HBC Lady of the Year 2025 Hlui Ralsun

Govt Hrangbana College (HBC) Lady of the Year 2025 ~ Lalhminghlui Ralsun

EM: Hlui, chibai le, Kum 2025 Hrangbanna College Lady of the Year i ni hi kan lawmpui che a, Inkawmna hun tha tak min pek avangin kan lawm hle mai.

Hlui: Keipawh le,

EM: Zawhna ka zawt nghal bawrh bawrh mai dawn che nia aw.

Hlui: Awle

Name: Lalhminghlui Ralsun

DoB: December 24, 2005

Mother: Krosthangi

Father: Ralsunthang Hmar

Siblings: 4

Fav Colour: Red

View this post on Instagram

A post shared by hluiralsun🍓 (@_hlui__)

EM: A hmasa berin khawi khuaa piang leh seilian nge i nih?

Hlui: Phuaibung khuaah ka pianga, ka pa hi pastor a nih avangin hmun hrang hrangah rawngbawlna avangin kan awm kual a, chu mi khuaah chuan ka seilian tih hi han sawi bik fak tur pawh ka nei lo. Tunah tak phei hi chuan ka nu leh pa hi chu Shilong lamah an awm a, keini kan unauin kan zirna avangin Aizawl lamah kan awm a ni.

EM: Zirna lama i kal chho dan min hrilh leh la?

Hlui: Phuaibuangah Nursery - Class I hi Partnership Mission Society (PMS) School-ah ka zir a, Class II - IX thleng hi Sielmat Christian Higher Secondary School (SCHSS), Sielmat, Manipur-ah ka kal leh a, Class X hi Mizoram lamah ka zir leh a, Cl XI leh XII hi Mount Carmel School-ah ka zir zova, tunah hian Govt Hrangbana College-ah kalin BA 3rd Sem ka zir mek a ni.

EM: A nih leh lehkhathiam thei nge i nih a, thiam em em lova mah se pawl sawn ve ziah ang chi kha?

Hlui: Pathian zarah class khatah chuan a thiam lo pawl chu ka ni ngai lova, tun thleng hian class zir nawn ka la nei lo. Class XI leh XII-ah hian Science Subject ka la a, College lamah chuan Commerce ah kan insawn thung.

EM: HBC Week 2025 hman zawh takah khan lady of the year atana thlan i ni tih kan hria a, kha mi chungchang kha han sawi zau deuh teh.

Hlui: Kumin college week-ah hian Lady of the Year tur hian house tin atangin mi pahnih kan tel a, hei hi chu kum tina tih thin dan ang kha a ni a, kum dangah pawh tel tur hian min ti thin a, ka duh vak ngai lova, kumin chu min tih nasat em avangin hreh chung chungin mi dang pawhin an tih theih chuan tiin ka hnial ta lem lova, Pathian zarah Lady of the Year, title hial te ka chang thei a, ka lawm hle. Top-5 te chu ka thleng ve mai angem aw ti chunga tel ka nih avangin Lady of the Year nih ka inring lutuk lo bawk nen keimah pawh ka lawm khawp mai.

EM: A nih leh modeling lam hi i tui ve hrim hrim em?

Hlui: Ka tui lutuk han tih tur ang chi hi chu ka ni lovin ka hria; mahse, mite chuan hetiang lama kal tura min tihnate hi chu ka dawng ve thin. Tuna college week kan hman zawh taka lady of the year contest atana ka tel tur tih ka hriat hi chuan keimah pawh ka inla tui chawp ve a, ka theih ang angin ka inzir a, internet lamah te ka en bawk a ka ti ve nasa lutuk.

EM: A nih chuan Pastor fanu i ni si a, College Week pawh nise i chhungten an remti reng reng em?

Hlui: Aw, ka chhungte hi chuan min tuipui ve ang reng a, an hnen atang chuan engmah harsatna ka nei lova, min support tha hle a, an chungah pawh ka lawm hle. Tuna Lady title ka neihna chhan pawh hi ka chhungte leh ka thiante min tawngtaisakna vang liau liau niin ka hria a, an chungah pawh lawmthu ka sawi nghal a ni.

EM: Tunah hian lehkha ila zir a, lehkha i zir zawh lamah nasa zawka modelling lam luhchilh hi i tum em?

Hlui: Hetiang lam hi chu ka la inngaihtuah chin lutuk lo, nakinah kan hun tawn a zirte pawh a ni ang chu.

EM: Lady of the year chungchangah khan sawi belh duh ila nei em?

Hlui: Aw kei tehlul hetiang dinhmun Pathianin min hruaithleng hi ka phu lo hle a, Lady of the Year thlan lai vela min buaipuitu ka zirlai puite chungah ka lawm hle a, ka incheina tur engkim mai pawh min buaipui a, an ni vanga hetiang dinhmun thleng thei hi ka ni. Lady of the Year contest atan khan round li a awm a, kan incheina vawi thum kan thlak a, Mizo thuam kan duh ber kan thlang a, Zahau hnam incheina ka ha a, kawr fual kan hak leh keimahni duh danin kan inchei a, ka mamawh tinreng mai kha keima ngaihtuah buai lutuk ngai lovin kan senior leh ka zirlai puiten min ngaihtuah sak a, ka tan chuan ka engkima engkim an ni a, he title pawh hi a tan ka hlan a ni.

Tin, ka sawi tel duh bawk chu, zirlai kan la ni a, hetiang modelling lamah pawh tawnhriat kan la nei lova, khatia kan chunga mawhphurhna alo awm ta mai kha, mahni inrintawkna neih a ngai nasa em em a, keipawh ka phak ang tawka ka inrintawkna bakah Pathian hnena ka tawngtaina avangin ka hmaa tihtur awm ka hlen thei a, inrintawkna leh tawngtaina hi ka hmachhuan ber a ni.

EM: A ropui hle mai, Mizorama College lian berte zinga mi, zirlai tam tak zingah Lady of the Year i ni a, kan lawmpui che a, i kal zelna turah zirna kawngah pawh duhsakna kan hlan a che.

Hlui: Awle, keipawh ka lawm e.

(Explore Mizoram hminga kawmtu hi Journalism lama tawnhriat ngah Ramchhana Hmar a ni.)