Aizawl | August 7, 2026: MPCC Vice President Zodintluanga chuan, tuna sawrkar lai mek ZPM chu dawt hmanga hma la leh sawrkar hmasate nasa taka bei thintu an nih thu a sawi.
Mizoram Pradesh Congress Committee chuan vawiin khan Aizawl Congress Bhavan-ah MPCC Political Session neiin, he hunah hian Pu Zodintluanga chuan, "ZPM-te thangah hian Congress chu awh an nih dawn loh thu leh , opposition role tha tak play-in nasa takin an beih dawn thu a sawi a. Sawrkar lai beih chu ramhlui ziaa chhuah an tumna chu Congress party-te ngawih tir tumna mai a nih thu sawiin, ram leh hnam tana ding tlat turin party mipuite a chah a ni.
Chief Minister-in Inner Line Permit (ILP) chungchanga 'an duh chuan min hlihsak thei' a tih chu pawi a tih thu sawiin, hemi duh lohna lantirtu thalaite MHIP-in an lo dem chu political party pakhat tlawnna niin a puh a. Congress sawrkar hun laia NLUP leh MPSC-a thiamna leh rinawmna (merit-based) dah hmasak thin a nih dante sawi chhuakin, tunah erawh mipuite chu chhiah hrang hrang hmanga 'sawr' an nih bakah State Budget aia tam leiba an siam tawh thu a tarlang a. Mizo Accord leh Peace Accord chungchanga Chief Minister tawngkam hrang hrangte chu mahni inhmialna leh hlawm lo tak a nih thu a sawi bawk.
Zodintluanga chuan Chief Minister chu mahni thuchhuak vawng thei lo leh rin ngam lohah puhin, kristian ram hruaitu ni si, ringlo mi (Ambani) fapa nena inzawmna thil-ah kalphung thar tha lo leh milem biakna chikhat a nih thu a sawi a. Mizo mipuite chu hruaitu principle nei, mirethei leh kuthnathawktute thlawp thintu Congress Party chu din thar leh ngei a tul thu a sawi a. Mipuiin Congress an ngai thar leh tawh tih sawiin, ram leh hnam tana rawngbawl leh thei turin party mi leh sate tan la thar turin a chah bawk a ni.
MPCC/Media/PR-2026/57
Dated: Aizawl, August 7, 2026
PRESS RELEASE
Vawiin August 7, 2026 hian Congress party chuan Congress Bhavana Golden Hall ah 'Political Session' kan nei a. He hunah hian Pu Zodintluanga, Ex MLA leh Vice President, MPCC chuan thu a sawi.
Pu Zodintluanga chuan "Tuna kan sawrkar hrawn mek hi an fing khawp a, sawrkar kal tawhte chhe thei ang berin nasa takin dawtin min bei a. Sawrkarna an siam fel vel leh sawrkar lai beih chu ramhlui zia an han ti a, an policy sawi rawh se an ti leh a. Tam tak chu chumi thangah chuan an awka, sawrkar lai an beih anga kan beih ve an hlauh vang a ni. Vawiin ni ah hian ZPM te thangah kan awk dawn lova, Congress hian nasa takin kan bei dawn a, opposition role kan play dawn a ni tih ka sawi duh a ni" a ti.
Mizo pipute khan mi dawihzep, thian chhan ngamlo te chu pawnfen feng tlak an ti thin. Kan Chief Minister in kan inhumhimna ILP Centralin min hlihsak an tum pawha kan dodal ang ti lova an duh chuan min hlihsak thei a tih duh lohna lantir nan puanfen kan thalai ten dawihzep tiin an fentir a, kha thil an dodal chungchangah khan MHIP te khan an tih loh tur an rawn ti a, kan thalaite thiltih kha political party pakhat tlawnin khatiang kha ti tawhlo turin ka ngen duh a ni.
Pu Lal Thanhawla ka vel dawn, Bhavan ka lilam dawn, Lal Thanhawla jailah chaw an chhum kep titu kha engah nge kan dim anga, kan beih loh bik ang. Pu Zoramthanga kha 'Not Normal' tih ten zu han sawi duh a mawle. Hnamdang te chuan Karma tiin an sawi thin a, ama chungah a thleng mek a ni.
Mipui hmaah an tih theih loh tur an tiam a, kan sawrkar kal tawh te kha engmah ti lovah an chhuah a, mipui in sawrkarna an pe ta a. Amaherawhchu, sawrkar tan thil tih a harsat zia a lo lang zel a. Tu nge mirethei ngaihsaktu, tunge mi harsate eizawnna siamsaktu chu mipuite hian an hre thar a, Congress sawrkar kha an ngai leh tawh a ni.
NLUP hi a that em avangin party dangte hian a ngaihna an hre ve si lova, sawisel ah an tlak a ni. Kan ram kum 20 a buai a, kan harsa em em a, kan rahbi a tleu a mipui an rethei em em a nih kha. Pu Lal Thanhawla ten NLUP an rawn duang chhuak a, mi tam tak eizawnna an siamsak a, tam takin an dinchhuahpui avangin kan hotupa Pu Lal Thanhawla khan ‘Pathian lamtang programme’ a ti hial anih kha.
Gen Z te khan lo ngaithla teh u, Congress sawrkarah chuan a thiam apiang ten hna an hmu thin asin. MPSC Chairman ah te khan Officer corrupt lo ber an tih Pu H. Liansailova kan hmanga, a dawt lehah pawh pastor pension pawh la ni lo, pastor tanglai Rev. Zosangliana Kawlni MPSC Chairman atan kan hman ni. Heng thu han sawi te hian tun thleng hian party mi leh sate rilru na khawpin Congress sawrkara Minister te khan hna dilna ah kan sawisak ngai lo. Hotute duhsakna zara Minister ka nih ve pawn kan meeting hmasa berah Pu Lal Thanhawla hi Chairman a ni a, Minister te tan MPSC Chairman biak duk duk te, officer sum dil te hi thil zahthlak a ni a ti asin.
Thalai hna zawngte khan hei hi hre rawh u. Hun kal tawh ah khan thil tih dik tawk loh te pawh kan nei ang. Mahse, kan thil tih that te, kan hnathawh tawh te leh ram tana kan la thawh lehzel tur te min ensak ula ka duh a ni.
Chief Minister hian Law College Freshers’ Social ah ILP an duh chuan an hlip thei tih a sawi a. Engkim mai hi kan ram danpui ah hian nghet tak a awm lo, a duhtu tam zawk an nih chuan siamrem theih zel a ni. BEFR 1873 ah chimral kan nih loh nana humhalhna kan chhawm zel, hungbik nihna kan chanvo kan hmang mek a ni.
Mizo Accord a nihna a Special Provision hi kan thu lova khawih danglam theih lova ngaih a ni a, India ramchhung khawiah pawh tlang par par thei tura inbngaiten he dan hi ngaithei lo an awm tawh a. Chutihlaiin, hlih an tum chuan a tawp thlengin kan humhim ang ti pawh ni lo, kan CM berin an duh hun hunah an hlip thei ati ngawt mai hi hlip se a tih vang nge? Zoram mipui hian kan zawt duh. Chhungkaw chungchang, nupa chungchang leh unaute chungchang thil dik leh thleng theiah pawh sawi tullo hi a awm thin a ni.
Peace Accord pawh Pu Laldenga nen zan rei tak thleng duangin kan ziak ati a, a hnuah Mizo mipui a huam lo a ti leh a. Modi a zuk hmu a, Peace Accord zawm thatna (lasting symbol of Peace Accord) zar zovin Thenzawl a din tur Peace City siamna tur Vaibelchhe 10 an pe a ti a, Peace Accord ber a sawi chhe leh hi engvang nge? Kan sakhua te, missionary hnathawh te humhim a ngai tih hi hria se ka duh. Hawina lam apianga daw mai Chief Minister kan nei hi a pawi a, kohhran a ti mualpho a, kan missionary te hnathawh a ti thuanawp nasa hle.
Tho leh Krista Isua aiin ringlo mi Ambani fapa thlalak pawh chawimawi a, piancham lawmpuina thusawi thlalak bula neih kha milem biakna chikhat, thlarau sual hnathawh anih hmel tlat. Kalphung thar tha lo tak a ni.
Hetiang chuan kan ram hi milem biakna ah min chhuah zo mai dawn. ZPM sorkar hi a inlamlet a, sai ip puan sin ringawt nilo, thinlung simna tak2 nen an kal loh chuan tunah pawh kan State Budget aia leiba tam zawk record siamtu anni der chu a nih hi. Hawina lam apiangah mipui min sawr a, chhiah khawn theihna tur an ngaihtuah nileng zankhua zak zak emaw tih mai turin thil chi hrang hrangah chhiah la in a theih apiang an tipung thur thur a, mipui hi min sawr fu vek tawh chu anih hi. Hetiang renga sorkar a kal hi chuan chhiat vekna, indinthar harsa leh tawhin min chhuah dawn in a lang.
Mizo mipuite hian mihring sawi loh tur sawi mai mai lo, patling principle nei, ni chu ni, nilo chu ni lo ti ngam, mahni thusawi tawh zuk leh hnihne lo hruaitu neih hi kan mamawhna a sang hle in ka hria. Mihring principle nei lo hi chu i thlang tling tawh lo hram ang u.
Sawrkar kal tawh zawng zawng zingah Congress khan ram tan, kuthnathawktute tan, mi rethei zawk te, eizawnna bul tan ngaite tan alo thawk tawh thin a. Thingtlang leh khawpui lamte Congress sawrkar leh theih nan i tang thar leh ang u. Mipuiin Congress Party hi beiseina nena a thlir reng avangin kan ram leh hnam tana rawngbawl leh thei turin Pathianin hun tha min pek leh ngei kan beisei tlat a ni. Hawh u, i dinthar leh teh ang u.
Friday Political Session hi Pu H. Zothangliana, Ex MLA chuan a kaihruai a. Pu Lalhmachhuana Kawlni, MPYCC Vice President chuan report a pe bawk.
Sd/-
(PETER VANLALROPUIA)
Media Department
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: