"CM level atan chuan a to lo va, car satliah a ni a, thikthu kan pe chhe mah mah, Mi ramah chuan mi satliah car ang a ni, hmeichhe khalh tawka ngaih, naupang football khel tur hruaina tawk a ni," - ZPM Spokesperson

Aizawl | July 29, 2025: ZPM Spokesperson K Laltluangkima chuan vawiin chhun khan Aizawl Press club-ah thuthar thehdarhtute kawmin, CM car man to tia sawi chungchang a sawi a, "CM level atan chuan a to lo va, car satliah a ni a, thikthu kan pe chhe mah mah, Mi ramah chuan mi satliah car ang a ni, hmeichhe khalh tawka ngaih, naupang football khel tur hruaina tawk a ni," a ti.

PRESS STATEMENT OF ZPM SPOKESPERSON K LALTLUANGKIMA

Dt 29.7.2025 (Tuesday) 1:30 PM @ Aizawl Press Club

Pu LALRINTLUANGA SAILO

A hmasa berin, Mizoram MLA lar tak leh Bial tana mi thahnemngai em em mai Pu Lalrintluanga Sailo chuan ni 21 July 2025 khan min lo kalsan ta a. ZPM party chuan uiawm kan ti em em a, a kalsan chhungte, MNF chhungkua leh thian thate zawng zawng Pathianin awmpui tlat se tih hi kan tawngtaipuina a ni.

SAWHTHING TAWIH

Mizoram Congress Spokesperson Dr Lallianchhunga chuan ni 24 July 2025 khan Sairanga sawhthing lei khawlsa dahna hmun a tlawh a, a rilru kap zawng te press mite hmaah an sawi nual a. Hetianga Congress pawhin lo neitute hmakhua an ngai ve ta hi lawmawm kan ti hle a. Sawhthing dah tawih a tih ho kha erawh chu sawhthing hralh tlak leh hralh tlak loh thliarna lama tha lo zual paih te an ni a. Thlai thar hi sawngbawl an ngai thin a, loneitute an a chhia leh a tha an dah pawlh chuan lo thenfai angai thin tih kan hriat vek kha. Eng pawh ni se, Congress unaute sawhthing ngaihvena an han pen chhuak ve ta hrim hrim hi a lawmawm a. An thusawi lar tak thin chu “In sawhthing hi ching rawh pawh kan ti lova, leisak che u pawh hi kan ba lo” tih kha a ni a. Vawiinah erawh chuan ZPM sawrkar-in thiam ang angin lo neitute tanghma ngai takin kan han buaipui ta nawk nawk a, party ropui tak tak sawhthing lo ngaihsak ngai lo te pawh kan kai harh ta niin a lang a, a lawmawm em em a ni.

Congress leh MNF unau te pawhin, “ZPM chu an road map-ah an kal lo” emaw, “ Sawhthing thar zawng zawng an lei lo” emaw tia min sawisel ngawt lovin an sorkar ve huna an tih dan tur tha te sawi zawk se, lo neitute tan chuan ngaihthlak a hahdam zawk ngei ang le. Kum 17 leh kum 20 an sorkar chhung khan heng party lian 2 te hian sawhthing tawih kan paih zat pawh hi an lei lo va. Chuvang min lo sawisel hmanhmawh lo u la, kan tih tihin kan han ti ang a, sawhthing-ah kher kher hi chuan ZPM hi chu lo sel lo teh u, kan veina hi a rei tawh em mai!

Sawhthing sawi takah chuan, sawi fo tawh angin kan duhthusam chu kan thleng lo nain, loneitute hlimzia kan hmuh hian, a zawng chhangthlak dawn hlein kan hria a. Mi pakhatin kum khat chhunga nuai 2, 3, 5, 8 te nuaih 10 han la lut te hi chuan, NLUP leh SEDP kum 5 chhunga sing 2 emaw nuaih 1 emaw hmu te hi chu an awh loh hmel khawp mai.

Party dang hian khawlaiah pawisa a vang an ti mawlh a, a dik ang, zu, drugs, kuhva leh dan lova lo lut te nasa taka tih tawm a nih vangin miin sum chuang bang an nei tawh lo va. Sorkar hnathawk contract atanga percentage hauh thin tam takin an hauh thei tawh lova, A thlawna sem a awm tawh loh avang leh, miin an thawh hlawh chiah chiah chauh an lakluh tawh avangin sum kan renchem thiam tan a, lo thlawn taka sum tual leng kha a lo vang a nih pawhin, hma kan sawnna lam a ni tih hriaiin, thawhrim leh dik taka sum lakluh lam i zir zel zawk teh ang u khai.

SUM CHHEPRELH?

Ni 25 July 2025 Zalen chanchinbu chhuakah chuan “MNF in Fisheries Dept pawisa nuaih 100 awmna sorkar an zawt,” tih a lang kuau mai a. Chuta a inziah dan chuan “MNF chuan April 2025 a sanction tawh nuai sangkhat hi Mizoram sorkar hian eng atan nge a hman, a chheprelh nge, hman dan tur an la zir chiang mek zawk? tia zawtin , bakah a rang thei ang bera thudik puang zar turin an phut a. Sum chu central sorkarin a hmanna tura a min pek ang ngei a hmang a, tibothlau zawnga khawsa lo turin a chah,” tiin a inziak bawk a ni.

Kan sawi nawn leh ang e, MNF unau ten ZPM sorkar hi sum chhep relh lo tur te, tibothlau lo tur te, a hmanna dik taka hmang tur tein min chah a nih chu!

Chheprelh tih te, tibothlau tih te, a lan nual avang hian MNF unau te hian thil hi an hre thei si a; sum hi chheprelh a nih theih dan te, a bo thlau theih dan kawng hrang hrang te an thiam nal tawh si a, an hlauh thawn hi a lo dik tak tak mai ang a, tiin hlau thawng chung chungin ka umzui a. A tawpah chuan engmah hlauthawn tur a lo awm lova. Engkim a fel fai a ni tih sorkar lamin min hrilh ta a, Kan Minister zahawm tak Pu Chatea pawh kan hmu khaw lo hman tep alawm le..Thil awmzia chu hetiang hi a ni.

A amount hi nuaih 100 ni lovin nuaih 1000 lai a ni a. An sawi ang hian 25.4.2025 ah sanction hmuh a ni a. Tichuan budget allocation dil thuai a ni a. 27.5. 2025 khan Expenditure sanction dil leh mek a ni a. Reserve Bank of India in him takin tunah hian an kawl mek a, a hun taka sanction order tichhuah mai tur a nih chu. A lo chhuah hun atan tiin beneficiary pawh thlan fel tawh a ni a, an account-ah thunsak zung zung tur a ni ang. Tu mahin lo hlauthawng lo se kan hotute hian an chheprelh dawn lo, thiam pawh an thiam lo, duh pawh an duh lo a, tum pawh an tum eih lo tih kan puang duh a ni e.

Tin a, hmanna tur dik taka hmang tura fuihna te MNF ka atang ngeia kan han dawng hi a mak a, a ropui a; huatthlala lo va, hmasawnna a ni a; a lawmawm em em a ni. Hetianga sum chhep relh kan han sawi hi chuan lam tawi hrang hrang hi ka hre chhuak thin a, Buffacos, Pahoss tih ang reng te; bakah ka kut ngeiin nuaih 100 ka ziak bova Pu Lalrinliana Sailo thusawi ang te kha kan hre chhuak uaih uaih zawk thin.

CM CAR MAN TO

Kan CM hian inthlan hma khan, “ZPM Chief Minister chu car man to ah a thu dawn lo” a ti a nih kha. Hei ZPM chuan CM chu kan han nei ta a. CM hlui car chu an chhawm ve ta a. He a car chhawm hi kum 15 vela upa tawh repair reng ngai kha anih tak avangin CM chu car thar Toyota leisak a ni ta a. Hetiang car hi a amn nuaih 20 vel atanga intanin chi hrang hrang a awm a, a to pawl chu nuaih 32 vel a ni a. Hei hi tun laiah chuan state khat CM chuanna atan chuan car pangngai mai a ni a. Mi ramah chuan mi satliah car ang a ni, hmeichhe khalh tawka ngaih, naupang football khel tur hruaina tawk a ni.

Hmanni khan video pakhat ka hmu fuh a. Ralleng ram CM chu leimin a en turin a kal a. Police car tam tawkin an veng a. Official car kha ka lo chhiar a, car 31 ka chhiar thei a. Chung 31 zinga 11 chu tuna kan CM car ang hi a ni a. Kan CM car hi a to kan ti a nih chuan ‘to’ chu a ni mai ang a, eng car pawh lei se tu emaw tan chuan to chu a ni mai zel ang a; CM level atan chuan a to lo va, car satliah a ni a, kan thikthu kan pe chhe mah mah a, Ralleng CM hnungzuitu 11 te khan kan CM hman ang hi an hmang a ni.

Mizoram hi international ram depa awm kan nih avangin kan CM hian Z+ category security a nei a. Kan CM in campaign laia “Car man tovah a chuang lovang” a tih hun lai nen khan thil a danglam nasa tawh hle a. Kawl ramah pawh Kawlho chang an do lova, Zo hnahthlak leh Zo hnahthlak te pawh an indo tawh a ni a, chutiang khawp chuan kan ram dep ho hi a ralti a; chutih lai kara car man tlawm ber mai kan ram lal ber tana lo la hisappui tlat hi chu thil intu lo tak a ni tawh. India sorkar in CM tana a pek theih security chu Z+ a ni a, PSO 3, Pilot personnel mi 15, Escord personnel mi 19 hmang reng thei a ni a. Chu chu amah hi chuan a hautak a tih avangin a duh lo zawk a. A tul a tih chuan bullet proof car pawh hmang thei a ni a. Chutih lai karah hetiang car satliah a a inhnukhniam thei hi chu fak mawlh mawlh tur zawk a ni dawn lawm ni?

India ram CM hi an inang lo khawp a, CM thenkhat nuaih 300 man car hmang an an awm laiin a then chuan Maruti Alto te an hmang ve mai mai bawk a, phai ram kawng tha tak neihna te a nih avangin a inawm tho ve bawk a. Kan ram kawng te hi kum 37 chhung khan lo ti tha pur tawh ni ila chu kan CM pawh hian car satliah tak tak te pawh a hmang ve mai mai thei tur a ni a. Mahse kan tun dinhmun hian a zir mawlh lo va, car man tlawm uchuak chu kawng chhiat nen, a chhuk chho nen, a ralmuang lo thut thei kan ni reng nen car man tlawm lutuk chu a him mawlh lo a ni. Tuna a car hman mek hi a awm tawk ren rawn viau va, hei aia to leh tha pawh hi hmang ni se, kan Mizoram dinhmun mek nen hian a la inawm tawk viau tho ang.

MUHCS

MUHCS chungchang hi tlem han sawi ve ila. Ka rawn sawi duh lai chu Zonet buatsaih mi hrang hrangin MUHCS THLIRNA DANG tih program a an hmuh dan an sawinaah khan Dr. K.Beichhua MLA zahawm tak khan he “MUHCS laimu atan ABPMJAY rinchhanin he Health Care hi siam a ni tih tunah chuan kan chiang tawh a,” a ti a. Heta a laimu a tih hian a kawh nia lang chu, ABPMJAY hi rinrawl leh a main bera hmangin MUHCS hi an din a ni, a ti niin a ngaih theih a. Chu chu a nih loh dan kan sawi dawn a ni.

He MUHCS kan buaipui mek leh sawhthing hian a tlangpuithuin inanna tak an nei a. Sawhthing pawh hi a hralh tur nei lo ho hi a sawiseltute an ni a. Sawhthing hralhtute chu an lawm em em a, an mittui a tla a. MUHCS pawh hi a hmang tawh tute chu an lawm em em a, la hmang ve lo te hi sawiseltute an ni tlangpui bawk a. Hei hian a sawi fiah em em chu ZPM sorkar ral khat atanga do mai lovin an mahniah hian rinna nghah ngam a va pawimawhin a va manhla si em tih hi a ni.

MUHCS hi Dr. Beichhua hriat dan ang lo takin ABPMJAY laimu emaw a kungpui ber emaw ni lova, a zar peng tiin sawi ta zawk ila a dik awm e.

Pakhatnaah chuan- ABPMJAY ai chuan MUHCS hian a huam zau zawk em em a. MUHCS hi chuan Mizoram khua leh tui dik tak zawng zawng min huam vek a ni. ABPMJAY hi chuan 2011 kum mila mirethei an thlan te a huam a, chu bakah RSBY 2018 leh NFSA (ration card eng leh pawl neite) chhungkuate a huam bawk. An vaiin chhungkua 219000 an ni a. A bak inziah luh theih a ni tawh lo. Hemi chin a awm te chauh hi a huam a ni. Mi dang la tel ve lo tan tel ngaihna a awm lova state sorkar in tih theih a nei lo, healthcare lo nei lo tan kawng a bo va, tih ngaihna awm lova, ABPMJAY chu a zim tihna a nih chu.

A pahnihnaah chuan ABPMJAY inziak lut, Golden card neitute chuan private empanelled firm khatih lai khan Aizawlah chuan Damdawi In 2 chauh an nei a, chutah chauh chuan an inentir thei a ni; 1 chu mit lam enna a ni leh nghal a. Chuvang chuan a zim hle a. Tuna MUHCS hnuaiah hi chuan Damdawi in tam tak network hnuaiah an rawn inziak lut tawh a, an lo lut zel ang a, a la pung zel dawn bawk a ni. A zau zawk em em a, a kungpui zawk, a laimu zawk chu MUHCS hi a ni.

MUHCS hi a that zawk em em na chhan chu Golden card neitute tan a thlawna inentir theihna leh in admit theihna Hospital a tlem avangin a hranin sum tam tak sengin Health insurance dang an la tel bawk thin a. Mahse tunah chuan Golden card neitu ABPMJAY hnuaia mite kha a thlawn vekin MUHCS hnuaiah pawm nghal an ni a, insurance dangah inziah luh a ngai tawh lo, a hahdam thlak a, a lo thlawna sum an lo senna a umbo ta a ni.

Dr. Beichhua khan insurance laimu ber atan an hmang a tihna chhan niawm lang pakhat leh chu Central atang premium dawn zat hi a ni a. ABPMJAY hnuaiah khan chhungkaw pakhat tan kum khatah Rs 1052 central sorkarin a rawn pe thin a. Hei hi a nihna takah chuan a bei tham em em a, damlo ten an chawi belh fo thin. Chuvang chuan hei hi rinrawl leh innghahna chhan bera hman tham a ni lo a ni.

Hetia ZPM sorkar kum 1 leh a chanve chauh vin MUHCS bul a tan thei hi hlawhtlinna nasa tak a ni a. Private Hospital hovin an rawn zawm zel turah ngai ila, a lehlamah chuan an rawn zawm zung zung lo tak te pawh hi Pathian remruat zawk ni tlata hriatna ka nei a. A chhan chu sorkar damdawi in ho hian nasa takin hma a sawn phah a, hei hi sorkar hmasa ho zawng zawng tih theih loh a ni a, kan Minister leh a Dept te hi an thawk tha em em a ni.

