo dinhmun ah kan ding si..Kan chanchin chu an pute (sipai hotute) beng a thleng a,an ni chuan a man chu kan lo dawng ang min ti a,mahse chutih lai chuan training tur a koh ani leh ta zel a...hma lak tum in kan han bei dawn a,a hlawh chu chan alo nei tawh mang lova,deduction chu a let in an lo tipung a,mess fee thlatin 800 chawi alo ngai nen cheng 2000 chiah hlawh lak tur a nei tawh ani,..chutih laiin uniform thar lei angai a,sum kan nei tawh lova,Aizawl a In pui tlawh loh theih ani ta lo..

Hunthar ah khan ka lo awm ang a,tlai dar 3 ah kan inhmu dawn nia...tiin kan intiam a,mahse dar4 lai ani tawh,Davida hmel reng2 alo lang lo...ka hrilhhai lutuk chu ka nau te bulah ka phei ta phawt a,chuta tang chuan ka han phone a,mahse phone chu ka nu in alo dawngsawng a, "zan a riak dawn" alo ti tlat mai bawk a,keimah avanga tuithlar hial ni tawh,englai mah a inbe tha thei tawh lo kha lungdam tak leh lung si takin kei min tuithlar ta zawk a chutianga a che chuan min ti na a,a han riak mai thei chuan min tibeidawng asin...thil awmzia ka man thiam ta...

Lunglei ah ka thawmhnaw te lak ka duh vangin a tuk chuan ka han be leh a, "i hlawh hi cheng 1000 ka la dawn " ka han tih chuan "i chan ve tur a awm tawh lo" min lo ti hmiah a,ka lung a chhe hial a..

"vawi khat mah min rawn be tawh lo la,keipawn ka rawn be tawh ngai lovang che.." tiin tap pur in ka an khum a,Ramthar a ka pu te bul ah bawk chuan ka phei leh ta hna hna a..

A chanchin ka hriat leh chuan Tennis Court ah te a riak thin tih an sawi a..tum khat chu min rawn bia a, "Inneih leh ka duh. Zu pawh nghei ka duh >mahse min puitu tur an awm silo,nanglo chuan min pui thei an awm lo," ati a...mahse " a theih tawh loh" tiin ka chhang a...A puitlin loh em vangin ka ring zo tawh lova,engmah a ti leh ngam dawn chuanglo tih ka hria,ka ring tawk thei tawh lo ani..A fa ka pai lai pawhin engmah ati ngamlo ani a,nau ka chhiat a, afa ka pai tawh lo bawk a..ka lak a a thutiam a hlen ngam leh chuang lovang,min phatsan leh tho ang..mahse ka thian tha ber ani tawh a,ani lo chu hmangaih ka la nei chuang lo..Davida vangin ka hma hun ka hloh tawh a,mahse amah ngaiin ka la tap reng si a..Theih nise chuan a lungdumtu nih a,nuthai rinawm nih ka duh vei nen..mahse ka beisei hi mumang ram ah chauh pawh a thleng dawn ta lo anih hi...David...ka va han ngai tehreng che em!!!

Davida tellova nun hman chu hrehawm tiin tap tlawk2 mahila a bula ka awm lahin ka tan a huaisen zo lova,a che naupangchhia in a chungah rinna ka nghat ngam tawh lo..Nipui a liam a,kan thenawm vel ah thian maksak tak2 neiin ka tal vel mai2 a,zu leh beer ka in ve ta zeuh2 mai..Ni,ka rilru na lutuk awmngaihna hrelo min hnem tur chuan ruihhlo chuan thil alo tithei hrep a,min chhawk zangkhai hliah2 a,mahse..

Kan muhil emaw reitak hnu ah chuan a ngai te bawk in kan ruih a reh a,tukverh ah thu in veng lehlam a naupang infiam hlim thawm ah kei chuan ka mittui ka hru hliam2 thin..mipa pakhat chauh ka la hmangaih anih laiin mipa zawng2 hi ka ringlo vek thung.. min hmangaih tu leh ka hmangaih in min phatsan in min tuithlar miau a ni..

Zan alo thleng a,thenawm a ka thiante'n min rawn sawm fo a,ka pu lah chuan "va hruai thawveng rawh u" ati ve mai thin...ka hrehawmna chuan sual lam ah min hnuk thui telh2 a,chu zan reh ruih hnuai ah chuan hawn hun pawh nei mumal lovin kan vak kan vaka,ka thiante chu Taxi in an rawn hruai nawlh2 a,an tih tur chu ka hria...mahse chutiang tur em chuan ka inphal ngang silo..zan rei tak2 ah ka hawng a,ka hawn kawng ah duh duh a hruai mai theih emaw ti a min lo au mawlh2 tu pawh an awm mahse hre miah lo ang maiin in lam chu ka pan ding ngar2 thin..

