Jan 8, 2026: Kawthoolei Army (KTLA) Army Chief Gen. Saw Nerdah Bo Mya - a chuan Jan 5,2026 ni khan Burma / Myanmar Union hnuai atangin khawvel hriatah Zalena famkim Independent a puang.
Ram thar a puan, Republic of Kawthoolei Government-ah hian, Gen.Saw Nerdah Bo Mya chu President a ni.
(Hemi chungchanga thuziak kan dah e. A ziaktu kan dawn tel loh vanga a ziaktu hming kan dah tel thei lo.)
KAREN IN INDEPENDENT PUANG
A hmain Union of Burma alo awm theihnan "Panglong Agreement" siam a nih dan te, chu inremna ber chu 1962 ah a bo tak dan te kim lo takin kan tarlang tawh a. Fiah taka ziah dawn chuan a sei viau dawn a, a tlangpui hriattiam awlsam turin kan tarlang tawh a ni.
6th January 2026 kan thlen meuh chuan, Karen (Myanmar ) chuan Independent a puang ta rup mai. An thei loang emaw an hlawhtling tak tak loang tih lam chu kan ngaihtuah tur a nilo a. An mahnin an cho a , an puang a , an mahni ngaihtuah tur ah dah ang.
1947 a Panglong Agreement ah khan an tel ve loa. A sira lo thlir tu (Observer) in an awm a. Union of Burma ah pawh khan inremna eng mah an ziak ve lo a, British sawrkar hnenah Independent ram nih an dil hial a ni. Kum 1947 Burma constitution siam a nih khan, Karen hi state pawh pek an nilo a. "Special Region" a dahin, nakin a state a hlankai tur a dah an ni .
Burma ramchhung, Union of Burma ah rin luh an ni a. Nimahsela, inenhranna, chi inthliarna ( Discrimination) kha an duh loh vangin 1949 ah khan an lungawi loh na an lantir tawh a. Chuta tanga a kum 77 natur , 2026 kum bul tanna ah Independent an puang ta a ni.
International Law , UNO , dan ( Law) atang in thlir hmasa ta ila. KAREN lam hian hmachhuan tur an nei tam lo hle a. A tir atanga Burma ramchhung( Burma sovereignty) nisa a ngaih theih an ni a. CHIN, SHAN,KACHIN te anga , inremna hmang a Union of Burma ni chawp anni lova. International Law leh UNO recognition hmu tur chuan a harsa viau thei a. Mahse, huaisen takin INDEPEDENT an puang a, ram leh hnam tana an huaisenna hi fakawm kati.
International Law leh UNO atanga hriatpuina an hmuhtheih dan kawng pakhat a awm ve a. Chu chu " Remedial Secession" a ni a. Hei hi a awmzia chu nekchepna leh tih duhdahna, tharum thawhna ( Violence) nasat lutuk vanga ram leh hnam himna atana Independent pek a ni. Loh theih loh na avanga Independent pek ti ila a dik ber awm e.
Karen ram hi Myanmar chhim chhak lam ( South east) lama awm a ni a. Thailand ramri dep a awm anni a. Ei bar zawn leh mamawh lak luh kawngah pawh thil harsa lutuk a nih hmel loa. Myanmar tan pawh dan chah thak chu a har hle ang. Karen ram hi 30,383 sq km vel a zau a ni a. Mihring hi an tam phian a. Khawvel hmun hrang hranga awm nen Maktaduai 9 ( kua) lai ni tura rin an ni a. Tun a Myanmar chhunga awm hi maktaduai 5 vel awm ni a rin anni. A dik chiah em tih erawh ka hre bik lo a ni.
Kan sawi tak ang khan, Dan leh khawvel thlirna atanga teh chuan an tana Independent puan hi theihloh tawp tur a ngaih a ni a. Tan chhan tur pawh annei bar lo a ni. Nimahsela, thil pawimawh tak ram leh hnam zalen duhna annei hi a ni.
Enge maw lai atang khan National Unity Government ( NUG) nen khan thawk dun in Myanmar sipai sawrkar an do a. "Federal Democracy Union " siam turin inremna pawh siam dun ni a hriat a ni.
Hetia, Independent an puan tak ah chuan, Chin hills zofate tan hian Myanmar sawrkar tlukchhiat chhoh lai hi en liam mai chi a ni bik a ngem aw tih pawh a ngaihtuah theih awm e. Myanmar sawrkar hi Russia leh China hian a thlavang an hauh hle niin sawi a ni thin a. Kan hriat ve lem loh pawn ralthuam tha hmang pawn anlo pui pawh a ni thei. Nimahsela, Myanmar sawrka chet dan rawva lutuk hi khawvel ram hrang hrang te hian an dem hle a. Heng Kachin, Shan, Karen, Chin te tawrhna hriaa thlawp tu hi ram tam tak an awm ve bawk a ni.
Engpawh nise, hnam chak zawk leh thil ti thei zawk nih vanga, hnam tlem zawk te dikna chanvo rahbeh sak leh an ram laksak hi thil dik lo tak a ni a. Hnam tlem zawk te pawh hian, dikna kan nei a, awpbeh kan nihna lak ata zalenna beisei hi kan phu tlat a ni tih kan hriatnawn theuh atan ka duh a ni.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: