Mizoram Adventure Festival 2025 zo fel; Thalai 90 chuang tel

Aizawl | March 24, 2025: Sports & Youth Services Department chuan March ni 17th - 21st, 2025 chhung khan Mizoram Adventure Festival 2025 a buatsaih. He Adventure Festival-ah hian Sports & Youth Services Department hnuaia in register Adventure Club hrang hrang atangin member 91 lai an tel a ni.

March 17, 2025 zan khan State Adventure Training Centre, Vaipuanpho-ah Opening Function neih niin, participants te an riak lut tan a. Festival chhung hian participants te group thumah inthenin, group tin te hian ni 18th – 20th March, 2025 chhung khan hmun hrang hrangah Adventure sports chi hran theuh an in tih chhawk a, chungte chu - Reiek tlangah rappelling, Khuangchera pukah Caving, Trekking (Reiek to Ailawng), Tlawng Sihhmui kaiah Water Rafting leh SATC, Vaipuanpho ah Army & High Rope Obstacle Course leh Ziplining te a ni.

March 21, 2025 khan SATC, Vaipuanpho ah Army & High Rope Obstacle Course-ah Group Competition neih pui an ni bawk. Festival chhung hian participants te SATC Vaipuanpho ah an riak lut vek a, zan tin program hrang hrang hmanpui an ni bawk.

March 21, 2025 zan hian Reiek Tourist Resort Auditorium-ah Closing Function neih a ni a, Pu Lalramsanga Sailo, Secretary, Sports & Youth Services Department chu khuallian niin festival hi a khar a ni.

Mizoram Adventure Festival 2025 buatsaih nan hian North Eastern Council atangin funding hmuh a ni. Theme atan “Choose Adventure, Choose Life” tih hmang in, Mizo thalaiten Adventure lama tuina leh chona thar an lo neiha, thil engpawh hmachhawn thei tura an taksa leh rilru hriselna ngai pawimawha an invawn chhoh zel nan te, tin, chhiatrupna (disaster) a lo thlenin chhanchhuah hna (search and rescue) thawk thei tura thiamna an chhar chhuah theih nan te he Mizoram Adventure Festival 2025 hi buatsaih a ni.