Zan khat chu kan thian kim in Park pakhat ah zu in tur in kan thu bial laih a,Sangpuii chuan "Ruat..min kawm ve tawh lo mai rawh,kan awmdan hi a thalo emai,ti lo theilo in kan awm tawh si a" atih chang te chuan min duhsak in min hmangaih hliah2 tih chu ka hre mai..an tunhma nun chu an sawi chho zel a,kan tawng tui viau tawh nghe2..Sangpuii bawk chuan "kei chu kum 9 ka nih in ka patea hian min mutpui thin a,ka taksa hi ana vek a,ka chhungte ka hrilh chuan thah hial ah min vau si,ka sawichhuak ngam silo,tumkhat chu sawilo theilo dinhmun ah ka ding a ka nu ka han hrilh chuan

vawi 13 zet min mutpui hman tawh a,a tlai zo tawh ani" tiin a lung chu a chhe thar hle mai a,a sawi zawm theilo..Atei chuan khuh khek2 phah hian "kum 17 ka nih in Vai pakhat hian Uttar Pradesh ah hna tha tak min hmuh sak tur thu a sawi a,hotel nuam deuh ah kan thleng thla a,min duat in eitur tha tha min pe bawk a,a tuk a kan chhuak leh chu kan kalna lam pawh hre theilo in car hnunglam ah min mut tir a,chu car darthlalang te chu lah chu sun control vek ani si a,hmalam ka hmu thei lova,motor atang a min hruai chuah chuan patling thalai tak2 hian inchhung ah min hnuk lut dawr2 a,min ru bo ani tih ka hre ve chiah a,mi 15 laiin a min in sual chhawk ta ngat2 a,

ka au tuar2 a,ka bula vai hmeichhe dang te pawh chu min tih ang tho in an ti ani,mizoram police ten min rawn chhanchhuah meuh chuan ka tan dam in awmzia a awm tawh lo ni hial in ka hria,ka inten a,ka insit a,tu tan mah neih tlak ka ni tawh chuanglo"...a tap a,zu no chu a vawm keh thuai a...a sam te chu a kek buan2 a..nasa takin kan dang a,kan tilungawi thei ta hram a ni..

ZOtei chuan "keichu ka sawi velo zawk ange" atih lai chuan VDP an lo lang thut a,tlanchhiat tum a kan insingsak lai chuan min rawn man a,min phuar bet tlat a..min kai dawt2 chung chuan "mi hur lepchiah ho,hmeichhia te te zu ka in e in tia aw? in zak em?" tih phah in kan mawng ah an hlap ri thawt2 a..

Chumi zan chuan khawlai vawt takah kan thu tlaivar thak a,a tuk khua alo var chuan VDP President chuan lehkha hlai tak,hrui a inthlung hi a rawn keng phei a,chak takin kan lam panin alo kal a,kan mawng te chu ana in a thip hler hlur a,kan bul alo thlen chuan chu lehkha phek hlai tak chu min awrh tir theuh a,enge inziak tehreng ti a chu lehkha ka han bih thlak chuan ka tap hial a.. "NAWHCHI ZUAR KA NI" tih hi lian takin alo inziak a ni.. khawpui lun lai tak,mipui tamna ah chuan kawngsir ah min din tir a, kan chet hlek chuan min nam nawk2 a,mipui kal vel te chuan min en duh in min dem thu an chhak chhuak phawng phawng a...a then chuan "saw mi te bawk chu"

an ti ri sap thin..ka thiante chu vawi tamtak man tawh leh mualpho tawh an ni a,kei chu a vawikhat na ani thung a,mahse ka in zuar ve lo chung a, "NAWHCHI ZUAR KA NI" tih ka han awrh chu ka hrethiam lova,ka ngaithiamlo takzet ani..Davida leh ka pi leh pu te mawlh chuan min hmuh ka hlau a,ka pi te phei chuan zan ah ka hawng silo a,min ngaihtuah ngawt in ka ring a,min zawn hial pawh ka ring a ni..

Ni alo chhuak a,nichhuak hawi zawng takin kan ding lehnghal a,kan pentawng lu na nen,rilru hi a hliam in ana ngawih2 ringawt a ni..

