Mizoram Gorkha Sanchalan Samiti, Bazar Branch ten PM hnena lehkha an thehluh hnukkir tura NGOCC ngenna-in rah tha a chhuah beisei

Aizawl | Nov 18, 2025: Chief Minister Lalduhoma kaihhruaiin vawiin khan Assam Rifle chhuahsan ram hman zui dan tur ngaihtuahtu Advisory Committee chu a tum 4 nan an thukhawm.

Chairman Lalduhoma chuan, he committee hi mipui huapzo committee a nih avangin kan thutluknate hi mipui huapzo thu tluknaah kan ngai a. Committee-ah chuan a tam zawk duh dana kal thin kan nih angin kan thurelte hi kan zavaia kutthlakna a ni, a ti.

Advisory Committee hian an thutkhawm hmasa lamah AR ram chhuahsana mimal leh pawl, pass neite chu an pass neihte sorkara hlan (surrender) tura ngen an rel a. Mimal leh pawl hnenah hian ngenna an siam zui a. An ngen angin mi thenkhat chuan an ram hi sorkarah an hlanlet tawh a ni. Assam Rifles Biak in hmun bik hi YMA Writ Petition chhunga mi nia sawi a nih tak avangin Advisory Committee hian Court thu hi vawiin thlengin an la ngaichang a ni.

Canteen kuala Hari Mandir humhalh leh hman zui theiha dah tura Mizoram Gorkha Sanchalan Samiti, Bazar Branch ten Prime Minister hnena lehkha an lo thehluh tawh chu hnukkir tura ngen turin Advisory Committee chuan an meeting hmasa lamah khan NGO Coordination Committee a ruat a. Vawiin meeting-ah hian NGO Coordination Committee chuan an hmalakna report hi an pe a. Rah tha a chhuah ngei an beisei thu an tarlang. Advisory Committee hian NGO Coordination Committee chungah hian lawmthu an sawi a ni.

Tun hnuah chuan AR ram chhuahsan hmunhma leh building hman dilna lam chi chu committee-ah chhawpchhuah tawh rih loh ni se an ti a. An thu lo tihtluk tawh anga hmasawnna hnathawh turte chu a remchan danin sorkarin lo thawk zui tawh se, an tih bakah a hmunhma tihhmasawnna hna (Execution of Site Plan) Nodal Department atan UD&PA chu an ruat a ni.

Committee hian Advisory Committee on AR Land kalphung mipuite hnena sawifiahna thuchhuah siam ni se, an ti bawk.