mahni aiin Mizoram hi kan dah pawimawh hmasa tur a ni

"BJP Mizoram-in kan tum ber chu Mizoram development hi a ni a, chumi tur chuan 2028 inthlan-ah kan Sorkar a ngai,"

Aizawl | July 11, 2025: Mizoram BJP chuan vawiin khan Political Session hun hmangin, BJP National Secretary for Minority leh MDC ni bawk Morcha Delson Notlia -in inkhawm a kaihruai a, BJP Mizoram State President Dr K Beichhua MLA-in BJP-ah mi thar 228 a lawmlut a, Friday Political Session huna thusawi tur atana sawm bik MZU Professor Dr James LT Thanga, Advocate Er Lalhriatrenga Chhangte te'n thu an sawi.

Dr K Beichhua chuan thusawiin, "vawiinah hian Mizoram hmasawnna tur a tana thawhpui tur member thar mi 228 lai mai kan nei thei hi a lawmawm hle a, BJP ah chuan dawt a leng lova, vawiina kan lawmluh te hi an zavai hian an mahni duh thu ngeiin an lo lut a, chuvangin tuna hming ziah bak chu ziah loh tur a ni," a ti.

Beichhua chuan, "BJP Mizoram-in kan tum/kan Goal tur chu Mizoram Development hi a ni a, chu Development kan khawih theihna tur chuan 2028 MLA General Election ah kan Sorkar a ngai a ni. Chutiang tur chuan theihtawp chhuahin hma kan la dawn a ni. Chumi kan thlenna tur a kan hriattur pawimawh te chu, Pakhatna ah chuan Zofaten rilru zautak pu a kan inpumkhatna tur a nasa taka hma lak hi a ni. Pahnihna ah chuan Kan hnam ziarang humim a chawi kan hi a ni a, Pathumna ah chuan Kristianna humhalha Pathian ram zauh hi kan tih tur ani bawk a, Palina ah chuan mahni aiin Mizoram hi kan dah pawimawh hmasa tur a ni, chu chu kan Prime Minister Pu Modi-a Policy a ni bawk a ni. Tin, hei bakah hian Mizoram hian khawvel hmasawnna kawng kan zawh a, chumi zulzuia theihtawp chhuaha ke pen hi kan tih tur a ni," a ti a.

Dr K Beichhua chuan sawi chhunzawmin, "BJP Mizoram-in kan Goal pawimawh ber chu 'Developed Mizoram' hi a ni a, eng vanga Mizoram hi Develop tur nge? kan nih kan tih chuan, kan Develop loh vanga Develop tur kan ni, vawiinah hian eng dinhmun ah nge kan awm? kan tih chuan, State dangte'n min sawichhe mek a, kan State economy dinhmun kan thlir a, State dangte chuan khutah min en a, min en angin khutah kan awm bawk a, ei leh barah kan intodelh lova, Kan intodelh loh zia hi a hre tute kan ni a, kawng tin reng ah hian kan intodelh lo a ni. Chutih rual chuan kan rilru erawh chu chapo tak a ni thung lawi si a, hmanni khan NHIDCL-te nen Mizoram chakkhai lakluhna kawngpui kan en hova, khulai kawng ka hmuh a ka rilru a awm chu, khu kawng khu kan chaw kawng ang a ni a, kan mihring dinhmun nen a kan tehkhin chuan chaw kawng Cancer tawh chaw pawh lem hleithei tawh lo ang a ni tawh ani. Nimahsela cancer ni chung si a induh viau ringawt, chapo ve viau bawk si, nalh taka inchei ang dinhmun nen kan in ang chiahin kan ram hi ka hria a ni. Kawng kan zuk hmuh khan a lungchhiat thlak hle a, vawiinah hian kan ram hi chapo thei tur dinhmun ah kan ding lo a ni. Chuvangin keini BJP te chu kan Politics kalkawngah hian chapo taka kan awm loh angai a, Politics-ah reng reng a luang sang apiangin fintu annei lova, lui tui angin aluanna hniam apiangin fintu an ngah a, a fintu a lo tam khan lui lianah a lo chang thin a ni. Chuvangin keini pawh kan kal dan tur chu chutiang chu a ni tur a ni. Jerusalem kulh chim tawh pawh an tungding leh tih kan hria a, chutiang a nihna turin Jerusalem kulh kha a chhia tih an hria a, tundin leh angai tih an hria a, an kut kuangkuah ringawt sela Jerusalem kha tundin ngaihna a awm dawn lo a ni, ho u i tho ang u khai i din teh tak ang u ti a an kut tha an ti chak ang khan, vawiinah hian Mizoram mipui te u kan ram tungding leh tur hian kan kut tha kan tichak ve dawn lo'm ni?," a ti a.

Dr K Beichhua chuan, "Politics hi Football pet ang kan ni a, pet goal turin goal bulah kan lo awm fuh angai a, Mizoram mamawh pet chhuak turin Mizoram atanga pet chuan Goal a la hlat deuh avangin a har hle a, keini erawh Central-a sawrkar party niin, Goal bulah kan awm a, Goal Mouth-a lo pet goal a har dawn lo a ni. Chuvangin Mizoram mipui te u Mizoramin Development kan mamawh hrang hrangte kan hmuha kan neih theih nan i ṭang tlang ang u," a ti bawk.

Lawmluh te aṭanga thusawitu MNF National Council Member K Sanghluna chuan, "MNF chhungkaw ruhkawl atanga lo lut ka ni an vawiinah hian BJP a kan lo luh na chhan chu, Mizorama Development kan hmuh nan a ni a, Development tak tak a lo luh theih nan chuan BJP hi angai a, NDA partner a kan awm lai pawh khan tuizem a tui khawh lut zur zur luang liam zur zur kha kan hotute khan kan ni an ti a, chutiang a nih phei chuan BJP anga Sorkar na kan siam anih chuan nasa takin Development sum hi a lo luanglut ngei dawn tih achiang a, chuvangin Mizoram hmasawnna atana vawiin ah hian BJP a lo lut kan ni," a ti.

He hunah hian Dr James LT Thanga'n, Mizorama kan Assets ṭha leh Infrastructure ṭha tak tak te kan enkawl dan chungchang leh Sorkarin a heng kan Infrastructure tam takte aṭanga ṭha zawk leh hlawk zawka hmalakna a awm a ṭul zia a sawi.

Hriata Chhangte chuan, BJP awmzia leh nih dan chungchang te sawina neiin, "Mizoramah BJP kan hmuhdan diklo awm thin te chu thil nihna tak tak nilo a ni a, chuvangin BJP a Secularism nihna hi Positive Secularism anih avangin BJP ah chuan eng sakhua pawh kan leng vek a, Mizoram in kan hriat ang lo takin Pu Modi a te khuan Kristian te hi min haw lo a ni," a ti.