PWD leh Zuangtui khawtlang inrem; PWD-in FIR hnuklet dawn

Aizawl | May 14, 2025: PWD leh Zuangtui khawtlang chuan vawiin khan inremna an siam a, PWD-in FIR an hnuklet dawn. An inrem hnua thuchhuah intawm-ah, An buai chhan ber 'Hot Mix Plant' tihtawp a nih dawn leh dawn loh an tarlang lo!

PWD official te leh Zuangtui Local Council & All NGO aiawhte chuan uluk taka an ngaihtuah hnuin Mizoram leh mipuite that tlanna turin inhrethiam leh inrem tlang taka awm hi tha kan ti a. PWD lamin FIR an theh luh tawh chu hnuh let leh nise an ti a, tun hnuah hetiang hi thleng tawh lo se an ti bawk a ni.

Vawiin khan PWD Engineer-in-Chief Mini Conference Room-ah PWD official-te leh Zuangtui Local Council & All NGO aiawhte hi an thu khawma, mipui hriata puanzar turin an inremna hi an siam ta a ni.

He an thuchhuah intawmah hian PWD aiawhin Engineer-in-Chief H Zoramliana, Zuangtui Local Council aiawhin chairman K Lalramchhana leh Zuangrtui All NGO aiawhin Zuangtui Branch YMA President Lalthakima ten hming an ziak a ni.

An thuchhuah intawm-ah hian, An buai chhan ber 'Hot Mix Plant' tihtawp a nih dawn leh dawn loh an tarlang lo! Tin, an buai chhan ber Hot Mix Plant  sawn a nih dawn leh dawn loh a inziak lova, engtikah nge sawn tur, an hmang zui zel dawn em? tih pawh a inziak lo  a ni.

"Ni 07.05.2025 (Nilaini) zana PWD Complex Zuangtuia Aizawl Khawpui kawng siam mekna Hot Mix Plant chu khawtlang mipui kut tuara suasam leh tihchhiat a nih chungchangah Zuangtui Local Council leh All NGO aiawhte chuan Engineer-in-Chief, PWD-ah khawtlang aiawhin ngaihdam dilna an rawn thlen a, chutih rual chuan pawikhawihna thlen avanga FIR PWD lamin an theh luh chu hnuk let leh turin an rawn ngen bawk a. PWD official te leh Zuangtui Local Council & All NGO aiawhte chuan uluk taka kan ngaihtuah hnuin Mizoram leh mipuite that tlanna turin inhrethiam leh inrem tlang taka awm hi tha kan ti a. PWD lamin FIR an theh luh tawh chu hnuh let leh nise kan ti a, tun hnuah hetiang hi thleng tawh lo se kan ti."

ZUANGTUI LOCAL COUNCIL LEH ALL NGO THUCHHUAH

Zuangtui a Local Council leh All NGO Meeting Vawi-2 na, Dt 13.5.2025 a YMA Rûn a neih chuan Ni 7.5.2025 Zan a Zuangtui PWD hmun a Bitumen Hot Mix Plant Mipui pung khawm in an ti chhia chu pawi kan ti takzet a, All NGO lam pawn Hot Mix khu tuar tu te harsatna hi kan lo hrethiam phak tawk lo hle niin kan hria, Tharum thawhna duhawm lo tak a chhuah phah hial hi pawi kan ti tak zet a ni.

Bitumen Hot Mix tih chhiat a vang a Sorkar kawng siam lai a khaihlak ta hi pawi kan ti em em a, Sorkar lakah leh Veng chhung kawng siam lai neitu veng te leh Mizoram Mipuite chungah Local Concil leh All NGO chuan pawi kan tiin thupha kan chawi e.

Tin, He kan chhiat tawh min tawrhpui a min thlamuantu Political Party te leh Media mite chungah lawmthu kan sawi a, he thil hi Politics thil a in dem nan leh hamthat lakna tur a Political Issue a min hman sak lo turin Zuangtui LC leh All NGO chuan kan ngen tak meuh che u a ni.

Local Council & All NGO

Zuangtui

JOINT PRESS STATEMENT OF PWD OFFICIALS LEH  ZUANGTUI LOCAL COUNCIL & ALL NGO ZUANGTUI

Vawiin ni 14.05 2025 (Nilaini) a PWD Engineer-in-Chief Mini Conference Room-a PWD official-te leh Zuangtui Local Council & All NGO aiawhte thu khawm chuan Joint Press Statement lungrual takin hetiang hian kan siam.

"Ni 07.05.2025 (Nilaini) zana PWD Complex Zuangtuia Aizawl Khawpui kawng siam mekna Hot Mix Plant chu khawtlang mipui kut tuara suasam leh tihchhiat a nih chungchangah Zuangtui Local Council leh All NGO aiawhte chuan Engineer-in-Chief, PWD-ah khawtlang aiawhin ngaihdam dilna an rawn thlen a, chutih rual chuan pawikhawihna thlen avanga FIR PWD lamin an theh luh chu hnuk let leh turin an rawn ngen bawk a. PWD official te leh Zuangtui Local Council & All NGO aiawhte chuan uluk taka kan ngaihtuah hnuin Mizoram leh mipuite that tlanna turin inhrethiam leh inrem tlang taka awm hi tha kan ti a. PWD lamin FIR an theh luh tawh chu hnuh let leh nise kan ti a, tun hnuah hetiang hi thleng tawh lo se kan ti.

(K LALRAMCHHANA)

Chairman,

Zuangtui Local Council 

(H ZORAMLIANA)

Engineer-in-Chief, PWD

Tuikhuahtlang 

(LALTHAKIMA)

President,

Zuangtui Branch YMA 

All NGO aiawh