Hyderabad | November 23, 2025: Minister of State, Sports & Youth Services Department Lalnghinglova Hmar chu Hyderabad-a 'Telangana - North East Connect: A Techno-Cultural Festival' neihah sawm a nih anga telin, nimin khan Telangana leh North East state-te sports hmanga thlunzawm ngheh dan chungchang sawihona discussion panel-ah a tel a; Mizoram leh Telengana hian sports hmasawnna tura thawhhona thuthlung an ziak a ni.
Thawhhona thuthlung hi state pahnih sorkar official lamin an ziah hnuah nizan khan Telangana Governor Jishnu Dev Varma leh Pu Lalnghinglova Hmar-ten an inhlan tawn a ni.
Nimina 'Spirit of the Game: Connecting Telangana and the North East' topic hmanga discussion panel-ah hian Mizoram Sports Minister Pu Lalnghinglova Hmar chuan "Mizoram as a future sports powerhouse" tih thupui hmangin thu a sawi a. Mizoram chuan hma thlir neiin sports a kalpui chho mek tih sawiin, football leh discipline ṭhenkhata an hlawhtlin anga Olympic sports danga hlawhtlin dan kawng an dap mek tih a sawi.
Mizoram Sports Minister chuan Emerging Mizoram Sports (EMS) kalpui a nih dan tur sawi chhuakin state pum dâpa talent zawn chhuah hna an thawh dan turte leh sawiin chumi kawngah chuan Telengana nena infiammite intlawh tawn, coach inkal pawh tawn leh Telengana state-in sports hmunhma a neihte Mizoram infiammiten man chawi loa training-na atana an hman theih dan turte rawtna a thlen.
Sawihonaah hian India rama infiammi langsar, badminton tana sulsutu Telengana mi Pullela Gopichand, Olympic silver medalist Manipur lam mi Mirabai Chanu, Sikkim football superstar Bhaichung Bhutia leh midangte an tel.
November 21, 2025 khan Telangana leh Northeast team te'n Football-ah exhibition match an khel a, Lalnghinglova Hmar hian khuallian niin he hun hi a hmanpui.
'Telangana - NE Connect' hi Raj Bhavan, Telangana leh Telangana Sawrkar tangkawpin an buatsaih a ni a; Sports bakah field hrang hrang - Music, Women Empowerment, Fine Art, Performing Art, Literature leh Film Festival-te awmin Telangana leh Northeast state te inthlunzawm a thawhho dan tur ngaihtuah leh pholan a ni.
Telangana Governor Jishnu Dev Varma, Chief Minister A Revanth Reddy leh Minister te bakah North East state-a field hrang hranga mi challang tak takte telin programme hlawkthlak tak hman a ni.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: