MZP Sub Headquarters Haulawng-in zirlai titha chawimawina hlan

Aizawl | July 9, 2025: Vawiin ni 9 July, 2025 (Nilaini) chawhnu dar 1 khan MZP Sub Headquarters Haulawng buatsaih, Mizo zirlai titha chawimawina hun Hausiampa Hall Haulawng-ah neih a ni a. MZP Headquarters Lunglei Ex President Eric R Zomuanpuia chuan khuallian niin a hmanpui.

MZP Headquarters Haulawng chuan, HSLC leh HSSLC result 2025 Haulawng atanga First leh Distinction a pass mi 22 hnenah chawimawina thuziak an hlan a. Zirlaite fuihna hun an hmang bawk.

Khuallian Eric R Zomuanpuia chuan thu sawiin, kan ramin a mamawh ber chu mi thiam a ni. Mizo zirlaite hian mithiam ni turin tan i la ang u. Zirna hi kan ram leh hnam hmasawnna thlentu tur awmchhun a ni a. Uar lehzualin i tang ang u tiin zirlaite a fuih.

Khuallian chuan, lehkha thiam turin khaw tet leh retheihna hi chhuanlam a tling lova. A taima leh zir peih apiang an thleng sang thin a. An hlawhtling thin. Chuvangin, chhuanlam siam lovin i zir ngun ngut ang u a ti bawk.

Uaptu MZP General Headquarters Vice President C Lalremruata pawhin thu sawiin, Mizoramah Mayanmar atanga rawn raltlan zirlai tam tak an awm mek a. Heng kan unaute hian tawng inzir chawpin theihtawpin lehkha an zir a, result tha tak tak an nei a. Kumin HSLC ah phei chuan 9-na chu Myanmar atanga rawn raltlan a ni. Mizoram a Mizo zirlaite hian kan tum chuan sang takah kan awm thei a, tan thar nan i hmang ang u. Kan zirlai min tibuai thei hrang hrang lak atangin inveng fimkhur ila, thiam satliah ni lo, thiamna tak tak nei, chhawr tlak ni turin i inbuatsaih ang u a ti.

He hunah hian MZP General Headquarters Aizawl, MZP Headquarters Lunglei leh khaw chhung NGO hrang hrang leh zirlai thahnem tak an tel a ni.