"revenue department dawr har tia mipui ten an lo sawi thin chu, 'kan fel tawh dawn', tiin kan intuai thar mek a, kan officer ten hetiang tawngkam an hmang hi a ropui hlein ka hria,"

Saitual | July 8, 2025: Vawiin khan Saitual District Land Revenue & Settlement Office thar chu Land Revenue & Settlement Minister B Lalchhanzova'n a hawng.

Thu sawiin minister chuan, “Revenue Department dawr har tia mipui ten an lo sawi thin chu, ‘Kan fel tawh dawn,” tiin kan intuai thar mek a, kan officer ten hetiang tawngkam an hmang hi a ropui hlein ka hria,” a ti.

Chhanzova chuan, "Sorkar hmasa hunlaiah khan SEDP atangin Saitual leh a chhehvelah Buannel Geo Solution ten survey an nei a, sum harsatna avang khan duh angin an tipuitling thei lova, khang an survey tawh te kha sem chhuak turin hma lak mek a ni. Periodic Patta neih kawnga harsatna nei te pawh a rang lama tihfel sak in ni tawh dawn a, Svamitva scheme (Thingtlang LSC) hnuaiah khaw 28 te drone hmanga an ram thla lak sak tawh an ni a, ram pass pawh a rang lama pek chhuah vek kan tum bawk. Minister ka nih tirh khan miten ‘a theih loh ang’ an tih chu Revenue Administration siamthat kha a ni. Thawktuten ‘i ngam lo ang’ min ti ṭhin; mahse, hun a lo kal a, pawn lam atanga mi sawi ang ngawt an lo ni lova, a chhungah chuan hnathawh tak tak duh hlir an lo awm khawm a. Hma kan han la chho va, an hahzia te ka hmuhpui a, dik lo taka nawr lui lo turin mipuite pawh ka ngen che u. Revenue Office pui ber pawh Aizawl DC hmunah a awm thei dawn a, Revenue Administration hmangin Decentralization kan kal pui dawn a, File pawh a tlem thei ang ber dawhkan kal tlang tir kan tum. Thingtlang atanga Revenue Director hmuh kher te ngai tawh lovin District tina Revenue Office te hnenah thuneihna pek a ni dawn. Revenue inrelbawlna tha nei lo state chu an hnufual zel. Mizoram hian Land record Nuai 3 chuang awrh kan nei a, kan thlang lawk Tripura state chuan Land record Nuai 14 chuang an nei. Chuta lang chiang ta chu ram teh duh pawh Revenue Department-in kan teh chak tawk lo tihna a ni. Department-a thawktuten ngaihtuahna an seng a, tunah chuan Empanelled Firm 13 kan nei tawh a, chung ho chu man neiin rawih theih an ni tawh. Hemi piahah hian Lisence surveyor nei turin hmalak leh mek a ni a, Surveyor zir chhuak tawh te khan Lisence an nei ang a, mimal pawhin rawih tawh mai tur a ni. Department dangte nena Convergence hmanga thawh hona tha kan neih a ngai a, Revenue Department leh LESDE Department pawh thawk ho turin hma kan la mek a, ITI zirtirtute leh zirlaite hnenah an syllabus-a Revenue Dept-in telh tura kan duh te kan thlen dawn. Tunah chuan Mizoram chhunga ram pass zawng zawng kan computarised tawh a, loan pukna atana pass dik lo hman mai mai leh pass dik lo lei te kha a theih tawh dawn loh a ni," a ti.

Revenue Minister chuan, "Kan hna theuh tih tak takna leh taima taka kan thawh hi Pathian rawngbawlna a ni a, hotute chawimawina kan hmu lo a ni maithei, mipuiten min hmuhpui lo a ni maithei; mahse, thil tha tih chu thup tak tak theih a ni lo, kan thil tha tih zawk khan mi te a hrilh hre zawk thin. Thingtlang atangin sum leh pai tamt tak sengin office min rawn dawr thin a, an mamawh ang lo tihsaka lo tanpui hi Pathian rawngbawlna a ni. Vawiina kan hnathawh hmangte hian nakinah Pathianin min la buk dawn a, kan nitin hna hi Pathian rawng kan bawlna a ni tih hre chunga hna kan thawh loh chuan kan ram hi a dam tak tak dawn lo,” a ti bawk.

He hun hi Saitual District Deputy Commissioner Dr Lalngura Tlau in a kaihruai a; Land Revenue & Settlement Dept. Secretary Vanlalmawia'n Keynote address a pe a. Land Revenue & Settlement Dept Director R Lalthazuala'n Technical report pein, District thar 3 zingah Saitual District chu Settlement Office puitling nei hmasa ber an nih thu a sawi.

Saitual Revenue Office-ah hian Settlement officer hovin Surveyor 3 leh thawktu dang 9 te nen an vaiin thawktu 11 an awm a; Saitual SO hian In hmun leh ram Pass 8,439 an issue tawh bawk a ni.