"Kan CM nen kan sawi dun a, . . politics-ah hian MHIP te hi kan hnuklut tur a ni lo, an inthlan dawnah pawh kan inrawlh tur a ni lo," ~ Lalrinpuii

Aizawl | Nov 20, 2025: Mizo Hmeichhe Insuihkhawm Pawl (MHIP) chuan vawiin khan Vanapa Hall-ah Special Assembly vawi 11na an hmang a, Social Welfare, Women & Child Development Department Minister Lalrinpuii'n a hmanpui.

He hunah hian Lalrinpuii chuan, "MHIP Gen Conf dawn reng rengin, Political party te an phe suau thin. Kan CM nen kan sawi dun a, Social Welfare Minister ka nihna angin, politics-ah hian MHIP te hi kan hnuklut tur a ni lo, an inthlan dawnah pawh kan inrawlh tur a ni lo, anni pawhin political party te hi tumah khatianga hnuklut lo turin i fuih ang, kan ti," a ti a.

Minister Lalrinpuii chuan Mizoram State Social Welfare Advisory Board din a nih atangin leh MHIP a lo pian atang khan hmeichhiate dinhmun chawikanna kawngah kan ramin hma a sawn nasa hle a ti a. October 17 khan Geneva-a Widows Rights International buatsaih seminar-ah guest speaker-ah tangin tun hmaa Mizo hmeichhia leh hmeithaite dinhmun chhiatzia leh tun hnua an dinhmun a that chhoh zel dante thawnthu angin a sawi thu a tarlang a. Tun hma anga ei rawngbawl leh inchhung sekrek khawih hi hmeichhe hna bika ngaihnate bo tial tialin tunah chuan bazara sumdawnna hrang hrangah leh sawrkar office hrang hrangahte hmeichhia an tam tawh em em a, mizo hmeichhiate hmasawnna hmun tina hmuh tur a awm ta hi thil lawmawm tak a nih thu a sawi.

Minister chuan mizo hmeichhiate chu an dinhmun a san chhoh zel rualin an mawhphurhna pawh a sang chho ve zel a ni a ti a. Ruihhlo laka kan tu leh fate an filhim theih nan leh kan hnam a than len zel theih nan hmeichhiate pawimawhzia sawiin, ‘Chhungkuaa letleh’ (back to the family) tih thupuia hmanga, fa puitling leh hmantlak chherchhuak turin, chhungkaw enkawl kawngah tan la thar theuh turin a fuih a. MHIP chu hmeichhe chanhai leh riangvaite tana innghahna tlak, rahbi tleute tana leirem an rah chho theihna tura puitu leh chhawmdawltu ni zel turin a chah a; an pawla politics la lut lova, MHIP chu pawl thianghlim leh mawi tak ni zel tura duhsakna hlanin, ngun taka ngaihtuahna senga rorel turin duhsakna a hlan a ni.

Vawiin hunah hian Prof. Irene Lalruatkimi, Gen. Secretary, MHIP hnen atangin ‘General Assembly, 2025 thurel bawhzui dan’ ngaihthlak a ni a. State Legal Services Authority atangin mipui vantlang tana hriat makmawh dan lam thil inzirtirna hun hman a ni a. Hun hnihnaah MHIP chuan rorel inkhawm an hmang chhunzawm nghal a ni.