Agriculture Minister-in Basic Food Processing Course 74th Batch kharna hun hmanpui

Seling | July 11, 2025: Vawiin khan Agriculture Minister PC Vanlalruata chuan Mizoram Food Processing Research and Training Centre (MFPRTC) Incubation Centre, Phaibawk, Selingah 'Basic Food Processing Course for Tuikum Constituency 74th Batch' te tana training course kharna hun a hmanpui.

He training hi Mizoram Food Processing Research Training Centre in an huaihawt a. Pickle siam, Juice siam, Jam siam, Powder siam, Powder siam, Chips siam, Vawnṭhat dan leh Food safety chungchang zirtir an ni a. Thentlang, Chhingchhip, Chhiahtlang, Baktawng, Hmunṭha khua aṭangin mi 20 (hmeichhia) training ah hian an tel.

He training kharna inkhawm hi bialtu MLA leh Minister PC Vanlalruata chuan, "Helai training-na hmun tha tak mai kan nei hi a lawmawm hle mai, Food Processing lamah kan ṭhang harh mek zel a. Kan thiam loh leh kan la hriat ngai loh te kan zir chhuah hian kawng hrang hrangah min tanpui a, training kan paltlang hian hlawkna engemaw tal kan zir chuak ṭhin. Chuvang chuan training chi hrang hrang kan uar zel a pawimawh. Training kan hmachhawn hian kan thiamna zir chhuahte midang tana malsawmna leh, ram leh hnam tana kan ṭangkai theih nan hmanruaah kan hman a pawimawh a, tichuan kan talent kan tipung tihna a ni a, helam hi kan uar chhoh zel pawh a ngai a ni. Ei leh in kan sawngbawl danah kan fing chho zel a, ei tur thianghlim taka sawngbawl dan leh dah ṭhaṭ dan kan thiam chho zel a, hetiang lama kan rilru leh ngaituahna te kan sen chhoh zel hi ka duh a ni. Mihring hian engemaw thiam bikna 'skill' kan neih loh a, kan talent dawn kan tih pun loh chuan kan nih tur ang kan ni phak lo ṭhin a, kan hlu tawk thei lo ṭhin. Ropui taka bul ṭan kher a ngai lo, kan bulṭanna chu eng pawh ni se la, teirei peih leh thawhrimna a pawimawh a ni," a ti.

He training hi Agriculture Minister PC Vanlalruata ruahmannain a bial Tuikum constituency chhunga khaw hrang hrangte tan July ni 8 - 11, 2025 chhungin neih a ni.