DM&R Minister Prof Lalnilawma’n Disaster Management kaihhnawih Mizoram mamawh Sawrkar Laipuiah a thlen

Aizawl | July 27, 2026: New Delhi-a cham mek, Minister Prof Lalnilawma chuan vawiin khan Disaster Management chungchanga Mizoram mamawh hrang hrang project an lo thehluh tawh te bawhzuiin, hmalakna thar tur ruahmanna te sawrkar laipuiah a thlen.

African Swine Fever avanga Mizorama vawk vulhtute harsatna thlenin ASF chu State Disaster Relief Fund hnuaia Notified Disaster a puan ni se, State Disaster Management Authority chuan Notified Disaster a puan ni se tih lo pawmpui tawhin National Disaster Management Authority ah hian rawtna thehluh a lo ni tawh a. ASF avangin cheng vaibelchhe 485.37 zet farmer ten an chan nia chhutin, zangnadawmna sang zawk an dawn theih nan Disaster Management changtu Minister Prof Lalnilawma hian thuneitute vawiin hian a dawr a ni.

Proposal thehluh tawh Minister-in a umzui zingah hian Lawngtlai Bazar Veng leh Chandmary-a leimin vanga chhiatna thleng chungchangah tanpuina Central Special Assistance cheng vaibelchhe 21 dilna te; Aizawl, Lunglei, Serchhip, Champhai leh Siaha District tan National Earthquake Risk Mitigation Programme (NERMP) Phase-I ah cheng vaibelchhe 95.76 dilna te; National Landslide Risk Mitigation Programme (NLRMP) Phase-I hnuaia Ngaizel, Serchhip, Champhai leh Siaha a leimin chungchangah cheng vaibelchhe 50 Final Project Proposal Report te a tel a ni.

Post Disaster Needs Assessment (PDNA) Report 2021–2025 chu Home Affairs Ministry, Government of India hnenah vawiin khan DM&R Minister chuan a thehlut bawk a. He report-ah hian kum 2021–2025 chhunga Mizorama chhiatna chi hrang hrang thleng - Cyclone Remal, ruahsur nasa avanga tui lian leh leimin, mautam avanga sazu puangin buh leh bal nasa taka a tihchhiat te, leh African Swine Fever (ASF) avanga harsatna thlengten mi tam tak eizawnna a tihchhiat dan leh inkalpawhna kawngpui engemawzat siam that ngai a awm thu tarlan a ni a. Chhiatna thleng hi cheng vabelchhe 644.71 man hu vel nia chhut a ni a. Economic loss belhkhawm hi cheng vaibelchhe 645.49 vel niin, a pumpuia zangnadawmna leh siamthat hna thawh nan cheng vaibelchhe 873.22 mamawh a nih thu tarlan a ni.

Minister hi DM&R Secretary Sushil Singh, IAS, chuan a tawiawm a ni.