"Thui tak kan lo zirchian sa tawh avangin research based in kan kal; Opposition-te atangin beihna kan tawk tam ta viau a, Sepui ruah tawrh tlawk tlawk theih a ni bik lo"

"Opposition-te atangin beihna kan tawk tam ta viau a, Sepui ruah tawrh tlawk tlawk theih a ni bik lo" - Dr Vanlalthlana

Aizawl | Sept 1, 2025: Vawiin khan ZPM chuan Party office-ah chhung inkhawm kan hmang a, thusawitu School Education Minister Dr Vanlalthlana chuan, “Opposition-te atangin beihna kan tawk tam ta viau a, Sepui ruah tawrh tlawk tlawk theih a ni bik lo. Mi tam takin ZPM-te research based-a kal lo leh kan insawi anga awm lovah min puh a, policy siamtute zingah ka tel ve hlauh avangin he sorkar hian research kan ti a, sorkar kum khatnaa flagship programme kalpui dang tunge awm? ZPM chuan kan kalpui ngam a, thui tak kan lo zirchian tawh vang a ni. Market chungchang hi a tlakhniam dan tur a hriat lawk theih loh a. Kum 2019 khan Sawhthing man chu Rs.100/Kg a ni, mahse kuminah chuan Rs.15/kg-tea hralh a ngai thung a, hre lawk vek thei khawpa research tih theih ni se chuan ZPM Research team leh Vai mithiamho hi an millionaire vek tawh ang. Harsatna tam tak karah ZPM chuan a flagship programme a umzui nghal a, a pen nghal pawp mai a ni. Policy Drafting Committee kan din a, chu chuan research based-in policy a duang a, kan zin a, kan zir a, mithiam kan kawm a, a hma thei ang bera hman theih turin ruahmanna kan siam a ni,” a ti.

Dr Vanlalthlana chuan, “Tluang takin August 27-28, 2025 khan Assembly Budget Session vawi 5-na kan nei thei a, a lawmawm khawp mai. Session-ah khan Bill 4 kan pass a, chungte chu – The Mizoram Prohibition of Beggary Bill 2025, The Mizoram Land Revenue Amendment Bill 2025, The Mizoram Local Bodies Ombudsman Bill 2025 leh The Mizoram Private Placement Agencies Regulation Amendment Bill 2025-te an ni,” a ti a. “Party pakhat MLA chuan uar takin session thlirletna a nei a, thu a sawi lai khan session-a mi thusawi a tihbuai ang khan tibuaitu nei ve se chuan a insawifiah ngun a ngai viauin ka ring. School Education Department hnuaiah departmental work 786 awm anga a sawi vawng em em kha Samagra Shiksha hnuaia guidelines awmsa bakah Cyclone Remal Relief Fund kaihhruaina awmsa vanga tih a ni. Dan dik taka kalpui a nih bakah fund min petu te duhdan anga tih a ni. Tawngkam thiam avanga sawichhuah tawp hi a fuh lova, a bak zir peih si lova sawi vawng duh chin chauh sawi thin hi tunlai thalaite hian an hrechiang telh telh dawn a ni. ‘Dawt phuahchawp ka sawi ve ngai lo’ a ti a, video kha kan ennawn chuan kum 2013-ah Forest Conservation Act kha an chai lo reng reng. A sawi sualah ngaidam ila, kum sawi sual hi a awl hle a ni. Engkim sawi dik vek anga insawi erawh a fuh chiah lo. ‘Kan sorkar leh chuan Bawngpa thlun phelh ang phat kan ni ang’ a tih fiam ang deuh khan, tutenge NLUP kha ‘term khat chhungin kan sem zo vek ang a, aia hma pawhin kan sem zo vek ang’ ti dur dur a, House rorelnaa pha leh dual si te kha? Kum khatnaah NLUP an sem em? Kum hnihnaah pawh an sem em?” a ti a.

Higher & Technical Education Minister chuan, “Mizoram University chungchang pawh a irawm chhuak ni lo tih hriat takin a sawi bah hle. Tuna chhim bial hmangaih thar thut an awm hi a lawmawm; Lungleia Mizoram Polytechnic court-a khin a nih laia ngawih chuh tlat leh, Mizoram Engineering College building sak chiah duhtawk ten Lunglei an hmangaih thar ta thut hi a lawmawm ka ti hle. Building sak hi a hlawk a, zirna buaipui erawh a hlawk lo a ni mahna, Siaha-a Polytechnic sak a nih khan eng angin nge hma an lak? Tun thlengin an la sa zo thei lo a nih hi. Mizoram State University leh MZU Southern Campus an sawi pawlh lui tlat pawh hi Politics-a mipuite fuihpawrh tumna a ni. Lungleiah ka zin hnai a, State University chungchang hi NGO te ka la sawipui ang,” a ti bawk.

Vawiin Party chhung inkhawm hi ZPM Secretary H Zorempuia'n a kaihruai a, PAC Member Upa R Lalchawia'n hunserh hmangin Party hruaitute leh party mipuite chhung inkhawmah hian an tel thahnem hle a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]