Phaizau atanga Mamit thleng dam lo zawn thleng!

Aizawl | July 9, 2025: Mamit khua atanga 10kms chuang (PMGSY roadah)a hlaa awm Phaizau khua atangin Mamitah damlo zawn chhuah a ni a, damlo hi Tawlai (mau tlawnah, mihring thutna tur puan an tawn beta, chu chu tawlai an ti) hmanga zawn a ni.

Mamit Times -in a tarlan danin, Phaizau atanga damlo zawn chhuah hi R Noliansanga (56) niin tukin zing dar 9 bawr vel khan Phaizau atanga chhuahpui a ni a, chhun dar 12 vel khan Mamit thlenpui a ni.

Mamit leh Phaizau inkar kawng hi PMGSY hnuaiah Ni 27.10.2018 atanga hna tanin cheng nuai 1033.52 senga sial tlang (formation cutting, Culvert, Retaining wall) niin kum 2020 kumtir lam khan MPWD hriatpuiin zawhfel a ni a, hemi hnu lamah hian kutthlak zui awm mumal loin thal laia lirthei tlan theih tura a khuar zual hnawh mam a ni deuh mai a, fur ruahtui tlak lai chuan lirthei a kal thei meuh lo a, tun dinhmunah pawh damlo phur tur pawhin lirthei a kal thei lo a ni.

Phaizau khua hi Mamit khaw chawmtu tui lakna, GMWSS hmunpui niin kawng pawimawh tak a ni a, Mamit nena inkalpawhna kawngpui a tlang loh vang hian Phaizau khua chauhin harsatna an tawk lo a, sawrkar department zingah - PHED, P&E ten an hnathawh kawngah harsatna an tawk fo a, chu chuan mipui nitin mamawh pek chhuah a nghawng thleng thin.

- Mamit Times

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]