Hun harsa tak tak tawkin hniam takah awm ṭhin mah ila, MNF theihna leh chakna vang niloin Pathianin min kaihruaiin min khai chhuak leh ṭhin a ni.
- MNF President
Aizawl | April 29, 2025: Vawiin April 29, 2025 hian Mamit Chhim Veng YMA Hall-ah Mamit District chhunga MNF VC tlingte chawimawina hun neih a ni. MNF President Zoramthanga chuan khuallian niin a hmanpui.
Zoramthanga chuan, VC tling tharte chu lawmpuina chibai bukin thu a sawi a. Mamit Dist. aṭangin ZPM thlipui tleh kara MNF in VC member 145 zet kan nei thei hi a lawmawm hle a ni. VC tharte chu in veng leh khua ṭheuhah ṭha taka hna thawk tur leh politics-ah dawhtheihna neih a ngai a, Pu Laldenga'n, Politics-ah chuan dawhtheihna zawng zawng a tawp hunah pawh ala tawk lo' ti a min zirtirna ṭhin kha i vawng thar ang u. Mamit Dist. a hmasawnna ropui tak tak kan hmuh tawh leh kan hmuh mek nachhan hi Pathian malsawmna MNF-in a dawn vang liau liau a ni, a ti.
MNF President chuan, Mizoram-ah party tam tak an ral tawh laiin, MNF chu kum 64 chuang kan ni tawh a, chuti chungin vawiin thlenga party ruhrel lian ber kan la ni thei hi kan theihna vang a nilo. Hun harsa tak tak tawkin hniam takah awm ṭhin mah ila, MNF theihna leh chakna vang niloin Pathianin min kaihruaiin min khai chhuak leh ṭhin a ni. 'Pathian leh kan Ram tan' tih thupui leh thuthlung meichher vuan tlattu party kan nihna hi i vawng tlat zel ang u, a ti.
"Mizoramah party hrang hrang thli alo tleh tawh ṭhin a, Pathianin ZPM thli a tlehtir a, an hun atan ruat a ni. Mahse, midang sorkar laia mipui zawhna ang a ni ta hauh lo, Congress leh MNF a sorkar lai chuan a dawtah an sorkar leh angem le tiin an inzawt ṭhin a. ZPM sorkar-ah chuan inthlan lehah an sorkar leh angem le ti loin, an term an hmang zo angem le tiin mipui an inzawt mek a ni. Chuvangin, MNF hi lo chhuahsan lo ula, Pathian leh kan Ram tan titu party-te hi Pathianin min kaihruai zel dawn a, kan thuthlung hi nghet takin i vawng zel ang u," tiin kalkhawmte ṭhahnemngai takin a fuih.
Hachhek Bialtu MLA Pu Robert Romawia Royte pawhin thu sawiin, Mizoramin Chief Minister kan neih tawhte zinga Mamit District tlawh ngun ber leh min ngaihven em em ṭhintu, Pu Zoramthanga, Ex-CM leh MNF President kan nei hi kan vannei a. Ramri chungchanga kan thlamuanpui ṭhin, CM anih laia Phuldungsei leh Thaidawr tlang te tlawhtu kan neih chhun a ni. Phuldungsei khua ration card chhungkaw 85 Mizoram aṭanga paih anni hi khawl changkang takin a paih niloin paih luih, sorkar thuneitu thu anga hnathawktuten an paih ngei a ni. Hei hi a pawi em em a ni. Mizoram khua leh tui diktakte chu MNF chuan a ngaihtuahin an dikna chanvo a hum sak zel dawn a ni, a ti.
Pu Robert Romawia Royte chuan, ram hmangaihtu tak tak leh zuam tur leh zuam loh tur CM chu kan ṭhenawm State leh Central thlengin an hria a. Assam nena kan ramri pawh Pu Zoramthanga CM a nih hnu ah Assam ram emaw kan lo tih mai ṭhinte pawh Assam in an rawn chhal ngamlohna a awm nual tawh a ni. MNF sorkar laiin Sports Infrastructure-ah nasa takin hmasawnna kan hmu a. MNF sorkar lai anga Sports lama hmasawnna hnathawh hmuh tur ala awm ngailo a ni, a ti.
Kuhva tawlhruk chungchang sawiin, Pu Robert Romawia Royte chuan, sorkar inthlahdah avangin kuhva tawlhrute an huangtau em em a, nizan maiah pawh Aizawl khawpui chhungah man a ni a, kei ngei pawh ka kal a ni. Tunhnaia kuhva man sa an lilam hi thil diklo lian tak a ni a. License neilo leh phalna neilo hnena hralh phei chu thil dik lo lehzual a ni. Hemi chungchanga sorkar thil tih dan diklo hi kan chhui zel dawn a ni. MNF party te sorkar leh turin taima takin i thawk zel ang u tiin kalkhawmte a fuih.
Social Media chungchang inzirtirna leh hman ṭangkai dan Pu J.Malsawmzuala Vanchhawng, GS, MNF Gen. Hqrs chuan a nei a. Mamit Bialtu MLA, Er H.Lalzirliana'n lawm thusawiin hun a khar.
MNF VC tling 145 bakah hian tunhnaiah MNF VC siam thar an awmbelh avangin, Mamit District ah MNF VC member 150 an awm mek a ni.
Mamit District aṭanga MNF tlingte chawimawina inkhawm hi MNF Mamit Centre Block President, Pu H.Lalthlengliana'n kaihruaiin hunserh Pastor Lalmawia Ralte in a hmang.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: