MNF OFFICIAL CANDIDATE 2018 MLA ELECTION LEH AN CHANCHIN

Aizawl | October 22, 2018: Vawiin khan Vanapa Hall, Aizawl ah MNF chuan MNF day hmangin, he hunah hian inthlan lo awm tura MNF Official candidate puangin MNF election manifesto an tlangzarh nghal.

(Chanchinthar a thlawna i chhiar zel theih nan website a fakna awm hi lo click ve ta che.)

MNF MLA Candidate te leh MNF hruaitute

1. HACHHEK
LALRINENGA SAILO
 Pu Rinenga hi 1964 khan Hliappui khuaah a piang a. Electric Veng, Aizawl-ah a seilian a, Vengchhunga Pawl hrang hrangah te inhmangin NGO-ah YMA, President -VDP, Mizoram Goods Transport Association, Patron-Samaritan Association for the Blind, VicePresident -Youth Hostel Association of India.  Kum 2010-ah Aizawl Municipal Council Election hmasa berah khan AMC Ward No.1 atangin hneh taka thlan a ni a, Term laihawlah Vice Chairman a ni a, AMC Term chhungin a bial chhungah development hna tam tak a thawk a ni. Tunah Durtlang North-ah a nupui leh fapate pahnih nen an khawsa mek a, Prebytarian Kohhranah Puitling Sunday School Zirtirtu niin YMA Adviser a ni mek a, an chhungkaw eizawnna chu Sumdawnna ni.

2. DAMPA
LALRINTLUANGA SAILO
 Pu Lalrintluanga Sailo hi Pu Lalnguauva Sailo (L) leh Lalhmingliani (L) te fa a ni a, ni 13.6.1960 khan Aizawlah a piang a. Pawl sawm a zirlaiin MNF Under ground Sorkar zawmin Mizo National Army-ah 2/Lieutnant niin, Mizoramin Remna a neih thlengin Mizoram tan a theihna zawng zawngin a thawk. Zoramin Remna a neih khan Pi Lalbiakthuami nen inneiin, Luangmual Aizawlah an chhungkua in an cheng a, eizawnna lamah Class 1 Contractor a ni. Luangmual Aizawlah hian kum 1990 atanga kum 2002 thleng term li V/C ah thlan tlin a ni a. Luangmual YMA Branch President leh Treasurer a ni tawh a. Mizoram Football Association Executive member term 2 a chelh tawh bawk. Luangmual Presbyterian Kohhranah lawiin, kum 1988 atanga vawiin thlengin Pulpit rawngbawlna a chelh mek a, Puitling Sande Skul Zirtirtu a ni bawk. Ramthar, Building leh Social front Committe Member a ni.

3. MAMIT
Er H LALZIRLIANA
 Er H Lalzirliana hi 1970 khan Mamit khuaah a piang a, zirna lamah B.Tech (Mechanical) niin Senior Manager Hindustan Petroleum Corporation Ltd. hna duhawm tak kalsanin Pathian leh ram tan a inpe a.  Er Zira hian Guwahati-ah kum 10 chuang zet a awm chhungin Guwahati Mizo Welfare Association-ah OB nihna hrang hrang a vuan tawh a, President – kum 4, Vice President – kum 2, Finance Secretary – kum 2 a ni tawh a. GMWA hruaitu a nih chhung hian thil chhinchhiah tlak tak tak - Mizo thlanmual te, GMWA Office tur Mizoram House building a neih te, Guwahati Sumo Ambulance te, GMWA society registration te a tifel vek bawk. Kum 2013 atanga Kolkata khawpui-ah an pem hnu hian an awm kum atangin Kolkata Mizo Welfare-ah Vice President atan thlan nghal a ni a, kum 3 chhung President hna a chelh hnuah Vice President a ni leh a. A theih tawk tawkin Kohhranah a in hmang thin a, Guwahati Presbyterian Kohhran-ah Sunday School Superintendent, Sunday School Zirtirtu, Secretary te a ni tawh a. Kolkata a awm hnu hian Kolkata PCI Kohhranah Tual Upa atan kum 2015 khan thlan a ni a, tun thlengin chu rawngbawl hna chu a phak ang tawkin a chelh ve zel a ni.

4. TUIRIAL
SAILOTHANGA SAILO
 Pu Sailothanga Sailo hi Lalthanzama Sailo (L) fapa niin 1948 khan a piang a. An chhungkuain Chhinga Veng Aizawl-ah an khawsa. Kum 2003 MLA General Election khan Kawnpui bial atangin thlan tlin a ni. Khawtlang tana inhmang tak niin Chhinga Veng VC-ah tum e’ngemaw zat thlan tlin a ni tawh. YMA-ah life member a ni bawk. Kohran bel tlat mi a ni a, Chhinga Veng Presbyterian Kohhranah Puitling Sunday Sikul zirtirtu a ni a, Finance Committee-ah leh Social Front Committee-ah member  a ni a. MLA a nih laiin bialte tana inpe ber pawla sawi a ni bawk.

5. KOLASIB
K. LALRINLIANA
 Pu K. Lalrinliana hi 1960 khan Kolasib-ah a piang a, a nupui fanaute nen Tumpui veng Kolasib-ah an cheng, 1st. Class Contractor a ni. Khawtlang tana inpe tak niin VC-ah term 4 thlantlin a ni tawh a, VCP nihna term 3 a chelh tawh. Branch YMA President leh adviser a ni tawh a, District Taekwondo leh Badminton Association-ah te President a ni tawh bawk. Presbyterian Kohhran-ah Puitling Sunday School zirtirtu leh thuhril rawngbawlna chanvo a chelh a. MNF Gen. Hqrs. ah Adviser a ni. Kum 2004 MLA By-Election-ah MNF MLA a thlan tlin a ni a, MLA a nih chhung khan Subject Committee peng hrang hrangah te Chairman leh Member-ah te awm tawhin KVI Board Chairman, Zonal Railways User's Consultative Committee Member a ni bawk.

