Synod Inkhawmpui neih mekah pastor bial thar 7 hawn turin pawm

Aizawl | Dec 10, 2025: Synod Inkhawmpui vawi 102-na Zarkawt Kohhran Biak Ina neih mek chu vawiin December 10, 2025, chawhma dar 9:30-ah inkhawmpui tan a ni a. Palai lawmna, Synod pawn palai lawmna leh inkhawmpui chibai bukna neih a ni. He mi zawh hian Moderator tang lai Rev RC Lalnghakliana chuan Rev John Raldosanga hnenah Moderator mawhphurhna a hlan.

Nomination thu ngaihthlak a ni a, kum 2026 Synod Inkhawmpui programme leh puipa turte pawm a ni. Puipa turte chu

Moderator - Rev R Lalrinsanga, MSK

Secretary (Sr.) - Rev B Zohmangaiha, MTC

Secretary (Jr.) - Upa C Lalduhawma, Synod Office

Finance Officers - 1. Rev Dr K Lallawmzuala, 2. Rev Vanlalzuata

Statistician - Rev. Lalsangmuana, Bethlehem

Sr. Executive Secretary - Rev VL Luaia Hranleh

Executive Secretary - Rev Dr Rosiamliana Tochhawng

Kum 2026, 2027 leh 2028 inkhawmpui thlengtu tur chu inkhawmpui hmasa lamah tihfel a lo ni tawh a. (2026 - Chanmari Pastor Bialin Chanmari Kohhran Biak Inah, 2027 - Ramhlun North Pastor Bialin Ramhlun North Kohhran Biak Inah, 2028 - Republic Veng Pastor Bialin College Veng Kohhran Biak Inah). Kum 2029 Synod Inkhawmpui chu Electric Veng Pastor Bialin Electric Veng Kohhran Biak Inah an thleng ang.

Kum 2026-a Pastoral Ministry thupui atan 'Thlarau leh tih tak zeta Pathian biak' (Johana 4:24) pawm a ni a, Pro Pastor pawh mi 15 lak tura pawm a ni bawk.

Pastor Bial thar 7 hawn tura pawm a ni a. Chu'ngte chu Pastoral hnuaiah Salem Veng Bial, Falkland Bial, Champhai Zotlang Bial leh Dolchhora Bial, Synod Mission Board hnuaiah Koreng Bial, Ranchi Bial, Masihi Sangati Serchhip Pastor Bialte an ni. Hetih lai hian Presbytery hawn thar tur a awm lo.

Nepal Mission Field chhunga Tarahara Bial station chu Salakpurah sawn niin, bial hming pawh Salakpur Pastor Bial tia thlak a ni a. Odisha Mission Field chhunga Adava Pastor Bial thut hmun chu Duringuda-ah sawn a ni a, Duringuda Pastor Bial tia hming thlak a ni bawk. Bangalore North Mizo Presbyterian Kohhran chu bial thut hmun atan pawm a ni.

Minister, Pastor leh Pro. Pastor-te awmna tura Pastoral-in ruahmanna a siamte chu inkhawmpui hian a pawm a. Sipai Pastor-a lut an awm theih nan Synod-in a buaipuitu tur ruat tha tih a ni a, SEC hmalak turin dah a ni.

Dar 4:25-ah rorel zawh a ni a, Rev. Zawlthuama'n malsawmna sawiin rorel ni hmasa ber a tin.

Nimin (Dec.9, 2025) atang khan Synod Inkhawmpui vawi 102-na chu Zarkawt Kohhran Biak Inah neih tan a ni a. Inkhawmpui hian Dec. 14, 2025 (Pathianni) thleng a awh ang.

Chawhma dar 9:30 atang khan Nomination Committe an thu tan a, tlai dar 4:00 thleng a awh. Zan dar 6:30-ah Vantlang Pathian Biak Inkhawm neiin, hetah hian inlawmna leh Kohhran chanchin report ngaihthlak a ni.

Tun tumah hian general agenda 43 awmin, SEC/Boards atanga thu lut eng emaw zat a awm bawk. Synod Rorel hian December 13, 2025 (Inrinni) thleng a awh ang.

Kumin Synod Inkhawmpui Thlarau lam thupui chu 'Chhuan tur dik' (Gal. 6:14) a ni a, December 13 (Inrinni) zanah Rev. Dr. H. Vanlalruata, Chanmari-in thupui hi a sawi ang.

December 14, 2025 (Pathianni) chawhma chu Pastor nemngheh leh Pro. Pastor ruat inkhawm a ni ang a. Chawhnu chu Lalpa Zanriah Sakramen inkhawm a ni ang a, zan Inkhawmah Moderator valedictory sermon ngaihthlak a ni bawk ang.

Kumin 2025 Synod Inkhawmpuia Puipate chu heng te hi an ni :

Moderator: Rev John Raldosanga

Secretaries: Upa Vanlalsawma Siakeng (Sr.)

Rev B Zohmangaiha (Jr.)

Finance Officer: Rev Dr K Lallawmzuala

Rev Vanlalzuata

Statistician: Upa Dr Vanlalzara

Sr. Exe Secretary: Rev VL Luaia Hranleh

Executive Secretary: Rev Dr Rosiamliana Tochhawng

Synod Inkhawmpui hi kum 2010 atang khan Bial-in an thleng tan a, kumin 2025 hian Dawrpui Pastor Bialin Zarkawt Kohhran Biak Inah an thleng a ni.

Synod Rorel-te hi Mizoram Synod media - mizoramsynod.org, Synod Information Whatsapp channel leh Instagram lamah te puan zar thin a ni ang a. Vantlang Pathian biak inkhawm zawng hi Synod Information YouTube leh Hruaina Eng TV-ah te LIVE TELECAST a ni bawk ang.