.jpg)
Aizawl | Nov 21, 2025: Supreme Court, Justice Vikram Nath leh Justice Sandeep Mehta te thutna Bench chuan Nov 17, 2025 khan thlawhna chuan man sang zel te, a tira pawisa pek ngai anga an tarlan ni lo a hnua pek ngai leh thin (hidden charges), hriatlawk loh a thlawhna chuan man sang thut thin te, bag ken theih rih zawng fair lo tak te leh thlawhna chuan man hmuh tlang theih loh lutuk chungchangah Central sorkar, Directorate General of Civil Aviation (DGCA) leh Airports Economic Regulatory Authority of India (AERA) hnenah insawifiahna pe turin a hriattir a. Supreme Court chuan thuneitute chu kar 4 chhunga chhanna pe turin a ti bawk.
He hriattirna hi social activist S Laxminarayanan in thlawhna chuan man bituk dan leh atira pawisa pek ngai anga an tarlan ni lo a hnua pek ngai leh thin (hidden charges) chungchanga kaihhruaina mumal zawk a awm theih nana Article 32 hnuaia Public Interest Litigation (PIL) a thehluh atanga lo chhuak a ni.
He dilna (petition) in a sawi langsar zual te chu: Thlawhna chuan man fel fai leh bituk thlap awm lo hian Article 21, Article19 leh Article 14 hnuaia India khua leh tui te dikna chanvo hrang hrang, intluk tlang taka awm theihna dikna chanvo (Right to equality), zalen taka chet vel theihna (Freedom of movement) leh zahawm taka nung tura dikna chanvo (Right to life with dignity) te a bawhchhia tih a ni.
Supreme Court-a Thubuai Thehluttute Thusawi:
Supreme Court-a he thubuai ngaihtuah a nih lai hian, thubuai thehluttu, social activist leh thlawhnaa zin kual nasa tak ni bawk S Laxminarayan tan hian Senior Advocate Ravindra Srivastava, Advocate Dr. Charu Mathur leh Advocate Abhinav Verma te an ding a ni.
Tun hma chuan thlawhnaa chuan chu mi hausa te tan chauh a ngaih a ni thin a; nimahsela, tunlai khawvelah chuan a tel lova kan awm theih loh a ni tawh a. Hmun hrang hranga damlo phurh nan te, hmanhmawh thilah te, rail leh motor pangngai kal theih loh thutna hmunah te a tangkai em em a ni, an ti a.
Nimahsela, thlawhna neitute chuan minute khat lek chhung pawhin mi tam takin an mamawh lai takin thlawhna chuan man an tidanglam duai duai thei thin a, hei hian hlawkna tam tak a tel tir thei thin a ni. Tun hnai maia thilthleng kan hmuh, terrorist-in mi a beihnaah te, khuarel chhiatna lo thlengah te, kut (festival) hun lai te khan thlawhna chuan man hi tih san vak niin, hei hian thlawhna neitute chu hlawkna a let hnih te, let thum tein a tel tir thin a ni, an ti bawk.
Tin, private airlines-in thlawhnaa bag ken theih rih zawng 25kg atanga 15kg a an tlak hniam atangin thlawhna neitu te chuan hlawkna tam zawk neiin, a hmaa an rawngbawlna (service) ni thin te chu pawisa siam nan an hmang ta vek a. Tun dinhmunah hian bag ken theih rih zawng aia tam an ken hian kg 1 zelah Rs. 600 te an la a, passenger-te chuan a changin Rs 6000 lai te thlawhna chuan man bakah an pek a ngai thin a ni, an ti.
Heng thil hrang hrang, thlawhna chuan man san lam bituk chin siam, bag ken theih chin kaihhruaina rual khai zawk siam, pawisa pek let theih hun mumal siam, airport-a thu thlen theihna mumal siam, thlawhna chhuah hun tih tlai emaw thulh(Cancel) chungchanga inpuih dan tha tak siam leh thlawhnaa chhiat tawh thuta passenger-te puihna chungchangah te hian, thubuai thehluttu hian Supreme Court chu ngenin, sorkar laipui (union government) leh DGCA te chu hun tiam nei a, inkaihhruaina siam tir tura ti turin a ngen a ni. (www.jclalnunsanga.in)
(A ziaktu Pu JC Lalnunsanga remtihnaa lakchhawn a ni a, dan leh court thuttlukna thar chungchanga chhiar belh duh tan https://www.jclalnunsanga.in ah hian tlawh theih reng a ni. ~ Explore Mizoram)
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: