PATHIAN HNENAH THIL NIHNA DIKTAK HRILH RAWH

_Tumruhna Danglam_

- Rick Warren

- July 28, 2025

 

“Tho la, zanah ven tan tirhan au chhuak rawh, i thinlung chu tui angin leih chhuak ang che Lalpa hmaan.” Tah Hla 2:19

Ni lungchhiatthlak tak mai i tawng tawh em? Joba chuan a hrethiam ang; a takin tuarna leh channa chungchangah PhD a zo a ni.

Joba hun hmasaah khan a neih zawng zawng a chan a. Engtin nge a chhan? “Tichuan, Joba chu a tho va, a puan a pawtthler a, a lu a ziat kawlh a, leiah a tlu a, Pathian a bia a.” Joba 1:20

Joba chuan a tuarna chu Pathian hnenah a thlen a ni. Tuarna i hmachhawnin i dinhmun diktak chu Pathian hnenah i thlen thin em? Chu chu i tih tur hmasa ber a ni.

A mak i ti maithei e, nimahsela Pathianin i thinurna leh i mangannate chu a chingfel thei a ni. I rilru na zawng zawngte pawh a thawi dam thei. Engvang nge? A chhan chu ama thlentir anih vang a ni. A anpuia siam i nih angin, Pathian pawh nangmah angin rilru a nei ve tho a ni.

 

I fa kum 2 mi lekin thinrimin i keah rawn pawt che sela, a chinfel dan i hria ang. Chutiang chiah chuan Pathian chu i ngaihtuah aia lian zawk a ni, i rilrua awm diktak chu hrilh mai rawh.

I hnaah kaisan i duh laiin i thei lo va, i hmangaih takin a chhuahsan che a, emaw cancer natnain emaw a tlakbuak che a, i rilru diktak chu Pathian hrilh rawh. Hetiang hian, “Lalpa ka buai takzet, ka mangang tawh. Ka chiai vek tawh,” tiin. Pathianin i zawhna te, i sawiselna te, i hlauhna te leh i lusunna thlengin a chingfel thei a ni. Pathian hmangaihna chu thil dang zawng zawng aiin a lian zawk a ni. 

Ka fate hian ka hmangaih a ni tih leh an aiin tawnhriat ka ngah zawk daih ani tih an hriat pawhin ka thutluknaah te zawhna an neih te pawh ka la hre reng. Chuti chung pawh chuan hrehawm taka an tuara an rilrua an pai reng ai chuan tlang takin ka titipui in ka sawipui thin a ni. 

Chutiang chiah chuan Pathian pawhin a ti! Nangmah kalsan daih che ai chuan i thinur chung pawha tawrhpui che leh beihpui che a thlang zawk a ni. 

I chungah lungngaihna a lo thlen pawhin, nangmah chauhin tuar mai suh. I tawrhna zawng zawng nen Pathian pan zawk ang che. “Tho la, zanah ven tan tirhan au chhuak rawh, i thinlung chu tui angin leih chhuak ang che Lalpa hmaan.” Tah Hla 2:19

Ngaihtuah zui atan

* Buaina i tawhin tunge i biak hmasak ber thin? Chu mi chu engvangin nge i rin? Pathian hnenah thlen hmasaber ta la engtiangin nge a danglam rin?

* I thinurna engtik lai khan nge i pai reng? Chu chuan i rilru leh taksaah engtiangin nge a nghawng?

* Pathian hnena i tawngtainaah tun aia tlang zawka i thlen ngam theihna turin engnge i tih ngai? 

*[Lettu: Sangpuia]*