Aizawl | April 2, 2026: Minister of State, Sports & Youth Services Department Lalnghinglova Hmar chuan Vawiin chawhnu dar 3:00 khan Khelo India Tribal Games 2026 a Mizoram tana weightlifting a medal la mi pariatte chu MINECO-a a office chamber ah lawmpuina hun a hmanpui.
Sports Minister Lalnghinglova Hmar chuan, "Vawiin ang hi kan nghakhlel a, thil lawmawm tak a ni. Chutihrualin a pawimawh lai chu medal la tura kan thawhrimna leh kan tumna hi a ni a, Mizoram in tihmingtha hle a ni." a ti a. "Kan lawmna tizualtu chu tun tum KITG a medal kan hmuhna discipline pathum hi Empowering Mizoram Sports kan kalpui mek a sport discipline ngaih pawimawh tur kan thlan zing a mi vek kha a ni. Weightlifting kan che tha ber a, wrestling leh hockey ten an dawt a ni." tiin a sawi.
"Khelo India Tribal Games a medal lak hi chu a kalkawng a ni a, kan tum tur chu National Games a ni. A aia sang chu a hunah kan thlir zel anga, tunah chuan a chung leh ami zel kan ngaihtuahnaah kan dah ang." tiin infiammi hlawhtlingte a fuih bawk. Tun hlawhtlinna hian weightlifting-ah Mizoten a takin theihna kan nei tih a nemnghet ni a a hriat thu a sawi. Incentive Cash Award sem leh hunah an dawng thei dawn tih a sawi bawk.
Khelo India Tribal Games (KITG) 2026 hi March 25, 2026 atanga April 3, 2026 chhungin Chhattisgarh a Raipur, Jagdalpur leh Surguja ah te neih a ni a. Hetah hian India ram state hrang hrangte infiamna chi hrang pasarihah inelna neih niin Mizoram hian football, hockey, weightlifting, wrestling leh athletics-ahte infiammi 69 a tir a ni.
Minister Tetea Hmar chuan hmalam hun thlirin, "National Games lo awm tura medal lak theihna neite tan nutrition leh thildangahte inbuatsaihna tha zawk neih theihna turin hma lak mek a ni a. Tin, National Games hi kan thenawm state in thlen a tum a, India hmarchhak state ten game pakhat zel kan chan ve theih dawn avangin keini in weightlifting hi kan thleng dawn a, weightlifting ah nasa zawkin tan kan la dawn a ni." a ti.
Empowering Mizoram Sports kaltlangin weightlifting-ah talent tha haichhuah a nih theih thu sawi bawkin, "Khawtinin, VCP te, GSA te, YMA te pawhin tan la se, weightlifting hi EMS kaltlang hian lo thlang zel se kan duh. Khawtinah naupang chak kan hre duh a, naupang thui tak kal zel thei tur kan hre duh. Weightlifting hi national leh a chunglama medal lak theihna a ni.” tiin a sawi a. Mizo weightlifter te hlawhtlinna in a tihphur thu a sawi.
Vawiin lawmpuina hunah hian Mizoram weightlifting coach in report a pe a. Mizoram Weightlifting Association president Lallianthuama pawhin thu sawiin Sports & Youth Services Director H Lalhmingthanga chuan thu a sawi bawk.
Mizoram in KITG 2026-ah hian inelna dangah silver medal pahnih leh bronze medal hnih te la tawh bawkin tun dinhmunah a pumpuiah pasarihna an hauh mek.
Vawiin lawmpuina hunah hian Sports & Youth Services Department atangin Commissioner & Secretary V Lalsangliana, Director H Lalhmingthanga leh official pawimawh dangte an tel a, infiammite leh an coach-te pawh an tel a ni.
Weightlifting medalists at Khelo India Tribal Games 2026
1. Isac Malsawmtluanga (60kg, Men) - Gold
2. Silvan Beihrothathlo (71kg, Women) - Gold
3. Zosangzuali (86+ kg, Women) - Gold
4. David Zohmingmawia (110+ kg, Men) - Gold
5. David Lalzawmdika (100+ kg, Men) - Silver
6. Lalfakawma (79 kg, Men) - Silver
7. Laithanpuia (65 kg, Men) - Silver
8. Jacob Vanlaltluanga (79 kg, Men) - Bronze
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: