EFCI kohhranin Missionary Convention hmang, Biak In thar hawn

Aizawl | Dec 8, 2025: Evangelical Free Church of India (EFCI) kohhran chuan December 7, 2025 khan kohhran pum huapin Missionary Convention an hmang.

EFCI Mizoram Region huamchhunga Aizawl Presbytery te chuan Zembawk Biak In, Tlang Veng, Aizawl-ah hmunkhatah hmang hovin an missionary chawmte an chah chhuak a, Speaker atan Rev. Hrangchunghnung, Secretary (Mission), EFCI General Headquarters, Shillong, hman a ni. Hemi hunah hian Ramthar Field-a Biak In sakna tur Financial Challenge nei telh nghalin, zaiah rawngbawlna EFCI Central Choir, EFCI Aizawl Presbytery Choir, Aizawl EFCI Choir (Ramhlun Venglai) leh Zembawk KȚP ten an nei a ni.

Aizawl pawn lamah chuan Missionary Convention hi Sakawrdai Presbytery ten Sunhluchhip; (Manipur State-ah) Saikawt Presbytery ten Rev. Chawnga Memorial Chapel, Sielmat, Vangai Presbytery ten Patpuihmun, Jiribam Presbytery ten B. Huonveng; (Tripura state-ah) Darchawi Presbytery ten Serhmun, Longtarai Presbytery ten Kanân; leh (Assam state-ah) Cachar Presbytery ten Loțhazawl Biak Inah te hmunkhatah an hmang ho a ni.

EFCI kohhran chuan tun dinhmunah Mission Field leh Presbytery 14 bâkah, India ram pawn rambung 7 ah missionary 167 châwmin ramthar rawngbawlna a kalpui mêk a ni.

Tin, hemi ni vek hian EFCI Aizawl Presbytery te chuan Zemabawk kohhran, Tlang Veng, ațangah indang mai tur Zembawk North Dinthar Veng Biak In thar hawnna leh hlanna EFCI President, Rev. Simon L. Darngawn in a nei bawk a, Biak In thar hawnnaah hian EFCI Central Choir ten zâiah rawngbawlna an nei a ni.