"mahni hnampui ngei nupui pasal neih hi hnam himna a ni - nu leh paten kan fate nupui pasal zawn kawngah kan fimkhur a ngai a, hnam rilru kan put a ngai,"

Aizawl | Feb 21, 2026: YMA Lengpui Model Branch chuan ni 20.02.2026(zirtawpni) zan dar 7:00 khan YMA Kumpuan Ruihhlo Do hawnna hun ang hmang a. He hun hi Central YMA General Secretary Prof Malsawmliana'n hmanpuiin Kumpuan hi a hawng a ni.

He hun hi YMA Lengpui Model Branch Vice President leh Kumpuan Committee Chairman ni bawk PL Zothanpuia chuan kaihruai a. Upa Lalrinngheta Sailo PCI Model Lengpui chuan hunserh a hmang a, Secretary Lalroenga'n Branch dinhmun report a pe bawk.

Kumpuan hawngtu Sawma chuan, mahni hnampui ngei nupui pasal neih hi hnam himna a ni a. Kan hnam hmakhua kan thlir a ngai. Mizo hi hnam tlemte, uihum zah lek kan ni. Hnam dang kan neih hian kan fate hnam dang an nih nghal zel avangin Mizo tlem tawh nakalaiin tlem leh zualna a ni a, nu leh paten kan fate nupui pasal zawn kawngah kan fimkhur a ngai a, hnam rilru kan put a ngai a ni a ti.

YMA hi kan khawtlang hmachhuan a ni a, YMA hi a chak loh a a lo chauh chuan kan Khawtlang nun a ti chau a khawtlangah sualna pawh a lo pung thin a ni. Ruihhlo do kawngah YMA hian hma la lo ta se tunge hma la ang? Chuvangin YMA hi kan tih chak a ngai a, YMA hruaitu pawhin kan mawhphurhna kan hriat chian a ngai lehzual. Kan hriat angin Ruihhloin kan ram a nawk nasat zia te, ruihhlo avanga mitthi mai ni lo, chhungkaw tam takin harsatna kan tawh thu te kan hre tawh a, chutiang te a nih avangin YMA lo pen chhuak lehin YMA hian ruihhlo do kum kan puang ta a, Indo kan puang dawn a ni. Chu indonaa tel tur chuan zanina nu leh pa lokal khawm te, YMA member chu sawi loh kan Khawtlang hruaitute lo tel vek turin ka sawm che u a. Chu indonaah chuan Ruihhlo lakah tlawm mai lo turin ka sawm che u a ni.

Ruihhlo la ti lo te venhim kawngah Kohhran huangchhunga inzirtirna leh Chhungkua atanga inzirtir a tul thu a sawi. Ruihhlo buaipuitute leh a ngawl vei te hi chhungkaw inrelbawlna tha lo in a nghawng a nih avangin Chhungkaw inrelbawlna kawnga theihtawp chhuah turin kalkhawm te a chah a. YMA Kumpuan Kaihhruaina in a phut angin Chhungkaw Zan siama inzirtirna hun hmang theuh turin a chah bawk. Ruihhlo do kawnga che chhuak ve thei lote pawhin ruihhlo do tute tawngtai pui thin turin a chah bawk.

He hunah hian Pu Lalrochuanga Pachuau CEC leh Central YMA Treasurer hlui chuan thu sawiin, “ ruihhlo ti thar an tlem tial tial tawh a, ruihhlo ti awmlohna khawtlang, ruihhlo tello chhuanthar din turin kalkhawmte a chah bawk.

Kumpuan hawnnaah hian khawtlang nu leh pa thahnem tak telin Tual Upa Lalrohlua chuan Ruihhlo Do nan Rs. 3000 YMA hnenah a hlan.Lengpui Model Branch YMA hi Nov., 15, 2011 khan Lengpui Branch YMA atanga in dangin 2012 ah hruaitu thar an thlang zui a ni. Tun dinhmunah member 672 awmin Life Member 7 an awm mek.

Pu Sawma hi CEC atangin Pu Lalrochuanga leh Pu Zoramthanga, Dr C. Lalengkima, Vaivakawn Branch YMA Asst. Secretary ten an tawiawm a ni.