Rei lo te chhungin thawktu sang leh thawktu hniam deuh mi 450 lak belh a ni a. ZMC&H-ah Cabin khum 30 dah belh a ni a Medicine ward-ah khum 26 dah belh a ni a Gynea ward-ah khum 10 dah belh ICU-ah khum 13 dah belh a ni a. Lunglei leh Siaha Civil Hospitalah te ICU khum 5 ve ve dah belh a ni bawk a. Sorkar hmasa in Lungleiah RTPCR khawl an bun lo kumkhua a, ZPM chuan hmanni lawk khan Aizawl Civil Hospital ah MRI khawl an han bun leh rup mai a. Chutiang chu a nia kan chet vel dan hi. He MUHCS hian nasa takin hma min tisawn a ni.

He MUHCS chung changa ka mimal ngaihdan tlem ka sawi ve duh a.

Khawvelah hian ram hausa tam takin Healthcare system tha tak tak an nei hlawm a. Engkim free vek ang chi te hi a a ni hlawm a. Amaherawhchu heng ram hausa ho hian mimalin tax an pe nasa tih hriat a ngai a. Mi tam tak hian an sum lakluh zawng zawng zat ve lawih te tax sorkarah an pe thin a. Chuti taka ram an hmangaih avang chuan sorkar pawhin an tan nasa takin a pe let ve thin a ni. Keini chu chhiah tlemte a tihsan pawhin kan vui luai luai a, bufai pawh a lo thlenna man ang pawhin kan ka khul pha lo lova, Minister kan rel phar lo chauh va. Mahni tanghma hi kan va ngai tang tang hlawm tak em! Thil hi engkim hi a thlawna dawn kan tum a. Thil hi a thlawna kan dawn chuan Tu emaw hian a man a pe a, an hek hlak tih hriat a tha khawp mai. Kan chhandamna ngei pawh hi a thlawn a ni a, Lal Isuan a man a pe a lawm. Khawvelah engmah hi a thlawn a awm lova, kan pe ang a, kan dawng bawk ang. Moral reform kan ngaihna lai chu sorkar chunga kanthil phal ve na lam hi a ni ang.

Tichuan sorkar in health insurance engkim a thlawna an tihsakna ram a awm a. Chutiang ni lo, ram hausa tho insurance company ten ram mipui tana healthcare an tihsak ram a awm leh a. Chung chu USA te khu an ni a. Chung ramah chuan Health care nei tur chuan Insurance company -ah lak a ngai a. Kan lak hmain kan hriselna an check vek a, natna benvawn kan neihsa phei chuan lak pawh min la duh lo thei a, min lak pawhin premium man sang tak chawi a ngai a, thla tin chawi char char a ngai a. Mei zu, zu in, sahdah hmuam ten premium an chawi tam a. Eizawnna lamah driver te lung la te inti na mai thei hovin an chawi sang leh bawk a. Chutiang chuan mimal mal hian a coverage inangah pawh kan chawi zat a dang thluah thei. Tin kum thuaah pawh kum 60 chuang te hi chu an la duh tawh lo tlang puia , an lak pawhin a premium a sang thin.

He MUHCS ah hi chuan chutiang reng reng chu a awm lova, natna ben vawn nei sa pawh ni se, kum 60 chung lam pawh ni se, Rs 2500 in chhungkuain kum khat chhung a tuam hlawm thei a, a man a tlawm em em a ni. Tam takin a premium man tur nei lo ang te in an insawi a, ni tin kuhva Rs 100 man an ei thei thova. Thla khat chhhung lek pawh kuhva nghei se, chhungkua in health insurance an nei thei mai si a. Chhungkua ah mi 5 awm se, mi pakhat chawi chu Rs 500 a ni a, mi pakhatain ni khata a chawi zat chu Rs 1.36 paise chauh a ni a, a to lo, a tlawm em em a ni. Kan rilru hi kan siam dik a ngai mai zawk a ni! He MUHCS hi chu a tha lutuka a, a awihawm lo zawk a, inbumna a ang thei hial lek lek zawk a ni. Sap in Too Good To Be True an tih ang hi a ni zawk.