Aizawl | April 21, 2025: Vawiin khan CM Conference Hall-ah Toyota Kirloskar Motor Private Limited ten Road Safety & Disaster Management lama hman atana Mizoram sawrkar hnena JCB pahnih an pek chu, Chief Minister Lalduhoma hnenah an hlan.
Chief Minister Office tuala JCB pahnih chabi inhlanna an neih zawhah Conference Hall-ah hian programme hman a ni a. Chief Minister Lalduhoma hian, Disaster management lama hman theih hmanraw to tham, tangkai bawk si kan neih belh hi kan lawm a, a tangkai hle dawn a ni. Toyota Kirloskar Company-in Aizawl Traffic Management tihchangtlunna tura an thilpek te, Chapchar Kut senso tam tham tak an thawh te leh Mizoram tana an luan chhuahna dangte pawh ka lo hria a, an chungah kan lawm em em a ni, a ti.
Toyota Kirloskar Motor Private Limited Executive Vice President and Country Head Vikram Gulati pawhin thu sawiin Mizoramin leilung chhiatna a tawh thin thu te kan hre thin a. Tih theih tam tak nei lo mah ila, heng chhiatna a lo thlen palh changa chhanchhuahna leh tanpuina hnathawhna lama hman tur, an tha tichaktu tura kan rin JCB hi sawrkar pek tha kan ti a. Lawm takin kan hlan a ni, a ti a. CSR kaltlanga Mizoram tana hma an lakna dangte pawh a tarlang.
He mi hnu hian JCB pahnih inhlan thua inremna Memorandum of Agreement chu Chief Minister hnenah a hlan a. Vikram Gulati hi Roshan R, General Manager leh Company thawktu dangte, Mizorama an dealer Zote Toyota neituten an tawiawm a ni.
Chief Minister hi Commissioner & Secretary to CM Vanlaldina Fanai in a tawiawm a. JCB kawlzuitu tur DDMA Chairman pahnih Aizawl Bawrhsap Er. Lalhriatpuia leh Serchhip DC Paul L. Khuma ten thutawi an sawi. Sr. SP Traffic Stephen Lalrinawma, leh Smart City Limited CEO CC Lalchhuangkima te pawhin Aizawl Traffic Management tihchangtlunna tura Toyota Kirloskar ten CSR atanga hmanrua an pek, Integrated Control & Command Centre hmalakna kaltlanga kalpui mek chanchin an tarlang bawk.
Toyota Kirloskar Motor Private Limited te hian an CSR atangin Mizoram tan hna an thawk nual a, kumin Chapchar Kut hnuhnung berah pawh khan sponsorship tam tham tak an lo thawh tawh a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: