Chhinga Veng Local Council & YMA-in an veng chhunga raltlan ko khawm; raltlante chhinchhiah vek

Aizawl | August 2, 2025: Chhinga Veng Local Council leh Chhinga Veng Branch YMA ṭangkawp chuan August Ni 1, 2025 zan khan vengchhunga raltlan an ko khawm a, Chhinga Veng chhunga ral tlan mi 140 an kalkhawm.

He inkhawmah hian Chhinga Veng Local Council Vice Chairman Samuel Zonunsanga'n a kaihruai a, Chhinga Veng Local Council Chairman Pu TBC Lalchawiliana chuan raltlante fuihna thu sawiin, vengchhungah thlamuang taka awm turin leh harsatna an tawk anih chuan theihtawp a puih an inhuam thu a sawi a. Raltlan zingah mi fel tak awm mahse, mi ṭhalo, ruihhlo tawlh ching an awm ṭhin chuan kan ram a tibuai ṭhin tih sawiin, he vengchhunga raltlante chuan ti ve lova, do pui zawk turin a chah a, ram leh khawtlang duhdan chu an awm chhunga zawm zel turin a fuih bawk.

Chhinga Veng YMA President C Laldinsanga pawhin thu sawiin ram buai avanga raltlan, an vengchhunga awm te chu inluah dan chungchangte vengchhunga awm sa te hnawtchhuak a a aia to a luah dil an awm thin chu ti ve lo tur te, voters id diklo taka nei lo tur te in a fuih a. Kan unaute ni mahse International boundary in a daidan, ram inrelbawlna hranga awm kan nih avangin, an ram awmna dan zam chu zawm zel turin a fuih a. raltlan zingah hriamhrei nen a zan a khawlai vak te, ram mi nen a inthurual a ruihhlo tawlhru ṭhin te an awm chu do a, hetianga ti an hmuh chuan, vengchhung hruaitute hnena report turin a ngen. Tunhnai ah hnam bil chi bil anga in tel hrang te, inkhawm hrang te an awm chu ṭhalo a tih thu sawiin, kohhran an bel anih pawhin heta kohhran awmsa bel ve mai turin a fuih bawk. Dan in a phalloh angin ram lei tum an awm a nih chuan, an sum an sen thlawn loh nan ti lo turin a ngen a, dawr hawn leh sumdawnna eng chi pawh lo kalpui ve chu ram danin a phal loh thu a sawi bawk.

Raltlan lo kal khawm 140 te hi chhungkaw Pa ber ṭheuh an ram (Burma) ID laksak niin, khawtlang hruaituten hei hi an kawl tha a, hemi hmang hian an vengchhunga raltlante chhinchhiah vek an ni a. Vengchhung an chhuahsan dawn a nih chauhin an ID hi pek kir leh an ni dawn a ni.