Kum 93 mi niin TKP dintu zinga mi boral

Aizawl | June 23, 2025: Mizoram Baptist Kohhran (BCM) hnuaia thalai pawl, Thalai Kristian Pawl (TKP) dintute zinga mi Laltanpuii (93) m/o Vanlalruata Sailo chu vawiin chhun dar 1 khan Stroke vangin a thi.

Laltanpuii hi naktuk chhun dar 12 hian vuiliam a ni ang. YMA Zemabawk North Branch huam chhung, Section 1, Tlangveng-a awm niin, Baptist Church of Mizoram (BCM) Zemabawk a lawi an ni.

Laltanpuii hi, "Mizoram Thalai Kristian Pawl (MTKP) chuan, July 30, 1951 zana Serkawn Sikulpuia Thalai Kristian Pawl (TKP) bul tantu Pathian hjmanrua i ni hi kan ngaihluin kan chhuang a che," tiin TKP Bul tantu chawimawina an lo hlan tawh a, he thuziakah hian a hun laia MTKP President Rev JC Vanlalluaia leh Organiser (tuna Secretary tih ni ta) Rev Lianchhunga Khiangte ten hming an ziak a ni.

Baptist Church of Mizoram hnuaia Kohhran thalaite chu Pathian ram tana nasa zawka inhmang tur leh mumal zawka inenkawl duhna 1940 vel atang khan hmun hrang hrangah a lo chhuak a. Kohhran thenkhatah phei chuan thalai pawl tha tak an din hial reng a ni. Heng hnuah hian 30 July 1951 khan Serkawnah kohhran Upate leh Zosap Misisonary te phalna leh kaihhruaina hnuaiah Thalai Kristian Pawl hi din a lo ni ta a ni. Rampum huap TKP inkawmpui hmasa ber chu Oct 21 - 23, 1955 khan Pukpuiah neih a ni. Kum1972 ah Mizoram chu Union Territory ah hlankai ani a, District TKP tih a rem tak loh avangin Mizoram TKP (MTKP) tiin thlak a ni.