Home Minister hovin AIR Aizawl diamond jubilee hmang; "AIR Aizawl hi Mizo hnam nun vawng himtu pawimawh tak a ni," ~ K Sapdanga

Home Minister K Sapdanga’n All India Radio Aizawl chu Mizo tawng humhalh kawnga thawh hlawk ber zinga mi ani a ti a, tawng hman dik chungchangah thangtharte kaihruaitu pawimawh tak a nih thu a sawi.

Aizawl | July 31, 2026: All India Radio Diamond Jubilee lawmna hun Tuikhuahtlang AIR Complex-a buatsaih a hmanpui na ah he thu hi a sawi a, K Sapdanga chuan AIR Aizawl chu Mizo hnam zia leh ṭawng vawn him kawngah ṭangkai takin hna a thawk ṭhin a ti a, Mizo hnam nun vawng himtu pawimawh tak a ni a ti bawk.

Home Minister chuan khawvel hmasawn zelah All India Radio chu hnam zia humhalhtu pakhat niin tunkai khawvel changkanna nena inher remin mipui tan a la ding reng a ti a, tunlai khawvel midang inngaihsak tawnna a tlem zel laiin AIR Aizawl chu Lungngai leh khawhar hnemtu pawimawh tak an ni a ti a, programme an duan hrang hrangte chu hmun kilkhawr thlenga ngaihthlak anih avangin a tha zawnga mipui kaihruai thei tu pawimawh tak annih thu a sawi a ni.

K Sapdanga chuan tunhnaia All India Radio in kum 90 a tlin ruala AIR Aizawl in kum 60 na an lawm thei chu hun intawng fuh tak ani a ti a, Radio chu tun thlengin Mizo mipuite thinlungah hmun pawimawh ala chang reng tih sawiin thudik leh rintlak an hriat theihna, min awm tleitu leh thang thar tam tak chher chhuaktu a ni a ti a, tun thlengin ram pumah AIR Artist chu zaithiam ten an hlut a ti bawk.

Home Minister hian All India Radio kum 60 tlin lawmna puala lungphum hawngin Diamond Jubilee Souvenir a tlangzarh bawk a, Souvenir-a Article ziaktu pathum – Vanneihtluanga, Ramhluna Hnamte leh Rozama Chawngthu te lawmpuina thilpek a hlan bawk.

All India Radio Director leh Mizoram Cluster Head DR Lalropuia pawhin thusawiin All India Radio Aizawl bultan dan hrang hrang a tarlang a, Radio chu thuthar puanchhuahna ringawt nilovin Mizoram hmasawnna tura thawktu sawrkar leh mipuite thlunzawmtu ṭangkai tak ani a ti a, AIR Aizawl chu mipuiin thu thar an hriat theih nan leh an him tlan zawk theih nan rambuai hunlaia din ani a ti a, Mipui thinlungah a hlutna a la ngai reng tih sawiin tunlai khawvel hmasawn zel rualin All India Radio in hma a sawn theih nan thawktute theihtawp chhuah turin a chah a ni.

All India Radio Aizawl station hi July ni 31, 1966 khan din niin tunah hian thawktu mi 300 chuang an awm mek a ni.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]