Aizawl | October 3, 2018: Vawiin ni October 3 khan MZP buatsaihin Govt. JL. Higher Secondary School-ah Career Awareness Campaign neih a ni a, he hun hi Pu Andrew F. Lalramnghaka finance secretary MZP in a kaihruai a, Tv. L.Ramdinliana Renthlei MZP President leh Tv. R.K.Hnuna Director Zo-Career Solutions te hnen atangin thusawi ngaihthlak a ni.
He huna thusawitu L.Ramdinliana Renthlei MZP President chuan, "MZP chuan Aizawl khawpui chhunga Sorkar enkawl school hrang hrang-ah Career Awareness Campaign neih kan tum a, vawiin hi a bultanna a ni. Zirlaite hian kan hmalam hun tur kan career hi kan chian loh avangin kan nih tur ang te pawh kan ni phak lo thin a, kan career kan hriat chian loh thin avang hian zirlai thahnem tak kan beidawng thin a, hei hi MZP chuan pawi kan ti a zirlaiten kawng dik kan zawh theih nan tiin career awareness campaign hi kan buatsaih a ni. Mizo te hi All India services leh Central services ah te kan tlem ta tial tial mai a hnamdang in kan Sorkar office te an la luah zo mai dawn a Mizo zirlaite kan tan a ngai a, kan ram leh hnam humhalhna pawimawh ber pakhat chu zirna hi a ni."a ti a.
L.Ramdinliana Renthlei MZP President chuan, "Mizo zirlaite hian competitive mind kan nei tawk lo a mahni ram kan ngai lutuk thin a hei hian kan nih tur ang min nih tir thei lo a ni. Kan social life hi nuam kan ti lutuk a kan value system dik lo hian nghawng tha lo a nei a, hei hi kan siamthat a ngai a ni."a ti bawk.
Career Awareness Campaign MZP buatsaih ah hian Govt. JL. Higher Secondary School zirlai 500 chuang an tel a, Tv. RK.Hnuna Director Zo Career Solutions hnen atangin zirlaite mamawh career chungchang zirtirna ngaihthlak a ni a, zirlaite nen interaction hun nuam tak hman a ni. Naktuk ni 4th October 2018 hian Govt. Mamawii Higher Secondary School -ah Career awareness campaign hi neih chhunzawm leh tur a ni ang.
Post a Comment
He post chungchanga i ngaihdan lo sawi ve rawh: