CM hovin sawrkarin thlai thar lei a kalpui kharna hun hmang

Aizawl | June 30, 2025: Vawiin khan I&WRD Conference Hall, MINECO-ah kumin chhunga sawrkarin thlai thar lei a kalpui kharna hun buatsaih a ni a. Chief Minister Pu Lalduhoma chuan khuallian niin a hmanpui.

Chief Minister thusawi tlangpui te chu:

1. A bul tan kum a ni a, inzir chungin kan kal a, mahse kan hlawhtling thawkhat hle. Loneitute pawh an lawmin kan hria. Thlai pali kan han tinzawn a, mahse Mizo buh pawh hi kan titel thei ang kan ti a, kan han titel hram a. Thlai panga kan lei ta a ni.

2. Heng thlai thlan bik 5 zingah hian Sawhthing leh Hmunphiahah tlem han khaih lak zeuh a awm tih loh chu a dang 3 ah hian harsatna kan tawk lo. Hmunphiaha kan buaina bul chu grade-a then tur kan ti kha a ni a. Loneituten chu chu an harsat a, tun hnuah chuan grade a then tawh loh kan ti ta a ni.

3. Kumin February ni 20 atanga sawhthing lei kalpui a nih atangin vawin hi thla 4 leh ni 10-na chiah a ni a. Tunah chuan a mothar a awm tawh si a, khar rih mai hi thain kan hre ta a ni.

Sawrkar kan insengso nasa a, cheng vaibelchhe za vel hi kan sen ral ka ring. Kan theih tawka kan hralh ve bakah hian Central sawrkar market intervention scheme atangin Rs. 9 crore vel kan hmuh ve kan beisei thung. Kan loneitute hi kawng lakah kan kalsan dawn lo va, nakkum lamah pawh kan kalpui zel ang.

4. Nakkum lam pawh khi a market a la tha dawn lovin kan hria a, mahse kan kal zel dawn. A rate chhiat kuma loneitute veng tura he policy hi siam a ni a. A rate that kumah chuan kan inrawlh a ngai lo zawk ang.

A rate a lo chhiat khan he policy hian a thil tum a tihlawhtling a, loneituten rilru hah miah lovin cheng sawmngain an hralh thei a ni. Kum khat leh a chanve chhunga mipuite hnena pawisa thlen tam ber sawrkar kan niin ka ring.

5. Thil lawmawm tak a ken tel chu mipui moral a siam tha hi a ni. A thlawna dawn tumna a bo va, mi thawkrimte tan erawh chuan bituk awm miah lo va sum lakluh theihna a ni.

Tin, tumah thlei bik nei lo vin kan leisak a, huapzo takin kan kal. Chutihlaiin, min tih hmingchhiat tum ranin mi thenkhat an che thin tih kan hria a, a pawi kan ti hle. He policy hi kan za atan a ni tih i hrereng ang u.

6. Environment tichhe lo zawnga lo neih kan kalpui thiam deuh deuh a ngai. Kan ram hi kan dimin kan duat tur a ni. Permanent farming kan ngaihtuah ran a ngai.

7. Crop Insurance lamah tan kan la chho leh mek a, a bul tan nan thlai thlan bikah, a chin tamna bialah kalpui kan tum. Loneituten man tlawm taka an thlai an insure theih nan sawrkarin subsidy kan siamsak bawk ang.

8. Organic lam kan uar zel a ngai tih kan hria a. Food Testing Laboratory changtlung tak neih a, Organic Certificate te pawh pek theih a, hlawk leh zual kan thlaite hralh kan tum zel dawn.

9. State dang chuan kawng hrang hrangin an hming an chher tawh. Meghalaya chuan Lakadong Aieng an larpui mek a, Himachal Pradesh state chuan Apple an larpui. Keini hian Sawhthing hian hming chher ve kan tum ang.

10. Industry hmasawnna te pawh sawi thin mah ila, a barh tur raw material kan ngah tawk loh chuan a hlawhtling thei lo va. Keini chuan a raw-material (primary sector) atangin bul kan tana, nakum lamah industry (secondary sector) kan kai chho ang a, chuta tangin service sector-ah, hma sawnna kailawn dik zawh tumin kan in siam rem mek a ni.

11. Sumdawnna khawvelah kan han lut tan tak tak ta a, chu sumdawnnaa ding chang tur chuan rinawm a ngai tih i hrereng ang u. Khaw tina kan society leh loneitute lo rinawm ula, data dik tak lo neih tum thin ang che u.

12. Hlawhtling taka sawhthing lei an kalpui avangin Mizoram State Policy Coordination Committee, MAMB, DAMB, Collection Centre leh khaw tina society te chungah lawmthu a sawi bawk.

Pu PC Vanlalruata, Agriculture Minister leh Chairman, MAMB pawhin thusawiin, hlawhtling taka thlai thar kan han lei hi ka lawm hle. Kan bul tan tirh kha chuan ka huphurh ru viau mai a. India ramah sawhthing hralhna chhiat kum a lo ni si a. Nimahsela, Chief Minister, loneitute hmangaih tak tak tu kan nei a, a ruahmanna fel tak zarah engkim tluang takin kan kalpui a ni, a ti.

Dr. KC Lalmalsawmzauva, Adviser to CM & Co-Chairman MAMB chuan kumin chhunga thlai thar an lei dan report a pe a.

Mizo buh hi quintals 1473 leiin, Rs. 44 lakh vel sawrkarin a seng a. Sawhthing hi tun thla ni 27 thleng khan quintals 233,604 an lei tawh a, vawiin thlengin la buk. An lei tawh chinah support price hi Rs. 96.4 cr sawrkarin a pe tawh a ni. Aieng quintal 400 leiin, Hmarcha leisak ngai an awm lo. Hmunphiah hi empanelled buyers ten quintals 10552, non empanelled buyers ten quintals 27277 an lei a, ZOHANCO kaltlangin quintals 2498 lei a ni. He mi bikah hian sawrkarin Rs. 2 cr a seng. Kumin hi India rama sawhthing market chhiat kum a ni a, a hralhna hmunpui Bangladesh a lo buai bawk si avangin harsatna a awm a. Kum tharah chuan tha zawka kan kalpui kan inbeisei, a ti.

Pi Ramdinliani, Special Secretary, Agriculture Department chuan kal khawmte lawmna thu a sawi a. Pu Lalbiakzama, Speaker, Pu C. Lalsawivunga, Minister, Pi Lalrinpuii, Minister, Pu Lalfamkima, Deputy Speaker leh MLA te, official pawimawh leh sawm bik enge maw zat an tel a. Pu Lalhmingmuana, MD, MAMB chuan lawmthu sawiin inkhawm a khar a ni.