6. SERLUI
LALRINSANGA RALTE
 Pu Lalrinsanga Ralte 1978-a piang a ni a, zirna lamah BA niin Dinthar vengah a nupui fanaute nen an cheng. Lehkha a zir lai atangin Zirlai Pawl-ah inhmang thinin College Students’ Union-ah Magazine Editor te, Asst. General Secretary leh Mizo Zirlai Pawl, General Headquarters-ah Executive Committee Member niin ram leh hnam tan ke a pen chhuak ve tawh a. Naupang Sande Sikul department hrang hrangah hun rei tak chu zirtirtu niin, tunah hian Dinthar Presbyterian Kohhran-ah rawngbawltu a ni a, Puitling Sande Sikul zirtirtu a ni bawk. Kum 2012 khan Aizawl-a Local Council inthlan hmasak berah khan MNF ticket-in thlan a ni a, infiamna lamah pawh theihtawpa inhmangin hun rei tak chu Dinthar Football Club hruaitu a ni a, Aizawl West Zone Football Association-ah Honorary Secretary hmasa ber a ni bawk. MNF General Hqrs.-ah Secretary a ni.

7. TUIVAWL
LALCHHANDAMA RALTE
 Lalchhandama Ralte hi 1972 khan Kawnpui khuaah a piang a, a pa chu Rev RB Laitawia (L) a ni. Thiamna lamah MA (Pol Sc.) a ni a, a nupui fanaute nen Durtlang Leitan-ah an cheng, Leitan Presbyterian kohhranah Tual Upa a ni. Kohhran leh khawtlanga inpe tak a ni a, Chanmari West-a an awm laiin Branch leh bialah nihna pawimawh tak tak a chelh tam hle a, Chanmari Pastor bial KTP Leader pawh a ni tawh. Zirlai pawlah inhmangin 1996-a Chakma Foreigner electoral roll-a thun duh loh entirna kawngzawh MZP-in a huaihawt khan, Aizawl atanga Chawngte thleng kea kawngzawh khan Commander in-chief a ni nghe nghe. MZP General Hqrs.-ah President a ni tawh a, President a nih lai khan hnam inpumkhatna kutpui pawimawh tak MZP-in tun thlenga a huaihawt thin ‘Zofest’ huaihawt tan a ni a. Ram leh hnam humhalh nana NGO zawng zawng leh Political Party zawng zawng inzawmkhawm Save Mizoram Committee-ah Chairman a ni tawh bawk. 2006 khan Tlungvel bialah MNF ticket-in MLA-ah thlan tlin a ni a, MNF General Hqrs.-ah General Secretary a ni. 

8. CHALFILH
LALRINLIANA SAILO
 Pu Lalrinliana Sailo hi 1959 a piang a ni a, fa 5 neiin Upper Republic, Aizawlah an khawsa. Thiamna lamah BA a ni. Khawtlang tana inhmang tak a ni a, YMA Section Leader-ah leh Republic Veng Branch YMA-ah te Office Bearer a ni tawh a. Zoram buai avanga MZP bandh a nih khan MZP din lehna tura sulsutu pawimawh zingah a tel. All Mizoram College Students' Union President  leh MSU President a ni tawh a, MNF leh India Sorkar inremna a awm theihna tura hmalatu NGO pakhat Students' Joint Action Committee dintu a ni bawk. Infiamna lamah tui tak niin Mizoram pawnah Mizoram College Football Team Captain niin a khel tawh bawk. Zofate insuihkhawm lehna tura hmalatu ZORO-ah Patron Member a ni. Tunah hian Upper Republic Presbyterian Kohhran-ah Puitling Sunday School Zirtirtu a ni. NSUI-ah President, Aizawl District Congress Committee-ah President Term 2, MPCC-ah General Secretary a ni tawh a, All India Congress Committee-ah kum 15 member a ni tawh bawk. Term 3 MLA ni tawhin Minister pawh a ni tawh bawk.

9. TAWI
R.LALZIRLIANA
 Pu R. Lalzirliana hi August ni 3, 1949 khan Tualbung-ah a piang a, Armed Vengah an chhungin an cheng. Kohhran tan theih ang tawk leh phak ang tawka tlanchhe ngai lo mi a ni a, an lawina Armed Veng North Presbyterian Kohhranah Sunde sikul zirtirtu hna te, Pathianni chhun leh zan Sermon rawngbawlna chanvo te a chelh a ni. Politics lamah kum 1974 atang khan a inhmang tanin, Indian National Congress  a zawm a; Congress Party-ah nihna hrang hrang a chelh tawh a. Aizawl District Youth Congress Committee-ah General Secretary, Aizawl District Congress Committee-ah term 2 President a ni tawh a, MPCC-ah Vice President, Senior Vice President, Treasurer  & General Secretary nihna te a chelh tawh bawk. Kum 1998 General Election-ah khan Aizawl District Undivided-ah Congress ticket-in a mah chauh thlan tlin a ni a; hemi tum hian CLP Deputy Leader a ni nghe nghe. Kum 2008 atanga 2018 chhung hian Congress Legislature Party-ah Deputy Leader niin, ni 14. September. 2018-a Congress Party a chhuahsan hma khan MPCC Vice President a ni a. Congress Ministry-ah Home Minister leh dinhmun pawimawh tak tak a chelh tawh bawk.

10. AIZAWL NORTH I
LALRINGLIANA
 Pu Lalringliana hi Upa Rochhunga (L) leh Pi Thankungi te fa hming koh niin, March 1, 1955-ah a piang a, Bawngkawnah an cheng. Pathian leh sorkar duhsaknain department hrang hrang Health & Family Welfare, Public Works Department, Finance etc. ah te hna hrang hrang a thawk tawh a. February 28, 2015 khan Chief Controller of Accounts-in a pension a. PWD-a a thawh lai khan MNF sorkar-in Durtlang kawng zauh hna a thawhah leh Aizawl leh Lunglei inkar World Bank sum hmanga siam chungchangah a sulsutute zing ami. Aizawl Municipal Corporation Ward No-II-ah MNF ticket-in thlan tlin a ni a, AMC MNF sorkarah hian Deputy Mayor a ni bawk. Govt. J. Thankima College dintute zingah telin, Managing Board Secretary hna a chelh tawh bawk. Bawngkawn Branch YMA President leh Secretary hna a chelh bakah Central YMA-ah CEC Member a ni tawh a, CYMA Finance Committee-ah Chairman te pawh a ni tawh. Kohhran rawngbawlna lamah a phak ang tawka inhmangin, Presbyterian Kohhran Bawngkawnah lawiin, Kristian Thalai Pawlah Office Bearers te a ni thin a. Tunah hian Puitling Sunday School zirtirtu leh thuhriltu rawngbawl hna thawkin, Kohhran Committee peng hrang hrangah te chanvo a nei bawk.

11. Aizawl North-II
LALTLANZOVA KHIANGTE
 Pu Laltlanzova Khiangte hi December 20,1978 khan Aizawl-ah a piang a. Pu Kapchhunga Khiangte leh Pi Lalrimawii te fapa niin Dr. Ruth Vanlalhmangaihi d/o Lalrinmawia Ramhlun South nen kum 2014 khan inneiin, fa pahnih - fanu pakhat leh fapa pakhat a nei. Tunah hian Ramhlun South-ah an cheng. Zirna lamah chuan M.A. (History) a ni. Pu Tlanzova hian M.A. a zir zawh phat, kum 22 a nih atangin Journalism-ah a lut nghal a, Vanglaini chanchinbuah kum engemawzat a thawk a. Naupangte hmasawnna lam ngaihtuahin, naupang chanchinbu - Mizo Kids leh Beramno te a tichhuak thin. Chanchinbu hrang hrangah ram hmasawnna tur lam Article-te a ziak thin. Kum 2015 tawp lama Aizawl Municipal Corporation inthlanah Ward No. IV-ah MNF ticket-in thlan tlin a ni a, bial mipuite fak leh chawimawi a hlawh hle. Kohhran lamah pawh mi tangkai tak a ni a,  Ramhlun Presbyterian Kohhran-ah Puitling Sunday School zirtirtu ni. Pu Tlanzova hi Mizoram hmasawnna tur hrang hrang zirin India ram hmun hrang hrangah te a fehchhuak tawh thin a, USA-ah hmasawnna zirin a kal tawh bawk. MNF General Headquarters-ah Joint Secretary ni.

12. AIZAWL NORTH III
C LALMUANPUIA
 Pu.C.Lalmuanpuia hi Pu C.Liankhuma leh Pi Lalthuami te fa panga zinga milai niin October 26, 1973-ah a piang a, Chanmari West-ah an khawsa. Zirna lamah B.A Hons. (Political Science) a ni. Khawtlang rawngbawlna lamah pawh a theih ang tawk tawka inhmang thin a ni a, Chanmari West Local Council-ah Secretary leh Chairman a ni tawh a, Zoram Taxi Owners Association leh Mizoram Road Transport Union-ah General Secretary a ni tawh bawk. Kohhran rawngbawlna hi a ngaihpawimawh ber a ni a, Chanmari West Presbyterian Kohhranah Tual Upa a ni. Zorama kuthnathawktute chawi kanga an thawh rah an seng ngei theih nan University-a mithiamte nen theihtawp chhuahin hma an la thin a, kum 2008-ah United Democratic Alliance dinin Treasurer a ni. Kum 2010-ah MNF zawmin kum 2015-a Aizawl Municipal Corporation  inthlanah Ward No VI atangin Councillor atan thlan tlin a ni a, AMC-ah Legislature Party Leader a ni mek. MNF General Headquarters-ah Secretary a ni mek.

13. AIZAWL EAST I
ZORAMTHANGA
 Pu Zoramthanga hi 1944-ah piang a, a pa chu Darphunga (L) a ni. Thiamna lamah BA (Hons) English a ni a, an chhungkuain Ramhlun Venglaiah an cheng. 1966-a Zoram a lo buai hnu lawk khan BA result nghak chhuak lovin ram tan a penchhuak nghal a. 1969-a East Pakistan-a MNF an chhukthlak hnu lawkah Secretary to the President a ni nghal a, 1979--ah Mizo Hnam Pa Pu Laldenga innghahna ber a Vice President a ni ta a ni.
 Remna ziah a nih hnu Interim sorkarah khan Finance leh Education Minister a ni tawh a. Kum 1998-2008 khan Chief Minister a ni a, a hunlai hian Zoramin hmelthar a hmu chho a, development a thang nasa hle. 1998-a MNF sorkar khan Zoramin leiba a ngah hle a, hemi tihziaawm nan leh hmasawnna hna thawh nan tuma la tih ngai loh danin Central sorkar-ah ‘peace bonus’ vaibelchhe 175 a dil a. Union Finance Secretary chuan, “A pekna tur head of account-ah a awm lo, i hmu chuang lovang,” a ti hial. Heti a ni chung hian Central sorkar chuan mi rintlak leh thiltha duh a nih zia hriain vaibelchhe 183, a dil aia tam an pe.
 2005 khan Mizoramin mautam tampui a hmachawn dawn tih hriain BAFFACOS hming phuahchawpin central sorkar-ah sum a dil a. He sum hmang hian kha mautam tamah khan Zoram mipui, sorkar hnathawk chenin a thlawnin buhfai thla 6 chhung kan dawng a nih kha. He scheme atang vek hian Bamboo link road vaibelchhe 60 chuang man laih a ni bawk.
 A hnathawh ropui hi sawisen a ni lo. Bawngkawn - Durtlang road te, Aizawl - Lunglei World Bank Road te, Aizawl by-pass Road te, PMGSY hnuaia link road km 2000 chuang laih te, sorkar department e’ngemaw zat siam belh te, Congress sorkar-in District 5 an pek a nih dan tur ang thlapa funtion tir te, Assam Rifle umchhuak a New Capital Complex din te, Ch Chhunga Bus Terminal sak te, Ch Saprawnga Truck Terminal din te, Lalsawia Bus Terminal din te, Millenium Centre din te, Ramhlun Sport Complex sak te, Saikuti Hall Lunglei sak te, Vety College din te, Mizoram Health Care Scheme siam te, Aizawl Municipal siam te leh thil dang tam tak Zoram tan sulhnu ropui tak a hnuchhiat a ni.

14. AIZAWL EAST II
ROBERT ROMAWIA ROYTE
  Pu Robert Romawia Royte hi January 29, 1967 khan Upa Than Thuama Royte (L) leh Pi Lalbiakveli te fa hming koh niin Hmawngchuan, Zampuiah a piang a. A nupui fanaute nen Chhinga Veng, Aizawlah an khawsa. Thiamna lamah M.A. (Pol Science), M. Phil a ni. Pu Robert-a hi Mizorama SSA Scheme kalpui a nih tirh atangin Convener, State Planning Team a ruat niin Mizoram SSA hlawhtling taka a parchuah theihna tura bultumtu pawimawh a ni. RMSA Project Sanction hmu hmasa ber State Mizoram kan nih theihna tur Project siamtu a bawk. Pu Robert-a hi Northeast Consultancy Services, Chief Managing Director a ni a, NECS hian Aizawl-ah Hqrs. Office neiin, Kohima, Shillong leh New Delhi-ah te Branch Office a nei a, Nagaland leh Meghalaya sorkar ten Consultant-ah an ruai mek a, heng state pahnih tan hian an state budget pawn lam atangin  vaibelchhe 2000 chuang sum a hmuhpui tawh a. Mizoram tan bika Project a siam sak tawh leh a taka hmasawnna hnathawh mek sum belhkhawm chu vaibelchhe 200 a tling. Pu Robert-a hi North East atanga I-League champion ni thei hmasaber leh awmchhun Aizawl FC neitu a ni a, a neih sum ui lova thalaite hmasawnna tura hmang thin mi a ni.

