ECI IN CEO THLAK DAWN, TUIKUKIN MIZORAM CHHUNGAH VOTE THLAK BAWK ANG

MZP President L Ramdinliana Renthlei leh MZP Sub-Hqrs Reiek Hruaitu thenkhat Hnam Chhan Hnatlang-ah

Aizawl | November 9, 2018: Vawiin tlai khan ECI aṭanga palai lo kalte leh NGO hruaitute chu an ṭhukhawm a.  Thu kan dawn danin, ECI chuan Joint NGO rawtna pawmin, Mizoram CEO SB Shashank chu thlak a ni dawn a.
Mahse, hetihlai hian Mizoram Home department principal secretary Pu Lalnunmawia Chuango chu a hna ngai a zawm leh dawn nge dawn lo tih erawh a la chiang lo. 
Pu Nunmawia hi SB Shashank in a hek vanga Delhi lamah sawn a ni. 

Hemi bakah hian Tuikuk pawhin Mizoram chhungah ngei vote thlak tura thu tihtluk a ni.

Jt NGO Coordination Committee in inthlan kaihhnawiha an thilphut hrang hrang te ngaihtuah hian Dy Election Commissioner Sudeep Jain kaihhruai ECI Team nen inbiakna hi vawiin tlai khan Aizawl-a Secretariat Complex ah an nei a. 

Inbiaknaah hian ECI Team ah hian Pu Sudeep Jain bakah Jharkhand CEO Pu Lalbiakthanga Khiangte, ECI Secy Pu SB Joshi leh Mizoram Addl CEO Pi Lalzarmawii te an tel a ni.

JT NGO hian  ECI in Mizoram pawnah tumah vote thlaktir lo turin ruahmanna siam ni se tia ziaka thu a dah tawh ah ding se an duh tih ECI hnenah hian an thlen a, hei bakah hian CEO Pu Sashank-a chu sawnchhuak ngei turin an phut tih an thlen a ni.

ECI Team hian naktuk khian Champhai an tlawh dawn a, Election official leh Media te kawmin inthlan inbuatsaihna an enfiah ang a. Hemi zawh hnu hian Aizawl lam panin an tel let leh dawn a ni.