Bazar kal an hawng sup sup a,thenkhat inkhai bawr tak te kar a,ka hmangaih Davida hmel ka han hmu chu ka hawi sawn rang kher mai..a rui hle tih chu a hmel ah a hriat a,min rawn hmuh hlau tak chuan hnunglam ka han hawi a,VDP awm ve reng te chuan min rawn pet nghal thuai a,ka thiante chuan "a ni hi chu a tel ve lo" tiin an au chel chul a,mahse engmah kan thusawi an ngaithla lova,an ngaihsak reng2 lo..kan thawm chu hria in Davida chu a rawn hawi thla a,ka mitsir ran lai chuan alo chhuk zel tih ka hria,ka hma ah chuan a rawn ding a,ka kun reng lai chuan "Lalremruat..mi tenawm nu,mihur nu" tiin ka biang ah chuan a dawm a,min beng ta siah siah mai le..ka tap hawk hawk a,ka tawt up up a,

ka thiante min hum tum na tawngkam lah chu an ngaithla duh silo..khawvel hi ka kua a,mihring te hi tumah indem tur kan awmloh vei nen,lehlam a sual in lehlam a tha a vua a,lehlam a tha in lehlam a sual a vaw vel mai2 ani tih an chhut lo..an hmachhawp chu an duh ve reng pawh nise an haw der a,tenawm an tilui tlat si ani..

Nileng a kan hma a chatthla Davida chu an nawr kiang a,rei fe hnu ah chuan ka hming chu nawhchi zuar te hming an chhinchhiahna ah an thai lut ve ta..min chhuah tawh hnu chuan In lamah pawh hawn ka duh lo,Davida tawngkamchuan min va tina tehreng em!!! a na ana..

Nileng a engmah ei ta lo chu ka ril a tam hle a,ka pi leh pu ten chanchinthar ah min hmu ngei dawn tih ka hriat phei chuan hawn loh law law tha tawh zawk a ka hriat vangin Zodin lamah ka phei a,pawisa ka nei lova,ka ril a tam a,sawi thiam rual loh in ka rilru ana a,ka beidawng in ka zak ngawih2 a,mahse engpawh sawi ila tuman an awih dawn chuang silo..Zan dar 11 zet a ri ta,ka lam pan a lo tlan phei Taxi chu ka zawn ah alo ding a,vawt ti tak a kuangkuah chung a ka thutna atang chuan ka tho a,Taxi hnung a chuang chuan "engzat nge?" tiin min zawt a,mahse ka chhang mai lo..A zu senchi pai rawn phawrh phah chuan Chocolate tui hmel fe hi a rawn phawrh bawk a,chutah zet chuan beisei tur ka nei

tawh chuang lo,miin nawhchi zuar ah min ngai vek tho,Davida pawh ka mangtha hmiah tawh anga,fa ka nei lo bawk a,nu leh pa lah ka nei hek lo,ka pi leh pu ka hlau tawh si a,ti rilru chungin Taxi kawngkhar chu ka hawng a,ka lut ta..

Chocolate chu ka ei nghal bawrh2 a,ka ril atam bawk a,reilote ah ka ei zo mai a,ka kawp pa chuan a In tereuh te ah min luh tir hnu ah "i ril a tam hle ani maw?'' tiin chaw eitur te min han siam sak phawt a,puar takin ka ei a,ani chuan zu alo siam ve mek bawk a...ka ei zawh chuan zu chu kan in mawlh mawlh a,khum ah lawn in ka taksa chu ka hralh ta...

Khua ala var meuh lo tih chuan ka harh hlawl a,dim te in ka tho tham2 a,ka kawp pa kekawr a pawisa zawng2 chu la in,a ID card leh lehkha pawimawh te ka han en chuan Police ani tih ka hre thei a,ka kal chhuak thuai a,khawvar chian hma a bikbo na tur zawng in hmun khawhar lam chu ka pan ta vang vang a..

Hmanhmawh taka ka pen hlawk2 lai chuan ka rilru ka kawm mawlh2 a,ka thil tih te chuan min vuak let hun a nei dawn ani tih ka hrechiang mahse ti lo theilo dinhmun ah ka ding miau si..ti a ka ngaihtuah lai chuan Sangpuii nen kawtthler ah kan intawng hlawl a,ani nen chuan Hotel pakhat pan in kan inzui ta hnak2 a..

Ni thum zet chu kan riak a,zantin chuan in zuar tur in kan thawk chhuak a,kei chu pawisa mamawh vang ani a,mahse ka thiannu Sangpuii erawh sex tello in rei tak a awm theilo,than thi a neih hma hauh a pawngsual tawk ani a,ka khawngaih ve leh chhawng hle na in tih theih erawh ka nei silo..mi tenawm kan nih chhan chu tenawm tak a chetna kan chung a a thlen vang ani tih hrethiam an awmlo...hur ve hrim hrim leh nawmchen duh reng vang ah an ngai ani,VDP leh Police ten mualpho takin min siam a,nun inkiltawih leh rilru na in vawi tam min siam ani..tuman kan saltanna atang a chhuak turin min pui lova,puihna dawng tur lahin kan mualpho a ngai si..Chu hotel a zan 4 kan riah hnu chuan kei chu ka dam sam loh vangin ka chhuak ve lova,Sangpuii chu zan dang ang lo takin hma tak ah alo kir a,a hmel chu a danglam kher mai..

"Ruat..i sex video a awm ania" min tih chuan ka hrilhhai in ka mengphawk nasa hle a,a phone chu a rawn phawrh a,Taxi driver in alo en a,ka rawn la a..tih phah chuan video chu a han Play a,ka au chhuak thawt a,hotel a thawk te hu hmanhmawh takin an lo tlan thuai a,''engmah ani love" sangpuii'n a han tih chuan an chhuak leh mai a,ka hmel leh hmai,ka taksa ngei mai saruak a ka awm lai chu ka hmu a,hman ni zan a Police pa bed-sheet ngei kha ka hmu bawk ani,ani chu a hmel alang ve lo..ka mittui chu dan rual loh in a rawn dir zawih2 a,a na ka tiin,rapthlak ka ti a,ka tap rawih rawih a,tunah chuan mi engzat takin ka taksa chu hmu tak ang maw?? tiin ka sam chu ka kek til thawt2 a,ka inten in ka inhua a,mahse keima duhthlan ngei ani si...mualpho tak a dawt a min puh tu leh thil tha zawk pawh ngaihtuah lova,khawtlang tan

thawk tha em em a in ngai VDP leh khawtlang Duty te chuan an mahni vanga nawhchi zawrhna sal a tang ka ni tih hre chang hauh lova,ka video chu tenawm ti tak a an lo en tur chuan ka nunna hial lak duhna khawp a beidawnna khur ah min hnuk lut ta..Sangpuii chuan min kuah in min hnem nasa mai a,mahse a sawt rih silo..chu video tenawm chu khawvel a awm chhung chuan a bo tawh dawn lo, ava rapthlak tehreng em!!!

Khawvel mi te hian pawngsual tu tenawm ai chuan a pawngsual hnu chu an la ten zawk tlat mai si a...Aw...ka dam ve reng hi a tangkai loh tehlul nen engah nge maw ka la thih loh cheu ni..khawtlang in an fak hlawh nan leh nakin a Politics ah te mi hriat an hlawh theih nan ti a midang vua a,dawt hmang a timualpho thin ho ai chuan dawt a an puh hnu nunchhe ta te kan la dem zel si...

Chumi ni atang chuan vawikhat mah ka chhuak lo,hotel fee zawng zawng pawh Sangpuii chuan min tum sak vek a,ka khua a sik a,ka dam thei meuh lo,ka taksa chang chu a na lo ka rilru zawk hi ani na ta em em chu...

Thla khat zet hnu ah pawh engmah ka la ni chuang lova,ka ban te chu a vuai in ka taksa dabg pawh a nelawm lovin ka cher chhe hle tawh tih ah chuan Presbyterian Hospital lam kan pan ta rigawt a...ka pi leh pu te chu sangpuii'n alo hrilh anih ka ring,rei vak lovah an lo thleng a,mahse chutih lai chuan HIV positive ka ni tih min lo hrilh zo chiah a,ka nun beidawng chu intihhlum tum nasa teh pawh ni ila tho chhuaktur ka awm lo,ka natna vang anilo,ka rilru hliam na lutuk vang zawk chu ani...ka pi chuan min kuah in ka pu chun min pawm a "kan ngaidam che alawm bawihte" tiin ka tan an tawngtai mawlh2 a...

An ni chuan beiseina thar min siam a,mahse tho tur ka awm lo...midangte ten leh thinhrik ni reng tawh tur in he natna khum ah hian ka thih hun tur ka nghak tlawk tlawk tawh dawn a nih hi..

(A tawp ta..he thu hi True story Base ah ziah a ni e)

-  Fela Sapkúng