MZP -IN ZOPHAI BUAINAA BUNGRAW CHANTE TAN ZANGNADAWMNA HLAN

Aizawl | October 6, 2018: Vawiin ni 6th October, 2018(Inrinni) chawhnu dar 1:00 khan MZP Conference hall MZP Pisapui-ah Bairabi Zophai hmuna Assam Police in Zofate Chawlhbuk sak tum hnatlang te an tih buaina a hliam tuarte leh thil bo MZP in Vehbur a khawn atanga chhawmdawlna semna hun neih a ni a, he hun hi Pu B. Vanlaltana Vice President in a kaihhruai a, Pu Lalnunmawia Pautu General Secretary hnen atangin report ngaihthlak a ni a. MZP President Tv. L.Ramdinliana Rentlei hnen atangin thusawi ngaihthlak a ni bawk a ni.

He huna thusawitu MZP President Tv. L.Ramdinliana Renthlei chuan, "MZP anga hnatlanga thawkchhuak hliamtuar te kha chu hliam tuar turah kan inngai a, vuak pawh min vaw turah kan ngai a ni. Kan journalist ten hliam an tuar a, vuak te an tuar ve kha kan hrethiam lo leh hle a, Mizo Journalist hliam tuar te hi kan zah che u a, chutih rualin kan chawimawi che u a ni. Social Media hrang hrangah kan hmu thin a, Mizoram Journalist te hi an taima tawk lo, awm hmunah an awm tawp a internet atangin news an la khawma an chhuah chhawng mai mai thin tih te kan hre thin a, vawiinah hian MZP-in kan hmuh chian em em chu Mizo Journalist te hi a tul huna chuan an taima a, an huaisen a, an thawkrim a ni tih hi kan hmu chiang hle a ni." a ti a.

L.Ramdinliana Renthlei chuan, "NGO ang chuan theihtawp kan chhuah thin a, kan theihna zawng zawng kan hmang ve thin a ni. Thisen chhhuak hial leh jail bang zut hial khawpin kan theihna kan hmang ve thin a ni. A tawpna chu Sorkar thuneitute tho tho a ni leh thin a, a hlawhtlinna tak tak chu Sorkar a ni zel a ni. Mizoram hi kan thenawm state te angin chimral kan la ni lova, Mizoram hi chhan theih a la ni. Chhan tlak a la awm a, Zoram chhan tur chuan ram hruaitu huaisen leh rintlak kan neih a ngai a ni. MZP chuan Mizoram leh Assam ramri chinfel a nih thuai theih nan hma a lak chhunzawm zel dawn a ni." a ti bawk.

Bairabi Zophai buaina a hliam tuarte leh thil bo chhawmdawlna Vehbur Mizoram hmun hrang hrang a khawn atangin tun dinhmunah a vaiin Rs. 5,44,381 hmuh a ni a, vawiin hian mi 32 te hnenah a sumfaiin pek chhuah a ni a, Bairabi Zophai buaina a kan bungraw hman Bairabi YMA Dekchi lian 4 leisak an ni a, midang ta MZP in kan hawh Dekchi lian 4 lei a ni bawk a. Comercial gas leh Bairabi khawtlang Mutbu 20 man hlan a ni bawk a ni. MZP chuan Bairabi Zophai buaina a hliam tuar leh Bungraw bo leh chhia chhawmdawlna atana Vehbur a khawnna a ui lova sum leh pai lo thawh tute chungah thinlung takin lawmthu a sawi tak meuh a ni. Bairabi Zophai buaina a Bungraw chhia leh thil bo tih hmaih palh leh report dawn loh a awm chuan MZP chuan a ṭul anga pek zel a tum bawk a ni.