15. AIZAWL WEST I
K SANGTHUAMA
 Pu K Sangthuama hi Pu Pianghleia (L) fapa niin 1940 khan a piang a, thiamna lamah PUC a ni. Eizawnna lamah 1st Class contractor a ni a, Vanapa Hall hi a sak a ni. Kohhran leh khawtlanga inhmang tak niin Kohhranah Puitling Sunday School Zirtirtu a ni a, thuhriltu a ni bawk. Kum 7 chhung Electrict Veng Branch YMA-ah President leh Vice President a ni tawh a. Central YMA-ah Finance Secretary leh Treasurer a ni tawh a, kum 14 chhung Central YMA-ah nihna pawimawh hrang hrang a chelh tawh bawk. Politics lamah Unit level atangin a inhmang tan a, Unit president, Block President te leh MNF General Hqrs.-ah nihna pawimawh tak tak a. MLA-ah term 3 thlan tlin niin Minister of State term 2 a ni tawh bawk.

16. AIZAWL WEST II
LALRUATKIMA
 Pu Ruatkima hi 1972 khan Mamit-ah apiang a, thiamna lamah BA (Hons) a ni a, Infiammi a ni. Mizoram aiawhin Football a khel tawh thin. Kum 1997-99 khan MZP President niin, Central YMA-ah Finance Secretary, Asst Secretary leh General Secretary a ni tawh a, Aizawl District Football Association-ah President hmasa ber a ni bawk. Kum 2013 inthlan khan Aizawl West II bial atangin MNF ticket-in thlantlin a ni a. Mi thil chik leh inzir peih tak niin House-ah a che tha thin hle. 2018 Varsity Platform-ah khan MZU zirlaite'n 'Best Legislator' atan an thlang. Kanan Vengah khawsain fanu 5 a nei a, an chhungkua eizawnna chu sumdawn a ni. Lalruatkima hi Zofate insuihkhawmlehna lam tuipuitu a ni a, hemi chungchangah hian UN Permanent Forum on indigenous People-ah Geneva-ah leh America-a UN office-ah a kal tawh bawk. Pu Ruatkima hi Kohhran bel tlat mi a ni a, kum 31 chhung tehmeuh Puitling Sunday Sikul zirtirtu a ni tawh a ni.

*17. AIZAAWL WEST III*
*VANLALZAWMA*
 Pu Vanlalzawma hi 1956 khan Chhipphir khuaah a piang a, a pa chu Upa Remkunga niin, a nupui fanaute nen Tuikhuahtlangah an cheng. Thiamna lamah chuan MA (History) a ni. Khawtlang leh vantlang tana inpe tak a ni a, 1991 khan Central YMA General Secretary a ni a, 1993 leh 1995 khan CYMA President a ni a, 1997-1999 khan CYMA Vice President a ni bawk. 1999 khan MNF leh MPC tangrualin Independent-in MP atan an vawrh tling a, kum 2004 khan MNF ticket-in MP-ah thlantlin a ni leh a. 2013 inthlan khan MNF ticket-in Aizawl West III bial atangin MLA atan thlantlin a ni. Zoram tan hna ropui tak tak a thawk tawh thin a, Mizoram University Bill Parliament-ah pulutin passed a ni a, tunah chuan Mizoram University kan nei ta a. Hun rei tak Kashmir leh North East-ah Mobile Phone hman phal a ni lo chu theih tawpa nawrin Mobile phone kan nei ta deuh vek a nih hi! Mizoram lei chhungril hausakna haichhuah a nih theih nan nasa taka hma lain a hmalakna a zarah Oil company lian tak takin hna an thawk a nih hi. Pu Zawma hmalakna azarah pawl hrang hrang paruk-in Ambulance an dawng a, pawl hrang hrang parukin sumfai tam tham  tak an dawng bawk.

*18. AIZAWL SOUTH I*
*K LIANTLINGA*
 Pu K Liantlinga hi 1953 khan a piang a, a pa chu Venghlui Lal Hrawva (L) a ni. An chhungkuain Venghluiah an cheng. Pu Tlinga hi vengchhung leh Zoram pum huap pawl hrang hrangah a inhmang nasa hle a. An vengah  tum 2 VCP atan thlan tlin a ni a, Mizoram Sport Co-ordination Committee-ah Chairman ni tawhin, AMFU-ah Secretary, Mizoram Truck Owners Association-ah Vice President, Mizoram Football Association-ah kum 1996 atanga 2002 thleng khan President a ni bawk. All India Football Federation-ah Executive member a ni tawh. Pu K Liantlinga hi Zoram Nationalist Party-ah dinhmun pawimawh tak tak a chelh hnuah Vice President niin Pu Lalduhoma kaiza vengtu ber a ni a. September 2013 khan ‘Mizoram saltlang chhanchhuahna kawngzawh’ a ho hian ZNP chuan an nei a, Aizawl atanga Lunglei thleng kein a kalchhuak. 2008 MLA Election khan Aizawl South I atang hian MLA-ah thlantlin a ni tawh bawk.

*19. AIZAWL SOUTH II*
*DENGHMINGTHANGA*
 Kum 1968, September ni 5-ah a piang a. Unau hmeichhia 3 a nei.  A nupui Lalthlamuani nen fapa pakhat leh fanu 3 an nei. Pu Denghmingthanga hi thiamna lamah BA a ni a, kum 1998-ah Kohhran Upa atan nemngheh a ni. Synod Revival Speaker, BSI Aizawl Auxiliary Youth Committee President te, KTP Kulikawn Branch Leader te, CR & RMC BSI Aizawl Auxiliary Secretary nihna te a chelh tawh. Chairman Kulikawn Pastor Bial, Secretary Aizawl Chhim Presbytery hnate chelh tawhin, Synod Mission Board member a ni. Khawtlang huap pawl hrang hrangahte a in hmang thin a, nihna pawimawh tak tak a chelh mek.

