Aizawl | May 8, 2025: Leader of Opposition & MLA Lalchhandama Ralte chuan vawiin chawhnu khan SIRD-PR buatsaih Darlawn RD Block chhunga Village Council Member-te pual 'Interaction Session' a hmanpui a. VC Member kalkhawmte chu mahni ram inpe lo turin a chah.
SIRD- PR Auditorium-I, Leitan-a neih 'Interaction Session of Village Council Members of Darlawn RD Block' ah hian khuallian Pu Lalchhandama Ralte, MLA chuan VC Member puala inkawmhona buatsaih chu tha a ti a. Darlawn RD Block chu Tuivawl constituency chhungah hlawm khata a awm chu a vanneihthlak hle a ni, a ti.
VC-te chu sorkar hmasa khan thuneihna a pek belh bakah, chhiah lak kawngah a thuam chak tih a sawi a. Central Ministry hnuaia Panchayati Raj model mil zela tihchangtlun chhoh a nih thu a sawi.
Hmar tlangdung chu Mizoram kawtchhuahpui a ni dawn tih sawiin, "National High pahnihin min pal dawn. Hmar tlangdung landlock tia sawin thin chu tunah hian road alignment tih mek a ni a, compensation kalpui chhunzawm tur a ni. VC Member-te chu mahni leh mahni ram inpek loh tur. Nakin lawkah thangtharten in thlan an la rawn hai duh mai ang," tiin duham lo turin a chah.
VC-te chu ram peka fimkhur tur leh hmasawnna ngai pawimawh turin a chah a. Zirna kawngah pawh, tun matric leh pawl 12 result chhuakah hmar tlangdung chu an tlahniam hret tih sawiin, tan la turin a fuih bawk.
Pu Chhantea chuan Tuivawl bial mipuite chu sorkar healthcare-a inziak lut turin a ngen a. MLA leh VC-te buaina pui ber pakhat chu damlote inenkawlna senso phuhruksak a ni, a ti a. A bial chhung VC-te chu khawmpui lian hrang hrang thleng mai tur atan inbuatsaih tur te, faina leh intodelhna kawngah hmasawnna kawng zawh turin a fuih a, duhsakna a hlan bawk a ni.
Khuallian thu sawi zawh hnuah VC Member kalkhawmte nen inkawmkhawmna neih zui a ni a. Zawhna leh chhanna hun hman a ni bawk.
Program hi Dr. Malsawmdawngliani Fanai, Associate Prof SIRD-PR-in a kaihruai a. Dr. Lalhruaitluangi Sailo, Sr. Core Faculty SIRD-PR chuan training report a pe bawk a ni.
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: