"Nurse-te'n ramdanga hna an hmuh zung zung theih nan tawng zirna kawngah MYC nen tangkawpa hmalak tum a ni," ~ Health Minister

Thingdawl | Nov 19, 2025: School of Nursing, Thingdawl (SONT) chuan vawiin khan an school auditorium-ah 7th Capping & Lamp Lighting Ceremony leh Graduation Programme ropui takin an hmang a, Health Minister Lalrinpuii'n a hmanpui.

Health Minister Lalrinpuii chuan zirlai chhuak turte leh Capping ceremony hmangtu zirlai tharte hnenah lawmpuina leh duhsakna a hlan a. Zirlaite chu an hmaah tihtur tam tak an nei tih sawiin, Nurse hna chu hna zahawm leh ropui tak, midangte tana rawngbawlna hna pawimawh tak a ni, a ti.

Minister chuan sawi zelin, tunlai hunah hriselna kawngah hmasawnna tam tak a awm a, chungah chuan Nurse-te chu engkima engkim, hmun pawimawh tak changtu an ni a ti. Amaherawhchu, chu an pawimawhna chuan mawhphurhna lian tak a keng tel a ni tiin, inthlahdah lo turin a chah. Nursing profession tihchangtlun (upgrade) nan sawrkarin kawng hrang hrangin hma a la mek a, hna tam tak computerised a nih theih nan ngaihtuahna sen mek a ni, a ti bawk.

Lalrinpuii chuan Nurse-te'n ramdanga hna an hmuh zung zung theih nan tawng zirna kawngah Mizoram Youth Commission (MYC) nen tangkawpa hmalak tum a ni, a ti a. Zirlaite chu Mizoram pawn mai ni lo, foreign thlenga hnathawk ngam tur leh ruihhlo laka fihlim tlat turin a chah bawk.

He hunah hian School of Nursing Thingdawl (SONT) Principal Laltanpuii'n report a pe a. Vawiina Graduation hmang mek te hi Batch 6-na niin zirlai 17 an ni a, Capping Ceremony hmangtu zirlai thar mi 20 an awm bawk a ni.

Programme hman chhung hian zirlai ti tha te hnenah lawmpuina thilpek hlan a ni a, zirlaite atangin item hrang hrang hmuhnawm tak tak entir a ni bawk. Tutor Lalthlamuani'n lawmthu sawina a neih hnuin hun tihtawp a ni.