*20. AIZAWL SOUTH III*
*DR. F.LALNUNMAWIA
 Dr. F.Lalnunmawia hi Samtlang khuaah piangin a seilian a, kum 46 mi niin, fanu pakhat leh fapa pakhat a nei a. An chhungkuain Chawnpui veng, Aizawlah an cheng. Zirna lamah M.Sc. Ph.D. a ni a, Mizoram University-ah thawkin Professor puitling a ni. Mizoram University-a zirlaite khaikhawmtu Dean of Students Welafare a ni. Zirna lam kaihhnawihah India ram hmun hrangang hrangah Science, Agriculture leh Foresttry lamah Paper Present tawhin Research Paper 30 vel leh lehkhabu 2 a ziak tawh. Agriculture hmasawnna zirin 2015 khan USA tlawhin Myanmar rama an buhfai thar leh sawngbawl dante enin 2014 khan a kal a. Agriculture leh Forestry zirna Food & Agri Organisation, Japan International Cooperation Agency, Central sorkara Department of Science & Technology leh Ministry of Forest & Environment & Forest leh NABARD hnuaiahte Project a lo thawk tawh bawk. Dr. F. Lalnunmawia hian Mizo-ten Science lama hma kan sawn theihna tur lam hi a vei hle a, Mizo Post Graduate Science Society-ah President leh General Secretary-te a ni tawh a. Kohhran bel mi niin YMA leh khawtlang lamah a inhmang nasa hle. Kuthnathawktute dinhmun chawikan hi a ngaih pawimawh leh vei em em a ni. MNF General Hqrs.-ah hian Secretary a ni.

*21. LENGTENG*
*L.THANGMAWIA*
 Pu L.Thangmawia hi kum 1974 May, ni 11 khan a piang a. A nupui Lalhlimpuii nen Fa 4 neiin, Mission Vengthlang-ah an cheng. Mathematic thiam tak niin 1989 HSLC Exam khan Mathematics Subject-ah Topper a ni a, 1998 khan M.Sc-ah NEHU Gold Medalist a ni. Tunah hian Pachhunga University College-ah Mathematics Subject-ah Head of Department a ni. Zirlai pawlah inhmang tak niin an College-ah SU GS-te a ni tawh a, MZP General Headquarters-ah General Secretary a ni tawh bawk. Mizo Academy of Science President ni tawhin Academic Officer, MBSE-ah a ni tawh. Mission Vengthlang Presbyterian Kohhranah Social Front Committee member niin Puilting Sunday School-ah Secertary nihna a chelh tawh. Nilaizan thupui hawngtu, Assistant Secretary, Finance Committee leh Puitling Sunday School zirtirtu a ni. MNF Gen.Hqrs.ah General Secretary a ni.

*22. TUICHANG*
*TAWNLUIA*
 Pu Tawnluia hi 1943-a piang a ni a, thiamna lamah PUC niin BE zir tura a inbuatsaih laiin Pathian leh kan ram tana nunna thapin ramhnuaiah a chhuak a. Chawnpui Veng, Aizawlah an cheng. Mizo National Army-ah nihna pawimawh tak tak chelhin remna ziah a nih 1986 khan Army Chief a ni a. 1984-1986 chhunga MNF leh India-in remna a awm theihna tura inbiakna an neih khan Mizo Hnam pa Pu Laldenga a tawiawm thin. Remna thuthlung ziah a nih hnua Interim sorkarah Minister ni tawhin PHE, R&R leh P&S-te a chang a. 1998-ah MNF leh MPC-in sorkarna an siam khan Home leh Department pawimawh tak tak chelhin Chief Minister awm lohin CM charge latu a ni. Home Minister a nih lai khan Home Department-in an nghahhlelh em em Police Manual siam zawh a ni a, nasa takin Police Department thuam that a ni a. Hnaruak awm apiang sum awm loh chhuanlam awm lovin hnawhkhat nghal zel a ni a. A hun lai khan Indian Reserve Police (IR) Battalion 4 din a ni a. Thalai hnathawh tur thahnem tak a siamsak bawk. MNF General Hqrs.-ah Senior Vice President a ni mek.

*23. CHAMPHAI NORTH*
*DR. ZR.THIAMSANGA*
 Dr ZR Thiamsanga hi Pu Nghaklina (L) leh Biaksangi-te inkarah 1958 khan NE.Khawdungsei, Champhai District-ah a piang a. Helen Zaithankungi Sailo nen Fapa 1 leh fanu 3 an nei. Kulikawn, Aizawlah an cheng. Dr Thiamsanga hi MBBS, MD (Hmeichhe specialist lar) a ni a, BN Hospital & Research Centre, Kulikawn neitu a ni. Kum 1986 khan Medical Officer hna a thawk tan a, zir chhunzawm lehin 1995 khan RMC Imphal atangin MD (Obs & Gynea) a zo leh a. Hmun hrang hrangah a thawk kual nasa hle. Head of Department, Gynea, Civil Hospital Aizawlah thawkin ni 31, May, 2018 khan Pathian leh ram tan a dinhmun tha tak kalsanin Voluntary-in a pension. Dr Thiamsanga hi All Mizo Medical Student Union-ah President, Gen. Secretary, Fin.Secy leh Treasurer a ni tawh a, a thawhpuite ngainat a hlawh hle. Laklawh awm lova dam lote tana inpe thin a ni.

*24. CHAMPHAI SOUTH*
*TJ LALNUNTLUANGA*
 Pu TJ Lalnuntluanga hi 1979 khan Champhaiah a piang a, thiamna lamah BA, LLB a ni. Ukil hna eizawnnan a hmang mek a, Mizoram chhunga Bank leh Financial Institution hrang hrang 10-in Ukil-ah an hmang. Zirlai pawlah a theih tawp chhuah thin niin Students Self Support Union Sub-Hqrs. Champhai-ah Vice-President leh President a ni tawh a. Mizo Zirlai Pawl Headquarters Champhai-ah General Secretary, Vice-President leh President nihna a chelh tawh, Nagpur-a lehkha a zir laiin MZP-ah President leh Adviser-te a ni tawh bawk. MZP General Headquarter, Aizawl-ah Legal Adviser a ni tawh. Manuna hi Kahrawt Branch YMA-ah nihna pawimawh tak tak a chelh tawh a, Aizawl-a a awm tawhna - Venghlui, Durtlangah, Branch YMA-ah Executive Committee Member a ni tawh a, Central YMA-ah Legal Sub-Committee-ah member a ni tawh bawk. Zonuam Presbyterian Kohhran-ah Puitling Sunde Sikul zirtirtu a ni. MNF Gen. Headquarters-ah hian Secretary a ni.

*25. EAST TUIPUI*
*RAMTHANMAWIA*
 Pu Ramthanmawia hi Feb 25. 1957-a piang a ni a, Pi Lalchawithangi nen Innei in fa mipa panga an nei. Tleirawl a nih lai atanga mahni kea din tum mi, Electronics lamah a kal a, Diploma a zir zo. 1980-ah Zarkawtah mahni dawr hawng tanin TV leh Video te siamin, a zuar tan a. TV dawr changtlung tak nei chhovin, Mizorama TV zuar hmasa berte zinga mi a ni. A eizawnnaah a tluang hle. Kum 2004 atang khan 1st Class Contractor niin a hnathawhnaah Pathian Malsawmna a dawng nasa hle a, PWD hnuaia Contractor hmingtha berte zinga mi a ni. Khawtlang tana inhmang tak niin Chaltlang VC-ah term khat thlan tlin a ni a, Laipuitlang VC apian tirh atangin a zawnin term 5 VCP hna a chelh. Laipuitlang Presbyterian Kohhranah Tual Upa a ni a, Sande School Zirtirtuah a zawnin kum 25 a tang a, chawimawina pawh pek a ni. MNF Party-ah General Secretary a ni.

*26. SERCHHIP*
*C.LALRAMZAUVA*
 Pu C.Lalramzauva hi March 1, 1961 khan Pu C.Kaphnuna (L) leh Pi Laltawni te fa pahnihna niin Bawngchawm khuaah a piang a, thiamna lamah MA (Eng), LLB niin eizawnna lamah Senior Advocate a ni. Kulikawn West, Aizawlah chhungkuain an cheng. Pu Ramzuava hi kum 1984-1991 chhung khan Pachhunga University College-ah Lecturer hna a thawk a. Kum 1992 atangin Ukil hna lamah a kal ta a. Kum 1977 khan Assam Board hnuaia HSLC Exam Topper a ni. Eizawnna lamah pawh kum 2010 khan Gauhati High Court chuan Senior Advocate nihna a pe bawk. Ukil hna a thawh chhungin Mizoram Bar Association President-ah tum 3 thlan tlin a ni tawh a, tunah hian Mizoram Bar Association President a ni. Kohhran rawngbawlna lamah inhmang tak niin Kulikawn West Kohhran Upa niin, Kulikawn Pastor Bial Secretary 2017-18 niin Aizawl Chhim Presbytery-ah Sub-Pastoral Committee Member a ni a, Synod Pastoral Committee Member a ni bawk.

*27. TUIKUM*
*ER LALRINAWMA*
 Er Lalrinawma hi 1973-a piang a ni a, thiamna lamah B.E. a ni a, an chhungkuain Chhinga Vengah an khawsa. Kohhran lama inhmang tak niin Kohranah puilting Sunday School Zirtirtu a ni a, Finance Committee member a ni bawk. Kum 2016 khan Lunglei chanchinbu lar tak Vulmawi chuan ‘Best Legislator’ atan a thlang nghe nghe.  Er Lalrinawma hi a bial tana inpe tak niin a theihna zawng zawng bialte hlan mektu a ni a. Hemi avang hian Lungpho khua chuan ‘damlai lung’ an phun sak a, Chhingchhip Mualpui khua-a All Party & All NGO chuan chawimawina hun an lo hmang tawh bawk. Er Rinawma hian a bial mi harsa zawk tan Dr Ambedkar Medical Foundation kaltlangin Cancer enkawlna leh zunthlum te’n dialysis an tihna tur fund Delhi atangin a sawi chuak a. Hemi kalzelah hian Zoram mipui tam tak, mi harsa zawk cancer leh zunthlum veiten a thlawnin enkawlna an dawn theih phah ta zel a ni.

*28. HRANGTURZO*
*LALCHAMLIANA*
 Pu Lalchamliana hi Ex. Jemadar Parala (L) leh Pi Sangkhumi (L) fate zinga a upa ber dawttu niin, August ni 17, 1949 khan Electric Veng Aizawl-ah a piang a. Kum 1977 khan Nuchhungi nen inneiin, fanu pahnih leh fapa pahnih  a nei a. An chhungkuain Electrict vengah an cheng. Pu Lalchamliana hi rawlthar a nih chhoh lai atangin ram leh hnam vei mi a ni a, MNF-in kum 1966-a Mizoram zalénna a sual khan naupangté niin a lut ve nghal a, Lieutenant-ah a kaí hman. Hetih hun lai hian Mizo National Army-ah Officer naupang ber a ni. Kum 1974-ah man a tâwk hlauh va, Jail atanga a lo chhuah leh hnuin lehkha a zirzawm leh ta a. M.A (Political Science) a zir zo va, ‘Gold Medalist’ a ni. Kum 1984 atangin vawiin thlengin Pachhunga University College-ah Associate Professor hna thawkin, tunah hian Political Science Department-ah Head of Department a ni. MNF Sorkar-ah Cabinet Minister leh Speaker a ni tawh bawk.

*29. SOUTH TUIPUI*
*DR R LALTHANGLIANA*
 Dr R Lalthangliana hi 1956 khan a piang a, Kanan Veng, Aizawl-ah an chhungkuain an cheng. Thiamna lamah M.A., M.PHIL, PHD a ni a. Kohhran Upa a ni. MLA-ah tum 5 chhung thlantlin a ni tawh a, Minister nihna pawh term hnih a chelh tawh bawk. Department hrang hrang a enkawl tawhnaah hnuhma chhuanawm tak tak a nei thahnem hle a. Education Minister a nih laiin Selection Grade-ah zirtirtu 4910 upgrade an ni a, Middle School leh High School-ah Hindi Teacher post 491 siamin lak an ni. Operation Blackboard hnuaia zirtirtu 277 Central Sceme tawp avanga ban tura tih chu Central sorkar dawrin chhawr chhunzawm an ni a. A minister hunlai vek hian Primary School Building 571  leh Middle School 474 sak zawh a ni bawk.  A hunlaiin Mid-day meal zirlaite hnenah sem tan a ni bawk. North East Education Minister Committee Chairman a ni a, SSA sum Central-in zaa 50 chauh tum tawh tura thutlukna an siam chu a ho hian nawr hniam niin, Mizoram State sorkar-in zaa 10 chauh tun thleng hian kan la tum chhunzawm ta zel a ni. RMSA hi a bul tantu a ni bawk. Education Minister a nih lai khan  Private School 30 Adhoc Grand-in-Aid-ah hlankai an ni a, Private School 213 zet lumpsum Grand-in-aid-ah hlankai a ni a, deficit School 200 zet Provincialised an ni bawk. Hemi hnu 2008 khan Private School 82 lumpsum Grand-in-aid-ah hlankai a ni a, lumpsum Grand-in-aid School 203 Adhoc Status-ah hlankai a ni. Adhoc leh Deficit School 46 provincialised an ni bawk.  Environment & Forest Minister a nih hun chhungin building chi hrang hrang 490 sak zawh niin building 90 cheithat a ni. Rural Development Minister a nih laiin North East puma RD Minister Conference a chiarman-na hnuaiah din a ni a. RTI Act Mizoram hman a nih theih nana hmalatu a ni a, Mizorama chanchinbu mite hamthatna Journalist Welfare Fund siamtu a ni bawk.

*30. LUNGLEI NORTH*
*DR.VANLALTANPUIA*
 Dr. Vanlaltanpuia hi Upa Lalrinchhunga leh Pi Ngurkhumi te fa upa ber niin, 14 February 1975-ah Civil Hospital Aizawlah a piang a. Pukpui khuaah in leh lo neiin, nu leh pa te nen an khawsa a, a hnathawhna avangin Mission Vengthlang , Aizawlah a nupui fanaute nen an cheng. Zirna lamah M.A, PhD a ni. Dr Vanlaltanpuia hi lehkhathiam thei tak a ni a, Master Degree (Philosophy) NEHU atangin First Division-ah a zo a, India rama Technology zirna in tha ber Indian Institute of Technology, Guwahati-ah Doctorate a zirchhuak leh a. Pachhunga University College-a Department of Philosophy-ah Assistant Professor hna thawkin, ‘Senior Grade’ a ni. Kohhran lama inhmang tak niin BCM Pukpui Unit TKP-ah Secretary leh Office Bearers nihna engemaw zat a chelh tawh. Aizawl lama a awm hnuah pawh Pathian rawngbawl hna chhun zawm zelin Republic Vengthlang Kohhran Unit TKP-ah President leh Treasurer a chelh tawh bawk. Guwahati  Kohhranah Rawngbawltuah thlan ni tawhin Sunday School Superintendent a ni tawh bawk.

*31. LUNGLEI EAST*
*LAWMAWMA TOCHHAWNG*
 Pu Lawmawma Tochhawng hi 1956 a piang a ni a, zirna lamah BA a ni a, Ramthar Veng, Lunglei-ah an cheng. Khawtlang thatna duhin pawl hrang hrangah a inhmang nasa hle a, Lunglei District Sport Committee - treasurer a ni a, Lunglei District Football Association - President term thum a ni tawh a. Lunglei District Rifle Association-ah term 2 Vice President ni tawhin Lunglei District Drama Party-ah Vice President a ni bawk. Pu Lawmawma hian thalaite hmakhua ngai pawimawhin vawi engemaw zat Football Tournament leh infiamna dang inelna hrang hrangah ama sum sengin a buatsaih thin a, Lunglei-a football thi lek lek tawh a ngaih chu LDFA a President a nih hian tinungin theihtawp a chhuah a, a hlawhtling hle.  MNF sub-headquarters, Lunglei-ah President term 3 a chelh tawh a, President a ni. An lawina Kohhranah Kohhran Upa a ni bawk.

*32. LUNGLEI WEST*
*C LALRINSANGA*
 Pu C Lalrinsanga hi Pu C.Daruma (L) leh Pi Malsawmi te fapa naupang ber dawttu niin kum 1961, June ni 1-ah Lunglei-ah a piang a. Kum 1986 khan Pi. Lalsangpuii Sailo nupuiah neiin fapa pathum an nei a, Lunglei Bazar-ah an cheng. Thiamna lamah B.A a ni Kohhran leh khatlangah inhmang tak niin BCM Bazar Veng Lungleiah lawiin Sunday School zirtirtu kum 1984 atang khan vawiin thlengin a ni. Kum 1979-80 chhova Mizo Zirlai Pawl Sub-Hqrs Lunglei din anih khan hruaitu thlan chhuahah awm chhovin, MZP Sub-Hqrs hruaitu hmasa ber te zinga mi a ni bawk. Kum 1996-99 inkar V.C thlanah khan tum 4 thlan tlin a nih bakah tum khat VCP a ni bawk. Kum 1998 leh 2003 MLA  Election khan MNF Official Candidate niin Vanva Assembly Constituency-ah thlan tlin a ni a, Minister of State leh Deputy Speaker a ni tawh bawk.

*33. LUNGLEI SOUTH*
*DR K PACHHUNGA*
 Dr. K. Pachhunga hi Thlengang khuaah kum 1968-ah a piang a, thiamna lamah MSc (Chemistry), PhD a ni. Associate Prof. Lunglei Gov’t College hna a thawh laiin kum 2013 September khan College hna chawlhsanin Pathian leh ram tan, tiin MNF party a zawm. Kum 2015 khan New Delhi Company lar tak, TARU & LEADING EGDE leh Japan Company lar leh lian JICA Company tang dun chuan, Consultant-ah an ruat a. NH.54 Tuipang to Zemabawk via Hnahthial kawngpui zauhna Project duangin India mithiam, Engineer leh Scientist-ho nen thawk hovin Japan sorkarah kawng zauhna tur sum dilin, Project an thehlut a.  Japan sorkar chuan he  project an thehluh hi tha tiin, India sorkar tanpuina vaibelchhe 7000 dawn an pe. Lunglei Headquarters MZP leh MSU-ah Adviser a ni tawh a, Lungei YMA Sub.Hqr.-ah Executive member-te ni tawhin, Lungleia MZU Southern Campus a awm theihna tura hmalatu Lunglei Co-ordination Committee Chairman a ni tawh. Mizo Academy of Science-ah Founder President a ni bawk. Tunah hian MNF Sub.Hqr Lunglei Treasurer a ni.

*34. THORANG*
*R. ROHMINGLIANA*
 Pu R. Rohmingliana hi 1972 khan Bungtlangah a piang a, a nupui fanaute nen Ramhlun North-ah an khawsa. Zirna lamah BE a ni. Engineer a zir lai hian ram dang leh hmun danga hmasawnna thleng mekte a hmuhin a rualawt em em a, sorkar hna lam ngaihtuah lovin Politics lam a luhchilh ta a. Kohhran bel tlat mi a ni a, lehkha a zir laiin Tual Upa-ah thlan a ni tawh a, Kohhran Secretary-ah pawh tang tawhin TKP-ah Leader leh Secretary-te a ni tawh bawk. Pu Rohminga hi Union Minister A Raja khan BSNL Advisory Board-ah a ruat a, Mizofed Board of Directors-ah kum 4 tel tawhin, kum 2006-2009 khan kum 3 chhung Mizofed Chairman hna a thawk tawh bawk. Mizofed Chairman a nih lai khan India ram State hrang hrang aiawh Minister-te zingah paper present tura tih a nih angin paper a present a. Kum 2007 khan Friendship Forum of India chuan Personalities of India Award a hlan bawk. MNF General Hqrs.-ah General Secretary a  ni.

*35. WEST TUIPUI*
*PU F ROBERT HMINGTHANSANGA*
 Pu F Robert Hmingthansanga hi Pu Thangkunga (L) leh Pi Zasiami te fa 8 zinga 7-na niin October ni 2, 1980 khan a piang a. Zirna lamah B.A, LLB a ni. A nupui te nen Farm veng, Lunglei-ah an khawsa. MNF Party a tui êm êm thin niin active part erawh kum 2012 khan la tanin Mizo National Front, Sub Hqrs, Lunglei-ah Legal Adviser a ni a, MNF General Hqrs.-ah National Executive Member niin, MNF Sub-Hqrs Lunglei-ah Legal Board Chairman a ni bawk. MSU Regional Headquarters, Lunglei-ah legal Adviser nihna hun rei tak chelh tawhin, MSU tan nasa takin a hun leh tha a seng a. Ukil hna eizawnan a hmang a ni.

*36. TUICHAWNG*

*37. LAWNGTLAI WEST*
*C RAMHLUNA*
 Pu C Ramhluna hi 1947 khan apiang a, an chhungkuain Bungkawn, Aizawlah an cheng. Thiamna lamah M.Sc (Forestry), LLB a ni.  Pu Ramhluna hi lehkha thiam thei tak niin 1974 khan UPSC hnuaiah Indian Forest Service a inziak tling a, Mizo zinga IFS hmasaber a ni. IFS-a a luh hnu hian hna hrang hrang a thawk kual nasa hle a, 2006 khan Principal Chief Conservator of Forest & Secretary, Mizoram niin he hna hi 2008 thleng a thawk. Pu Ramhluna hi khawtlang leh kohhranah inhmang tak a ni a, YMA-ah Life Member niin, MZP Shillong-ah 1973 - 1975 thleng President a ni tawh. Baptist Kohhranah lawiin 1994 khan Upa atan nemngheh a ni a, Kohhran leh bialah Chairman nihna te a chelh tawh thin. City Church Aizawl-ah Chairman a ni a, Sunday School Superintendent leh Building Committee Chairman a ni bawk. 2008 MLA thlan khan MNF Ticket-in Lawngtlai West bial atangin thlantlin a ni.

*38. LAWNGTLAI EAST*
*H BIAKZAUVA*
 Pu H.Biakzaua hi ni15.05.1965-ah Lungtian khuaah piangin, thiamna lamah B.A., B.Ed a ni. Pi S.Hmingsangberi nen inneiin fa paruk an nei a. Electric Veng Lawngtlai-ah an chhungkuain an khawsa. H Biakzauva hi Lairam Isua Krista Baptist Kohhran, Electric Veng Lawngtai-ah lawiin Kohhran Upa a ni a, tualchhung Kohhran Secretary a ni. Kum 1992-ah High School Teacher hna bansanin MNF Party-ah a lut a, MDC-ah vawi 4  thlan tlin a ni. LADC-ah Executive Member, Vice Chairman Planning & Development Committee leh Chairman Town Committee-te a ni tawh a. MNF District Hqrs. Lawngtlaiah Vice President a ni.

*39. SIAHA*
*DR.K.BEICHHUA*
 Dr. K.Beichhua hi kum 1966, December ni 12-ah a piang a. Unau mipa 3 leh hmeichhia pakhat an ni. Siaha Bazar vengah an cheng thin a, tunah MLA Hostel, Tuikhuahtlang Aizawlah an khawsa. Dr Beichhua hi MBBS a ni a, Lairam Kristian Medical Centre Lawngtlaiah Medical Superintendent-in kum 3 a thawk tawh a. All Mizo Medical Student Union-ah President leh Vice President nihna a chelh tawh. Mara Tlawmngai Pawl lian ber MTP-ah kum 5 President a ni tawh bawk. Kum 16 chhung Damdawi In hrang hrangah Medical Officer hna a thawk tawh bawk. Dr Beichhua hi Evangelical Church of Maraland Kohhran Upa a ni mek. Siaha bial MLA a ni mek.

*40. PALAK*
*M CHAKHU*
 Pu M.Chakhu hi 1978 khan Tuisih, Siaha District-ah Pu Jeff M.Sanga leh Pi S.Pawchi(L) te inkarah a lo piang a, an unau zinga upa ber a ni. A naupan tet atanga a seillenna leh an unauin an khua a an ngaih chu Tuipang a ni. Tuna Aizawl Upper Khatla-ah an mahni in leh loah an cheng. Pu Chakhu hi zirna lamah M.A (Hist) a ni. Chakhu hian ECM Higher Secondary Siaha-ah 10+2 teacher-in kum 5 a thawk a, Lawngtlai DRDA-ah Programme Officer-in kum 2 chuang a thawk tawh bawk. 2009-2013 khan Cabinet Minister Pu S.Hiato, Pvt Secy in a thawk bawk. Zirlai pawla inhmang tak niin kum 2002 -2005 khan Mara Students Organisation, General Hqrs-ah President term 2 a chelh tawh a. Kum 2017 atangin MTP-Hqrs-ah Executive member a ni.

- source : Media & Publicity, MNF Gen.Hqrs Aizawl