Asia Pacific Baptist Youth (APBY) chairman atan Jacob Vanlaltana Khiangte

Aizawl | July 11, 2025: Asia Pacific Baptist Youth (APBY) chairman thar atan Upa Jacob Vanlaltana Khiangte s/o Lalthazuala Khiangte (L) Sethlun, Lunglei (tuna BCM Vengthar, Kolasib a lawi mek) chu thlan a ni a. Mizoram Thalai Kristian Pawl (MTKP) atang mai bakah Mizo zinga he dinhmun luah thei hmasa ber a ni.

Brisbane Australia-a Baptist World Alliance (BWA) Congress neih mekah July 11, 2025 Zirtawpni khan Asia Pacific Baptist Federation (APBF) leh Asia Pacific Baptist Youth (APBY) term thar hruaitu thar turte puanzarna leh hlanna hun hman a ni a. APBF Chairman thar hi AK Lama (India) a ni a. Asia Pacific Baptist Youth (APBY) chairman thar pawh hemi rual hian puan a ni.

Upa Jacob Vanlalţana Khiangte hi tunah hian Asia Pacific Baptist Youth (APBY) ah hian Vice President ni lai mek a ni a. APBY Chairman a nihna avang hian APBF-ah Executive Committee member a ni nghal dawn a ni. A term hi APBF Congress 2027 thleng a ni ang.

BWA leh APBF te hian tunhmaa President tia an koh thin hi kumin atangin 'Chairman' tiin a hming an thlak a, he term hi an hmang ţan ta a ni.

BWA Congress hi tunkar chhung neih tur a ni a. Baptist Church of Mizoram (BCM) atangin President Rev Dr C Vanlaldika leh General Secretary Rev Dr H Lalthlamuana bakah kohhran member 4 te he hun hmang tur hian an kal a ni.